Mapesho a Bufumu Akonsha Kwikala Enu

PAULO mutumwa wa bwina Kilishitu wayukile kwamba milaka imo ikatampe yajingako mu moba anji. Kufunda kwanji kwaesakana pamo na mfunjilo ya pa univesiti lelo jino. Wamwenejilemo bingi mu kwikala kwanji mwina Loma. (Byubilo 21:37-40; 22:3, 28) Bino bintu byafwainwe kumulengela kwikala munonshi waya nkuwa. Pano bino waambile’mba: “Byonkabyo abya byonse byaji bya kumwenamo amiwa, nebitela ke byatu na mambo a Kilishitu . . . ne kwibitela namba, binchatu, namba mmwenemo Kilishitu.” (Filipai 3:7, 8) Mambo ka Paulo kyo aambijile bino?

Paulo wayukanyikilwe kala’mba Saulo mwina Talasusa wapachile “bamo ba mu jije Jishinda,” waitabijile pa nyuma ya kumumwesha kimwesho kya Yesu wasangulwa kabiji watumbijikwa. (Byubilo 9:1-19) Paulo byo amwene kino kimwesho kimye kyo ayilenga ku Damasakasa, washiinwe’mba Yesu ye wajinga Mesiasa walaiwe nangwa’mba Kilishitu kalama wa kimye kya kulutwe wa Bufumu bwalaiwe. Kabiji kyalengejile Paulo kupimpula bwikalo bwanji byonka byo kyaambiwa mu mawi anji o twamona peulu po. Mu ñambilo ikwabo, Paulo walapijile na mambo a bukine ne bukishinka.—Ngalatiya 1:13-16.

Mu Baibolo, kyambo kya “kulapila” javula kyatuntululwa ku kyambo kya Kingiliki kilumbulula’mba “pa nyuma ya kuyuka,” kyapusanako na “kuyukila jimo.” Onkao mambo kulapila kulumbulula’mba muntu wapimpula milangwe, byubilo ne byo akeba kuba, kabiji wasankilapo mashinda anji atama akala. (Byubilo 3:19; Lumwekesho 2:5) Kimwesho kyamwene Paulo byo ayilenga ku Damasakasa kechi wikimwenetu’mba kyakusangajika nangwa’mba kya bupopweshitu ne. Kyamulengejile kuyuka’mba byubilo byanji byakala byajinga byatu, mambo kechi wamuyukile Kilishitu ne. Kabiji wayukile’mba pa kuba’mba amwenemo mu maana anji apya akuyuka Kilishitu, wafwainwe kubapo kimo kya kuwamishishamo bwikalo bwanji.—Loma 2:4; Efisesa 4:24.

Lupimpu Lwaletele Mapesho

Ku nyuma, Paulo wayukile byavula pa mambo a Lesa kimye kyo ajinga mu bupopweshi bwa Bafaliseo. Mu mafunjisho abo mwajinga butemwamaana ne mizhilo ya buntunshi. Na mambo a bulwanyi mu bupopweshi, Paulo waingijishenga lupata lwanji mu jishinda jabula kufwainwa. Nangwa kyakuba walangulukilenga’mba ubena kwingijila Lesa, wamulwishishenga.—Filipai 3:5, 6.

Pa nyuma ya kwikala na maana alumbuluka a kuyuka Kilishitu ne mwingilo wanji mu nkebelo ya Lesa, Paulo wamwene’mba wafwainwa kusalapo kimo: Abya wafwainwe kwikala Mufaliseo ne kutwajijila na kifulo ne munema wanji nyi, inyi wafwainwe kupimpula bwikalo bwanji ne kutendeka kuba bintu byafwainwa pa kuba’mba etabizhiwe kwi Lesa? Na lusekelo, Paulo wasajile kintu kyawama, mambo waambile’mba: “Kechi neobila bumvu mambo awama ne, mambo bo bulume bwa Lesa buleta lupulukilo ku bonse baitabila; kutatula ku Bayudea, kabiji ne ku Bangiliki nabo pamo.” (Loma 1:16) Paulo waikele ke musapwishi wabambakana wa mambo awama a Kilishitu ne a Bufumu.

Pa nyuma ya myaka yavula, Paulo wabujile bakwabo bena Kilishitu’mba: “Amiwa kechi nelanguluka namba, nakwatako kala, ine: bino ko kiji kimo kyo nguba, mvulama bintu biji kunyuma, kasa nkanamina bintu biji kulutwe, kasa nebikakotu kunanga kikonkwanyi kya mpasela ya lwito lwa mwiulu lwa Lesa lwa mwi Kilishitu Yesu.” (Filipai 3:13, 14) Paulo wamwenejilemo mu mambo awama mambo wasankijilepo bintu byamulengejilenga kupondokela Lesa ne kuba byubilo byaswañenenga na nkebelo ya Lesa.

Musakubapo Ka?

Apo kampe mambo awama a Bufumu popo mwiomvwapo. Nanchi luketekelo lwa kwikala myaka ne myaka mu paladisa lwimuwamina nyi? Lwafwainwa kwimuwamina mambo atweba bonse tukeba kwikala bwikalo bwafwainwa ne kwiyowa bumi ne mutende. Baibolo yamba’mba Lesa wabika “bya muyayaya” mu michima yetu. (Musapwishi 3:11) Onkao mambo ke kintu kya kisemwa kotuji kulanguluka pa kimye bantu kyo bakekala myaka ne myaka mu mutende ne lusekelo. Bino byo bintu byatongolwa mu mambo awama.

Nangwa kiji byonkabyo, pa kuba’mba luno luketekelo mwilumone’mba lwa kine, mwafwainwa kupesa-pesa ne kumona mambo awama byo aji. Mutumwa Paulo watundaikile’mba: ‘Yukai kyaswa muchima wa Lesa, akya kyawama, ne kyaitabilwa, ne kyalumbuluka.’ (Loma 12:2) Byonka byajinga Paulo, pa nyuma ya kwikala na maana, mwafwainwa kusalapo kimo.

Apo kampe paji byo mwaitabilamo pa mambo a kimye kyenu kya kulutwe. Vulukai’mba Saulo wajinga na byo aitabijilemo Lesa saka akyangye kwikala mutumwa Paulo. Mukifulo kya kukeba’mba Lesa akemumweshe kimwesho, mambo ka o mwabujila kulangulukishapo bulongo pa ano mambo? Ishikishai’mba: ‘Abya nayuka kyaswa muchima wa Lesa ku bantu ne ino ntanda nyi? Kiyukilo ka kyo nakonsha kuyukilako byo naitabilamo? Nanchi kiyukilo kyami umvwe ne kipima na Baibolo kyakonsha kwikala kya kine nyi?’ Kafwako kyo mwakonsha kulusa umvwe mwabalaula lwitabilo lwenu mu jino jishinda ne. Mwafwainwa kuba byonkabyo mambo Baibolo itukambizha’mba: “Esekai, bintu byonse; kakachilai akya; kyalumbuluka.” (1 Tesalonika 5: 21) Nanchi kwitabizhiwa kwi Lesa ke kyo kintu kikatampe nenyi?—Yoano 17:3; 1 Timoti 2: 3, 4.

Bantangi ba bupopweshi bakonsha kwitulaya bumi bwa myaka. Pano bino umvwe uno mulaye kechi waimana pa mafunjisho a Baibolo ne, kuba witukwasha kwikala na mapesho a Bufumu bwa Lesa ne. Mu Busapwishi bwanji bwa pa Mutumba bwaya nkuwa, Yesu wajimwine’mba “Kechi bonse bañambila’mba Nkambo! Nkambo! bakatwela mu bufumu bwa mwiulu ne; poso awa uba kyaswa muchima wa Tata wa mwiulu.”—Mateo 7:21.

Yesu wakonkomwena’mba kuba kyaswa muchima wa Shanji kyo kipimo kya kutambwilamo mapesho a Bufumu bwa Lesa. Mu ñambilo ikwabo, byubilo bimweka nobe bya bwina Lesa kimye kimo kechi bitabizhiwa kwi aye ne. Yesu waambile’mba: “Mu aja juba bavula bakañambila’mba Nkambo! Nkambo! kechi twaawilenga na mupashi mu jizhina jenu nenyi? ne mu jizhina jenu kechi twapangijilengamo bademona nenyi? kabiji kechi twaubijilengamo mingilo ya bulume yavula mu jizhina jenu nenyi? Ponkapo nkebambila namba, kechi nemuyukilepo ne: mfumai anweba ba kuba bibi.” (Mateo 7:22, 23) Kintu kikatampe kyo twafwainwa kuyuka ke kya kuba’mba tumvwishe bulongo mambo awama a Bufumu byoaji ne kuba moayila.—Mateo 7:24, 25.

Bukwasho po Buji

Kukila pa myaka 100, Bakamonyi ba kwa Yehoba babena kusapwila mambo awama a Bufumu bwa Lesa. Kupichila mu mabuku ne mu misambotu, babena kukwasha bantu mwaya ntanda yonse kufunda maana alumbuluka a kuyuka Bufumu byo buji, mapesho o bukaleta ne muntu byoafwainwa kuba pa kuba’mba akeatambule.

Tubena kwimukosesha kumvwina mambo awama abena kusapwila Bakamonyi ba kwa Yehoba. Umvwe mwaitabila mu mambo awama ne kuba moayila, mukatambula mapesho akatampe—kechi pakyonka kino kimyetu ne, bino ne mu kimye kya kulutwe Bufumu bwa Lesa byo bukalamanga ino ntanda yonse.—1 Timoti 4:8.

Ingilai lonka luno, mambo mapesho a Bufumu bwa Lesa aji pepi!

[Bipikichala pa peja 7]

Kupichila mu mabuku ne mu misambotu, Bakamonyi ba kwa Yehoba basapwila mambo awama a Bufumu