Yehoba Witulama Kuba’mba Tukapuluke

‘Anweba babena kwimulama kwi Lesa mu bulume bwanji na mambo a lwitabilo lo muji nalo. Lesa ubena kwimulama amba mukamone lupulukilo lo banengezhezha jimo lukasoloka mu juba jikapelako.’—1 PE. 1:4, 5.

MUSAKUKUMBULA’MBA KA?

․․․․․

Yehoba witukokejile byepi mu bupopweshi bwa kine?

․․․․․

Twakonsha kuswisha byepi Yehoba kwitutangijila na lujimuno lwanji?

․․․․․

Yehoba witutundaika byepi?

1, 2. (a) Twayuka byepi kuba’mba Lesa witukwasha kulama bukishinka bwetu? (b) Yehoba wituyuka byepi bulongo pa muntu pa muntu?

“YENSE ukachinchika kufika ne ku mpelo, ye ukapuluka.” (Mat. 24:13) Byo aambile bino byambo, Yesu wamwesheshe patoka kuba’mba inge twatwajijila kwikala bakishinka kufika ne ku mpelo tukapuluka kimye buchibamambo bwa Lesa kyo bukafika pa ntanda ya kwa Satana. Pano bino kino kechi kilumbulula’mba Yehoba witulekelela’mba tuchinchike na maana nangwa na bulume bwetu ne. Baibolo witubula’mba: “Lesa wakishinka kabiji kechi ukemuleka amba mwesekwe lweseko lwakila pa bulume bwenu ne, bino mu lweseko lonse aye ukemumwena jishinda ja kuchinchikilamo.” (1 Ko. 10:13) Bino byambo byatala mwepi?

² Yehoba byo abula kwituleka kwesekwa kupitaila papelela bulume bwetu, ko kuba’mba wituyuka bulongo kubikapo ne makatazho o tupitamo, byo twalengwa ne bintu byo twakonsha kuchinchika. Nanchi Lesa kine wituyukishatu bulongo nyi? Ee. Binembelo byaamba’mba Yehoba wituyukishatu bulongo pa muntu pa muntu. Wayuka bintu byo tuba pa juba pa juba ne byubilo byetu. Wayuka ne byo tulanguluka ne biji mu michima yetu.—Tangai Salamo 139:1-6.

3, 4. (a) Byapichilemo Davida bimwesha byepi Yehoba byo etuta muchima pa muntu pa muntu? (b) Ñanyi mwingilo mukatampe ubena kwingila Yehoba lelo jino?

³ Nanchi muzhinauka amba kana Lesa watako ne muchima ku bantu nyi? Nyimbi wa masalamo Davida naye walangulukilepo bingi pa buno bwipuzho kya kuba waipuzha ne Yehoba amba: “Byo ndanguluka bya mwiulu mwenu, mwingilo wa minwe yenu, Ñondo ne tubangabanga, byo mwaikajika; nanchi muntu ye wa byepi, byo mwamuta muchima?” (Sala. 8:3, 4) Byapichilemo Davida kampe byo byamulengejile kwipuzha buno bwipuzho. Uno mwana Yese byo ajinga mwanyike pa bonse mu kisemi, Yehoba kechi watainepo “muntu mukwabo waya monka mwayila muchima wanji mwine” Lesa ne, kabiji wamufumishe ‘ko ajishishenga mikooko amba ekale mfumu’ wa bena Isalela. (1 Sam. 13:14; 2 Sam. 7:8) Akifwanyikizhai Davida byo eumvwine pa kuyuka’mba Mulenga walengele bintu byonse wateleko bingi muchima ku byo alangulukanga kimye kyo ajinga kafunga saka akiji nsongwalume.

⁴ Nangwatu lelo jino kuyuka’mba Yehoba wituta muchima kechi kya kuzhinauka ne. Ubena kukonkanya “bya buneme” bya mu mikoka yonse mu bupopweshi bwa kine ne kwibakwasha kwikala bakalume banji bakishinka. (Hagai 2:7) Pa kuba’mba tumvwishe Yehoba byo etukwasha kwikala bakishinka, patanshi twayai twisambe pa byo akokela bantu ku bupopweshi bwa kine.

LESA YE WIMUKOKA

5. Yehoba ukokela byepi bantu ku Mwananji? Ambai kyamwekele.

⁵ Yesu waambile’mba: “Kafwako muntu wakonsha kwiya kwi amiwa ne, poso Batata bantumine bamukokela ko nji.” (Yoa. 6:44) Bino byambo bimwesha’mba, Lesa ye witukwasha kwikala baana ba bwanga ba kwa Kilishitu. Yehoba ukokela byepi bantu ba bumukooko ku Mwananji? Uba bino kupichila mu mwingilo wa kusapwila Mambo awama kabiji wingijisha ne mupashi wanji wazhila. Kyakumwenako, Paulo ne bamishonale bakwabo byo bajinga mu Filipai bataine mwanamukazhi aye Lidiya ne kumusapwila mambo awama. Jino jishimikila janembelwe na lutangijilo lwa mupashi jitubula’mba: “Yehoba wamushinkwile muchima kuba amba omvwishe bintu byaambilenga Paulo.” Lesa wamupele mupashi wamukwashishe kumvwisha mwatala mambo awama, kabiji aye ne ba mu nzubo yanji bonse babatizhiwe.—Byu. 16:13-15.

6. Lesa witukokejile byepi ku bupopweshi bwa kine?

⁶ Nanchi Lidiya ye yenkatu ye bakokele nyi? Ine. Inge mwi bena Kilishitu bepana, ne anweba Lesa ye wimukokejile mu bupopweshi bwa kine. Byonkatu Shetu wa mwiulu byo amwenemo kyawama mu muchima wa kwa Lidiya ne mwi anweba wamwenemo kyawama. Byo mwaumvwine mambo awama Yehoba wimukwashishe kwiomvwisha na bukwasho bwa mupashi wazhila. (1 Ko. 2:11, 12) Byo mwatendekele kwibikako kwingijisha byo mwafunjile mu bwikalo bwenu, naye wimukwashishe kuba kyaswa muchima wanji. Byo mwipaine kwi aye, mwamutokeshe bingi ku muchima. Kya kine kufumatu kimye kyo mwatendekele kwenda mu jishinda jaya ku bumi, Yehoba wimukwasha kwenda bulongo.

7. Twayuka byepi kuba’mba Lesa witukwasha kutwajijila kwikala bakishinka?

⁷ Byo etukwashishe kutendeka kwenda nanji, Yehoba kechi wituleka kwikala bakishinka mu bulume bwetu ne. Wayuka’mba byo twabujile kufunda bukine mu bulume bwetu, ko kuba’mba kechi twakonsha kutwajijila mu bukine na bulume bwetu ne. Mutumwa Petelo wanembejile bena Kilishitu bashingwa amba: ‘Anweba . . . babena kwimulama kwi Lesa mu bulume bwanji na mambo a lwitabilo lo muji nalo. Lesa ubena kwimulama amba mukamone lupulukilo lo banengezhezha jimo lukasoloka mu juba jikapelako.’ (1 Pe. 1:4, 5) Bino byambo byavwangamo bena Kilishitu bonse kabiji byanema bingi kwi atweba lelo jino. Mambo ka? Mambo atweba bonse tukeba Lesa kwitukwasha kutwajijila kwikala bakishinka kwi aye.

WITUKWASHA KUBULA KUYA MU JISHINDA JATAMA

8. Mambo ka o twafwainwa kujimukila kuba’mba tubule kuya mu jishinda jatama?

⁸ Makatazho a mu bwikalo ne bumbulwa kulumbuluka bwetu byakonsha kwitulengela kubula kuta muchima ku bulunda bwetu ne Lesa ne kwitulengela kuya mu jishinda jatama kwa kubula kuyuka. (Tangai Ngalatiya 6:1.) Kino kishinka kimwekela mu byapichilemo Davida mu bwikalo bwanji.

9, 10. Yehoba wakainye byepi Davida kuba kyatama, kabiji witukwasha byepi lelo jino?

⁹ Mfumu Saulo byo akebelenga ku mwipaya, Davida wikainye kushinkanya nanji uno mfumu wamubijilenga kichima. (1 Sam. 24:2-7) Bino mu kuya kwa moba, bumbulwa kulumbuluka bwanji Davida bwamulengejile kukeba kuba kyatama. Aye ne banabalume boajinga nabo bakajilwe ne kulomba na mushingi bukwasho kwi Nabala mukwabo mwina Isalela. Nabala byo ebatukile, Davida kyamukolele bingi ku muchima kabiji waimene ne kuya amba nkashinkanye nanji Nabala ne ba mu nzubo yanji bonse, walubamo kishinka kya kuba’mba kwipaya bantu babula mambo kukamulengela kuzhatwa na mashi abo kwi Lesa. Muka Nabala aye Abigaila ye waishile pa kimye kyafwainwa ne kukanya Davida kulenga ano mambo akatampe. Davida byo ayukile’mba Yehoba ye walengela Abigaila kwiya na kumukanya, wamwambijile’mba: “Maana obe atotwe ne obe mwine pamo, mambo obewa ja lelo wankanya kwichila mashi ne kwishinkenya ami mwine na kuboko kwami.”—1 Sam. 25:9-13, 21, 22, 32, 33.

¹⁰ Twakonsha kufunjilako ka ku jino jishimikila? Yehoba waingijishe Abigaila kukanya Davida kuba kyatama. Ne lelo jino byobyo oba. Nangwa byonkabyo kechi twafwainwa kuketekela’mba Lesa utumanga bantu ba kwitukanya kimye kyonse kyo tukeba kuba byatama ne. Kabiji kechi twafwainwa kulangulukila jimo bisa kuba Yehoba mu bintu bimo nangwa byo akoba pa kuba kyaswa muchima wanji ne. (Sapwi. 11:5) Bino twafwainwa kuvulukanga kuba’mba Yehoba kimye kyonse uyuka bintu byo tupitamo kabiji witukwasha kutwajijila kwikala bakishinka kwi aye. Witulaya’mba: ‘Amiwa nkakubula ne kukufunjisha jishinda jo ukayamo; Nkakubulanga maana ne jiso jami saka jikutala.’ (Sala. 32:8) Yehoba witufunjisha byepi? Twakonsha kumwenamo byepi? Kabiji mambo ka o twasumininwa kuba’mba Yehoba ubena kutangijila bantu banji lelo jino? Akimonai buku wa Lumwekesho byo akumbula ano mepuzho.

LUJIMUNO LWANJI LWITULAMA

11. Yehoba wayuka byepi bibena kumweka mu bipwilo bya bantu banji?

¹¹ Mu kimwesho kyanembwa mu buku wa Lumwekesho bitango 2 ne 3, Yesu Kilishitu watumbijikwa waishile na kupempula bipwilo bitanu na bibiji bya mu Asha Maina. Kino kimwesho kimwesha’mba, Kilishitu kechi utajilatu palepa ne, bino umona byonse byubiwa. Mu bipwilo bimo, watongwele ne bantu bamo pa mazhina ne kwibasanchila nangwa kwibajimunako pa byo baubile. Kino kimwesha ka? Mu kino kimwesho, bipwilo bitanu na bibiji bimenako bena Kilishitu bashingilwe panyuma ya 1914, kabiji lujimuno lo ajimwineko bino bipwilo bitanu na bibiji lwavwangamo bipwilo byonse bya bantu ba Lesa biji pano pa ntanda lelo jino. Onkao mambo, kyayilamo kwamba’mba, Yehoba ubena kutangijila bantu banji kupichila mu Mwananji. Twakonsha kumwenamo byepi mu luno lutangijilo?

12. Twakonsha kuswisha byepi Yehoba kwitutangijila?

¹² Lufunjisho lwa pa bunke jo jishinda jimo jitulengela kumwenamo mu lutangijilo lwa Yehoba. Yehoba witupa lujimuno lwanema bingi lwa mu Binembelo kupichila mu mabuku anembwa na jibumba ja kalume wakishinka kabiji wa maana. (Mat. 24:45) Pa kuba’mba tumwenemo, twafwainwa kwikalangako na kimye kya kutanga kabiji ne kwibingijisha. Lufunjisho lwa pa bunke jo jishinda Yehoba jo engijisha ‘kwitukwasha kubula kwituntula.’ (Yuda 24) Nanchi mwakitangapo kala bintu mu mabuku etu bimufikile pa muchima nyi? Bikokelainga byo mwayuka’mba bifuma kwi Yehoba. Byonkatu mulunda nenu byo akonsha kwimukwata pa kipuzhi pa kwimukwasha pa bintu bimo, ne Yehoba naye wingijisha mupashi wanji wazhila kwimukwasha kuyuka byubilo byenu ne biji na bakwenu byo mwafwainwa kuchinuzhuka. Umvwe ke tunekenene lutangijilo lwa mupashi, tuswisha Yehoba kwitutangijila mu bwikalo bwetu. (Tangai Salamo 139:23, 24.) Onkao mambo, twafwainwa kutapo muchima pa lufunjisho lwa pa bunke.

13. Mambo ka o twafwainwa kutela muchima pa lufunjisho lwa pa bunke?

¹³ Kutaya kimye kyabaya ku byakisangajimbwe kwakonsha kwitujila kimye kya lufunjisho lwa pa bunke. Mulongo umo waambile’mba: “Kyapela bingi kuvulama kwikala na lufunjisho lwa pa bunke. Lelo jino byakisangajimbwe byasampukila ne pakatele kukila kala. Bitanwa pa malangalanga, pa makompyuta ne pa mafoni. Byavula kya kine kine.” Inge twabula kujimuka, tukakankalwanga kwikala na kimye kya kuchikamena mu lufunjisho lwa pa bunke kabiji mu kuya kwa moba tukaleka ne kutanga. (Efi. 5:15-17) Onkao mambo, atweba bonse twafwainwa kwishikisha’mba: ‘Nanchi ngikalapo na kimye kya kutanga Mambo a Lesa saka natapo muchima nyi? Nanchi ngubatu bino pa kunengezha jashi nangwa kupwila nyi?’ Umvwe byobyo kiji, twafwainwa kuta muchima pa kupopwela kwa kisemi pa kuba’mba tuyuzhe mu michima yetu maana etupa Yehoba etulama kuba’mba tukapuluke.—Mana 2:1-5.

LUTUNDAIKO LWANJI LWITUKOSESHA

14. Binembelo bimwesha byepi amba Yehoba wata muchima ku byo tumvwa?

¹⁴ Davida wapichile mu makatazho avula bingi. (1 Sam. 30:3-6) Byambo byo anembele na lutangijilo lwa mupashi bimwesha’mba Yehoba wayukile byo eumvwanga. (Tangai Salamo 34:18; 56:8.) Ne atweba Lesa wayuka byo tumvwa ku muchima. Inge muchima wetu ‘walajika’ nangwa ‘kulapila,’ Yehoba ufwenya kwipi ne atweba. Kino kishinka kitutekenesha bingi byonka byo kyatekeneshe Davida waimbile’mba: “Nkasekela ne kusangalala mu lusa lwenu; Mambo anweba mwamona kumanama kwami: Mwayuka byakatazha byamona muchima wami.” (Sala. 31:7) Yehoba kechi umonatu bya malwa byo tupitamo ne. Witukwasha kupichila mu kwitutekenesha ne kwitutundaika. Kupwila kwa bwina Kilishitu jo jishinda jimo jo obilamo bino.

15. Twakonsha kufunjilako ka ku byapichilemo Asafwa?

¹⁵ Byapichilemo nyimbi wa masalamo Asafwa bitulengela kumona buneme bwa kutanwa ku kupwila. Kulanguluka pa nshiji ya bantu kwalengejile Asafwa kubula kumona buneme bwa kwingijila Lesa. Asafwa walefwilwe. Waambile pa byo eumvwinenga’mba: “Muchima wami walukuchile, Naashilwe ku mafyo ami.” Kino kyashi kikamulengele kuleka kwingijila Yehoba. Ki ka kyamukwashishe? Waambile’mba: “Natwelele mwazhila mwa Lesa.” Kupwila pamo na bapopweshi bakwabo ba Yehoba kwamukwashishe kwikala jibiji na ndangulukilo yawama. Popo amwene’mba bwikalo bwa ntentente bwa babi bwa kakimye kacheche, mambo kwa kubula nangwa kuzhinaukatu ne, Yehoba ukebonauna. (Sala. 73:2, 13-22) Kyo kimotu ne atweba lelo. Nshiji ya mu ino ntanda ya kwa Satana yakonsha kwitulefula. Kupwila pamo na balongo betu kwitutundaika ne kwitukwasha kutwajijila kwingijila Yehoba na lusekelo.

16. Byapichilemo Hana byakonsha kwitukwasha byepi?

¹⁶ Pano ibyepi inge mu kipwilo mo muji lukatazho lubena kwimulengela kushala ku kupwila? Kampe bemwangachile mingilo imo mu kipwilo kabiji kimukola bingi ku muchima, nangwa kampe mwapusene na mulongo nangwa nyenga. Umvwe byobyo kiji, byapichilemo Hana byakonsha kwimukwasha. (Tangai 1 Samwela 1:4-8.) Vulukai kuba’mba mpaji nanji aye Penina wamufichishanga bingi ku muchima. Lukatazho lwakilangamo kubaya kimye kyo bayanga na kisemi kyonse na kupana milambo kwi Yehoba ku Shilo pa mwaka pa mwaka. Hana kyamukolanga bingi ku muchima kya kuba “wajijilenga, ne kuja kajo ke ne.” Pano bino kechi kyamulengelanga kubula kuya na kupopwela Yehoba ne. Yehoba wamwene bukishinka bwanji ne kumupesha.—1 Sam. 1:11, 20.

17, 18. (a) Mu ñanyi mashinda mo tutambwila lutundaiko pa kupwila kwa kipwilo? (b) Mwiumvwa byepi Yehoba byo etuta muchima amba tukapuluke?

¹⁷ Bena Kilishitu lelo jino baji na bishinka bibalengela kutanwa ku kupwila byonka byaubanga Hana. Kechi twafwainwa kushalanga ku kupwila ne. Byonka byo twayukila jimo, kupwila kwitutundaika bingi. (Hebe. 10:24, 25) Butemwe bwa bena Kilishitu bakwetu bwitutekenesha bingi. Byambotu bicheche byo twakonsha kumvwa mu jashi nangwa mu byakumbula mukwetu byakonsha kwitufika pa muchima. Mwina Kilishitu mukwetu wakonsha kwituteleka nangwa kwitutekenesha kimye kyo tubena kwisamba kupwila saka ku kyangye kutendeka nangwa panyuma ya kupwila. (Mana 15:23; 17:17) Pa kwimbila Yehoba nyimbo ya kumutota, muchima wetu usangalala. Kikatakata inge “milanguluko” ituvujila popo tukebesha lutundaiko lwa pa kupwila, Yehoba po etukosesha na ‘bya kutekenesha byanji’ ne kwitukwasha kutwajijila kwikala bakishinka.—Sala. 94:18, 19.

¹⁸ Twiumvwa kuzhikijilwa Lesa byo etuta muchima byonka biumvwine nyimbi wa masalamo Asafwa waimbile pe Yehoba amba: ‘Mwankwachilenga ku kuboko kwami kwa kilujo. Mukantangijilanga na maana enu.’ (Sala. 73:23, 24) Tumusanchila bingi Yehoba pa byo etulama kuba’mba tukapuluke.

[Kipikichala pa peja 28]

Ne anweba Yehoba mwine ye wimukokele

[Kipikichala pa peja 30]

Kulondela lujimuno lwa Lesa kwituzhikijila

[Kipikichala pa peja 31]

Lutundaiko lo lwitukosesha