Kimwesho Kya Kwaluka Kyamwesheshe Kilishitu Mu Lukumo

Yesu byo afunjishenga bantu mu kibunji kya Kesalea Filipai palepele nobe makilomita 25, kufuma ku Mutumba wa Helemone, waambijile batumwa banji amba: “Kine nemwambila namba, mwi anweba baimana pano, bamo kechi bakafwa ne, poso patanshi bakamone Mwana muntu saka eya mu Bufumu bwanji.”—Mateo 16:28.

Baana ba bwanga kyamweka balangulukilenga mwatazhizhe Yesu pa kwamba bino byambo. Byo papichile mulungu umo, Yesu wasendele baana banji ba bwanga ba Petelo, Yakoba ne Yoano ne kuya nabo ku mutumba walepa. Kampe bwaijile mambo bano banabalume basatu bakunukilenga. Yesu byo alombelenga, waalukile ku meso abo. Batumwa bamwene kilungi kyanji byo kyasamine nobe juba ne bivwalo byanji byatokeletu too nobe kyeya.

Kabiji bantu babiji abo ba “Mosesa ne Elaija” bamwekele ne kutatula kwisamba ne Yesu ‘pa mambo a kufumapo kwanji, ko afwainwe kufikizha ku Yelusalema.’ (Luka 9:30, 31) Kuno kufumapo kwanji kwalumbulwilenga lufu ne lusanguko lwanji lo afumine na kwambapo. (Mateo 16:21) Uno mwisambo wamwesheshe kuba’mba Yesu kechi wakonsheshe kuchinuzhuka alwa lufu lwatama byonka byakebelenga Petelo ne.

Baana banji ba bwanga basatu byo babuukile, bakuminye bingi pa kyo bamwene ne kumvwa. Nangwa kya kuba kino kyajinga kimwesho, Petelo wamwenengatu nobe kya kine, kya kuba waambile’mba: “Labi, kituwamina kwikala ponka pano. Onkao mambo, twayai tupope matente asatu, imo yenu, ikwabo ya kwa Mosesa ne ikwabo ya kwa Elaija.” (Mako 9:5) Nanchi Petelo walangulukilenga’mba kupopa matente kwakonsha kulengela kimwesho kutwajijila nyi?

Petelo byo akyambilenga, jikumbi jabembela jibavwetele ne jiwi jafumine mu jikumbi amba: “Uno ye Mwanami ye natemwa, mo mmwena lusekelo. Mumvwinai.” Batumwa byo baumvwine jiwi ja Lesa, baponene kinkuvumene kabiji baumvwine bingi moyo. Bino, Yesu wibambijile’mba: “Imanai. Kange mube moyo ne.” (Mateo 17:5-7) Byo bainwine mitwe, kafwako nangwa umo ye bamwene ne, pashajiletu Yesu, kabiji kimwesho kyapwile. Juba jalondejilepo byo bakunkulukilenga pa mutumba, Yesu wibakambizhe’mba: “Kange mubuulepo muntu nangwa umotu kino kimwesho ne, poso Mwana muntu akasangulwe mu bafu.”—Mateo 17:9.

Baana ba bwanga byo bamwene Elaija mu kino kimwesho, kibalengejile kwikala na mepuzho. Bashikishe’mba: “Pano mambo ka banembeshi o bambila’mba, Elaija wafwainwa kwiya patanshi?” Yesu wibakumbwile’mba: “Elaija waishile kala, kabiji bantu kechi bamuyukile ne.” (Mateo 17:10-12) Yesu waambilenga pe Yoano Mubatizhi wafikizhe mwingilo waingijilepo Elaija. Yoano wanengezhejile jishinda Kilishitu byonkatu Elaija byo anengezhejile jishinda Elisha.

Kino kimwesho kyakoseshe bingi Yesu ne batumwa banji. Kabiji kyamwesheshenga bikekala Bufumu bwa lukumo bwa Kilishitu. Kiji nobe baana banji ba bwanga bamwene “Mwana muntu saka eya mu Bufumu bwanji,” byonka byalayile Yesu. (Mateo 16:28) Kimye kyo bajinga pa mutumba, ‘bemwenejile na meso lukumo lwanji lukatampe.’ Nangwa kya kuba Bafaliseo bakebele’mba Yesu ebamweshepo kiyukilo kya kumwesha’mba ye ukekala Mfumu Lesa ye asala, bino, Yesu wakaine kwibamwesha kiyukilo. Pano bino, baana ba bwanga ba kwa Yesu bebaswishishe kumona kimwesho kya kwaluka kwa Yesu kyafikizhe bungauzhi bwa Bufumu. Palutwe kacheche, Petelo wanembele’mba: “Tuji na byambo bya bungauzhi byalumbululwa bulongo.”—2 Petelo 1:16-19.