Bamalaika Babena Kwitukwasha
1 “Talai, amiwa nji nenu moba onse, ne kufika ku juba jikapelako.” Bino byambo bitundaika bingi aba bomvwina mukambizho wa kwa Yesu wa kuba’mba: ‘Onkao mambo yainga na kwibasambisha baluke ke baana ba bwanga.’ (Mat. 28:18-20) Jishinda jimo janema jimwesha’mba Yesu uji na bena Kilishitu bakine ke kupichila mu bamalaika banji. (Mat. 13:36-43) Byo kisangajikapo kwambila pamo “mambo awama a myaka ne myaka” na bilengwa bya kishinka bya ku mupashi!—Lum. 14:6, 7.
2 Mu Mwingilo Wetu: Baibolo umwesha’mba bamalaika batumwa “mu kwibengijila mingilo aba bakaswana lupulukilo.” (Hebe. 1:14) Mu myaka kitota kitanshi, bamalaika baingilanga mwingilo wa kutangijila batumwa ba kwa Yesu na kukeba bantu bafwainwa. (Byubilo 8:26) Lelo jino, bakalume ba Lesa batwajijila na kumona lutangijilo lwa bamalaika. Pa bimye byavula, bena mazubo umvwe Kamonyi wibendela bamba’mba balombanga amba bakeye na kwibakwasha. Atweba pamo na bamalaika tusangalala bingi umvwe bano bantu batambwila mambo a Bufumu!—Luka 15:10.
3 Umvwe Twapita mu Makatazho: Danyela, bakwabo Bahebelu bakyanyike basatu, mutumwa Petelo, ne bakwabotu bavula bapitamo kala mu makatazho akilamo kutama bazhikijilwapo kala kwi Yehoba kupichila mu bamalaika banji, “ba bulume bwine bukatampe.” (Sala. 103:20; Da. 3:28; 6:21, 22; Byubilo 12:11) Nangwa kya kuba kimye kimo twakonsha kumvwa nobe kafwako wa kwituzhikijila umvwe twaikala na makatazho, twakonsha kukoseshiwa bingi na byapichilemo yewa kalume wa kwa Elisha byo ayukile’mba “bo tuji nabo atweba bakila boba bo baji nabo abo.” (2 Mfu. 6:15-17) Nangwa kya kuba betwabanya na balongo betu ba bwina Kilishitu kya kwitukanjikizha, kechi twafwainwa kulefulwa ne. Byambo bya Lesa bitulaya’mba: “Malaika wa Yehoba, nobe nsakwa, wibazhokoloka bamwakamwa.”—Sala. 34:7.
4 Katatakatu nzhita ya bamalaika ikafumyepo lupato lonse mu bukalama bwa Kilishitu. (Lum. 19:11, 14, 15) Byo tubena kupembelela joja juba, twayai tutwajijile na kuchinchika ne kutota Yehoba, saka twaketekela kya kine mu lutundaiko lwa bamalaika ba ngovu ba mwiulu bakambizhiwa kwi Kilishitu.—1 Pe. 3:22.