Byambo Bikwabo bya mu Mutanchi wa Kupwila kwa Bwikalo ne Mwingilo
© 2024 Watch Tower Bible and Tract Society of Pennsylvania
MARCH 3-9
BYA BUNEME BIJI MU MAMBO A LESA BYAMBO BYA MAANA 3
Mweshainga byo Mwaketekela mwi Yehoba
ijwbv kibaaba 14 mafu. 4-5
Byambo bya Maana 3:5, 6—“Kange Uketekele mu Milangwe Yobe Ne”
“Ketekela mwi Yehoba na muchima wobe yense.” Tumwesha’mba twaketekela mwi Yehoba inge ke tumukookele mu mbaji yonse ya bwikalo bwetu. Twafwainwa kuketekela Lesa na muchima wetu yense. Mu Baibolo, muchima javula ulumbulula bumuntu bwetu bwa mukachi, ko kuba’mba byo tumvwa, ndangulukilo yetu ne mo tumwena bintu. Onkao mambo, kuketekela mwi Yehoba na muchima wetu yense mwavwangwa byavula, kechi kulumbululatu byo tumvwa ku muchima ne. Kulumbulula bwikalo bo twasalapo na mambo a kushiinwa kuba’mba Mulenga wetu ye wayuka bituwamina.—Loma 12:1.
“Kange uketekele mu milangwe yobe ne.” Twafwainwa kuketekela mwi Lesa, kechi mu ndangulukilo yetu ya bumbulwa kulumbuluka ne. Inge twiketekela atweba bene nangwa ke tufuukule bintu kwesakana na byo tubena kumvwa ku muchima, tukafuukulanga bintu bimwekatu kuwama ku ntendekelo, bino biketuletelela kulutwe. (Byambo bya Maana 14:12; Yelemiya 17:9) Maana etu kechi twakonsha kwiesakanya nangwa pachechetu ku maana a Lesa ne. (Isaya 55:8, 9) Inge maana anji ke etutangijile, bwikalo bwetu bukawama bingi.—Salamo 1:1-3; Byambo bya Maana 2:6-9; 16:20.
ijwbv kibaaba 14 mafu. 6-7
Byambo bya Maana 3:5, 6—“Kange Uketekele mu Milangwe Yobe Ne.”
“Saka umuvuluka mu bintu byonse byo uba.” Twafwainwa kuyuka bikeba Lesa mu mbaji yonse ya bwikalo bwetu ne pa kufuukula bintu bikatampe. Tuba bino kupichila mu kulomba lutangijilo lwanji ne kulondela byaamba Mambo anji Baibolo.—Salamo 25:4; 2 Timoti 3:16, 17.
“Ukakolwela mashinda obe.” Lesa witolwela mashinda etu inge ketukookele mafunde anji aoloka mu bwikalo bwetu. (Byambo bya maana 11:5) Onkao mambo, twafwainwa kuchinuzhukanga bintu bileta meseko.—Salamo 19:7, 8; Isaya 48:17, 18.
Komenaingako ne Kuyilako Palutwe
Na mambo a kuba’mba muntu wapitamo mu bintu byapusana pusana, wakonsha kulanguluka’mba: ‘Napitamo kala mu kikye. Nayuka bya kuba.’ Nanchi kyawama kulanguluka bibye nyi? Byambo bya Mana 3:7 byajimuna’mba: ‘Kechi wilanguluke obe mwine amba: Ne wa maana ne.’ Bintu byo twayuka byafwainwa kwitulengela kuyuka mashinda apusana pusana mwa kubila na bintu mu bwikalo. Pano bino umvwe tubena kukomenako ku mupashi, bintu byo twayuka byafwainwa kwitulengela kulanguluka mu michima yetu kuba’mba tukeba bibusa bya Yehoba pa kuba’mba tubenga bintu bulongo. Onkao mambo, kuyilako kwetu palutwe kechi kumwekela mu kwiketekela atwe bene pa kuba bintu ne, kumwekela mu kuketekela mwi Yehoba kwitutangijila mu bwikalo bwetu. Kumwekela ne mu kuketekela kuba’mba kafwako kyakonsha kumweka kwa kubula aye kwikitabizha ne, kabiji ne kupichila mu kutwajijila kuketekela ne kwikala balunda na Shetu wa mwiulu.
Bishinka Bikwabo Byanema
w06 11/11 9 jifu. 7
Bishinka Bikatampe Kufuma mu Buku wa Byambo bya Mana
3:3. Twafwainwa kwikala na lusa ne bukishinka ne kwibimwesha byonkatu byo twakonsha kumwesha bupela bwa munshingo. Kabiji bino byubilo byafwainwa kwikala mukachi ka muchima wetu.
TAIKO MUCHIMA KU MWINGILO WA KUSAPWILA
Byo Mwakonsha Kumweshai’mba Mwaketekela mwi Yehoba Inge kya Kuba Bantu bo Musapwilako Kechi Bakeba Kufunda Baibolo Ne?
Ketekelainga Mwi Yehoba Mpelo Byo Ibena Kufwenya Pepi
7 Balongo betu bavula bengijila mu mapunzha akebewa kuchinchika. Ngauzhi Yelemiya waingijilepo mu mpunzha ya bino mu kimye kya bufumu bwa bena Yuda mu kimye kyakatezhe bintu. Pa juba pa juba wapitanga mu bintu byaesekanga lwitabilo lwanji mambo wamwesheshe lukokelo kupichila mu kubijika bunchibamambo bwa Lesa. Kimye kimo, munembeshi wanji wakishinka Baluka, wijizhañenye mambo wakokele. (Yele. 45:2, 3) Nanchi Yelemiya wabwelele panyuma mambo a kumulefula nyi? Pa kimye kimo waumvwanga bulanda. Waambile amba: “Aja juba jo nasemenwemo jifingwe! Nanchi mambo ka o nalupukijile munda mu kuba mingilo yakosa ne kwikala na bulanda, ne kwikala na bumvu mu moba onsetu a mweo wami?”—Yele. 20:14, 15, 18.
8 Pano bino Yelemiya kechi walekele ne. Watwajijile kuketekela mwi Yehoba. Kyafuminemo ke kya kuba’mba, uno ngauzhi wakishinka wamweneko byafikile bungauzhi bwa kwa Yehoba bwanembwa pa Yelemiya 17:7, 8 bwaamba amba: “Watokwa awa waketekela mwi Yehoba, ne luketekelo lwanji luji mwi Yehoba yenka. Awa muntu uji pamo nobe kichi kyo bajimba ku mema, kitwala mizhazhi yakyo kumukola, pa kwiya kyuya kechi kichina ne, mambo mabula akyo ekalatu kasa afita bulongo, kabiji kechi kyuba kijikila pa kwiya mwaka wa kyashi ne, nangwa kuleka kupanga bipangwa ne.”
9 Byonka biji kichi kyafita bulongo kipanga bipangwa “kyo bajimba ku mema” nangwa mu bujimi bwa ntekezha, ne Yelemiya naye kechi ‘walekele kupanga bipangwa ne.’ Wakaine kulondela milanguluko yatama ya bantu bamyendeleko ba mu oa moba. Aye watwajijile kulondela Nsulo ya “mema” a bumi ne kulama byonse bya mubulanga Yehoba. (Tangai Salamo 1:1-3; Yele. 20:9) Yelemiya wajinga wakumwenako wawama bingi kwi atweba, kikatakata ku boba bengijila Lesa mu mapunzha akatazha. Umvwe byo byo kiji ne kwi anweba, twajijilai kuketekela kya kine mwi Yehoba, kabiji ukemukwasha kuchinchika kimye kyo mupanga ‘bipangwa bya pa bya tunwa byenu bitota jizhina janji.’—Hebe. 13:15.
10 Pa kuba amba tuchinchike makatazho mu ano moba apelako, Yehoba witupa bintu byavula bingi byakonsha kwitukwasha kushinda makatazho o tupitamo. Pa bintu byo etupa paji ne Mambo a Lesa abena kutuntululwa bulongo mu milaka yapusana pusana. Upana kajo kavula pa kimye kyafwainwa kupichila mu jibumba ja kalume wakishinka kabiji wa maana. Kabiji witupa ne bakwetu ba mu lwitabilo bavula bo tupwanañana nabo betukwasha pa kupwila kwa kipwilo ne kupwila kukatampe. Nanchi mwingijisha bulongo luno lunengezho nyi? Aba balondela luno lunengezho “bakembanga na mambo a lusekelo lwa mu michima yabo.” Pakuba aba bakankalwa kuteleka ku bibabula Lesa ‘bakatama miteto na mambo a misongo ya mu michima yabo, ne kuwowakana na mambo a kumanama kwa michima yabo.’—Isa. 65:13, 14.
MARCH 10-16
BYA BUNEME BIJI MU MAMBO A LESA BYAMBO BYA MAANA 4
“Lama Muchima Wobe”
Mwakonsha Kuzhikijila Byepi Muchima Wenu?
4 Pa Byambo bya Maana 4:23, kyambo kya “muchima” bekingijisha kulumbulula ‘muntu wa mukachi’ nangwa’mba ‘mukachi mwafyamika.’ (Tangai Salamo 51:6 ne tubyambo twa munshi.) Mu ñambilo ikwabo, “muchima” ulumbulula milanguluko yo twikala nayo, byo tumvwa, bintu byo tukeba kuba ne byo tukeba kwikala nabyo. Ko kuba’mba muchima ulumbulula byo tuji mukachi bibula kumweka ku bantu.
Mwakonsha Kuzhikijila Byepi Muchima Wenu?
10 Pa kuba’mba tuzhikijile bulongo muchima wetu, twafwainwa kuyuka bintu byakonsha kumubika mu kizumba ne kwibichinuzhuka bukiji bukiji. Kyambo kyatuntululwa’mba “lama” pa Byambo bya Maana 4:23 kituvululamo mwingilo waingilanga bakasopa. Mu moba a Mfumu Solomone, bakasopa baimananga peulu ya nsakwa ya muzhi ne kujimunako bantu inge bamona balwanyi na kwiya. Kulanguluka pa kino kwitukwasha kuyuka byo twafwainwa kuba pa kuba’mba twizhikijile ku milanguluko ya kwa Satana.
11 Mu kimye kya kala, bakasopa baingijilanga pamo na balamanga bibelo bya muzhi. (2 Sam. 18:24-26) Bakasopa baikalanga peulu ya nsakwa ne balamanga bibelo baingijilanga pamo pa kuba’mba bazhikijile muzhi kupichila mu kushinka binzhilo inge balwanyi ke beye. (Ne. 7:1-3) Jiwi jetu ja mu muchimab jo twafunjisha na Baibolo jakonsha kwingila nobe kasopa ne kwitujimunako inge Satana ke akebe kubika milanguluko yatama mu muchima wetu. Kimye kyonsetu inge jiwi jetu ja mu muchima jitujimunako, twafwainwa kwijumvwina ne kushinka binzhilo, ko kuba’mba kuchinuzhuka bintu byatama.
Mwakonsha Kuzhikijila Byepi Muchima Wenu?
14 Pa kuba’mba tuzhikijile muchima wetu, kechi twafwainwa kupelelatu pa kushinka binzhilo ku milanguluko yatama ne, bino twafwainwa ne kwibishinkwila ku milanguluko yawama. Langulukai jibiji pa nsakwa ya muzhi yo twajikwambapo kala. Kalama wa kibelo washinkanga binzhilo inge balwanyi ke beye, bino pa bimye bikwabo washinkulanga binzhilo pa kuba’mba batwezhe mu muzhi kajo ne bintutu bikwabo byakebewanga. Inge kechi bashinkulanga binzhilo ne, bantu mu muzhi inge bafwanga ku nzala. Ne atweba kyo kimotu, twafwainwa kushinkulanga muchima wetu kimye kyonse pa kuba’mba milanguluko ya Lesa itwelengamo.
“Lama Muchima Wobe!”
Mambo ka o twafwainwa kulamawizhizhanga muchima wetu wa kifwanyikizho? Lesa waambijile Mfumu Solomone kunemba’mba: “Lama muchima wobe kukila byonse byo ulama; mambo mu muchima mo mufuma bwikalo bwa muntu.” (Byambo bya Mana 4:23) Bwikalo bwetu luno ne bwa kulutwe bwaimena pa biji muchima wetu wa kifwanyikizho. Mambo ka? Mambo Lesa umona biji mu muchima wetu. (1 Samwela 16:7) Bumuntu bwetu bwa mukachi, “muchima” wetu ye ulengela Lesa kwitutala bulongo nangwa ne—1 Petelo 3:4.
Bishinka Bikwabo Byanema
Nanchi Mubena Kupembelela Yehoba Nyi?
4 Byambo bya Maana 4:18 bitubuula’mba “jishinda ja baoloka jiji nobe kyeya kya lukelo kiya na kusama ne kusamisha kufikatu ne pa kushinkamana juba.” Abino byambo bimwesha kuba’mba Yehoba ukwasha bantu banji kuyuka kyaswa muchima wanji pachepache. Nangwa byonkabyo, akino kyepelo kyakonsha kwingila ne ku mwina Kilishitu byo apimpula bwikalo bwanji ne kufwenya kwipi ne Yehoba. Kafwako muntu wakonsha kufikenatu kwikala na bulunda bwakosa na Lesa ne, papita kimye. Inge twateshako muchima kufunda ne kwingijisha lujimuno luji mu Mambo a Lesa ne lujimuno lufuma ku jibumba janji, pachepache tukatendeka kwikala na byubilo bya Kilishitu. Kabiji tukamuyuka bulongo Lesa. Monai Yesu byo alumbulwile kino kishinka.
TAIKO MUCHIMA KU MWINGILO WA KUSAPWILA
Mambo ka o Babujila Kusekelela Kusanguka kwa kwa Yesu?
ijwfq kibaaba 19
Mambo ka o Babujila Kusekelela Kusanguka kwa kwa Yesu?
Byayuka bantu bavula
Bayuka’mba: Bakamonyi ba kwa Yehoba kechi bena Kilishitu ne, o ene mambo o babujila kusekelela kusanguka kwanji.
Kishinka: Twaitabila amba Yesu Kilishitu Mupulushi wetu kabiji twingila papelela bulume bwetu ‘kulondela bulongo mu ngayo yanji.’—1 Petelo 2:21; Luka 2:11.
Bayuka’mba: Bakamonyi ba kwa Yehoba Kechi baitabila amba Yesu wasangwilwe ne.
Kishinka: Twaitabila amba Yesu wasangwilwe. Twayuka’mba bino byo byaitabila bena Kilishitu kabiji bino byo byo tusapwila.—1 Kolinda 15:3, 4, 12-15.
Bayuka’mba: Bakamonyi ba kwa Yehoba kechi batemwa baana babo ne, mambo kechi basaka amba basangalalenga pa juba Jasangukile Yesu ne.
Kishinka: Twatemwa baana betu. O ene mambo o twatelapo muchima kwibafunjisha ne kwibakwasha kwikala ba lusekelo.
Mambo ka Bakamonyi ba kwa Yehoba o babujila kusekelela kusanguka kwa kwa Yesu?
● Baibolo kechi waambapo pa kusekelela Kusanguka kwa kwa Yesu ne.
● Yesu wakambizhe amba tuvulukenga lufu lwanji, kechi kusanguka kwanji ne. Tuvuluka lufu lwanji pa mwaka pa mwaka kulondela kalenda wa mu Baibolo.—Luka 22:19, 20.
● Twaitabila amba bisho bya lusemo byalondelanga bantu kala ko kwafuma kusekelela Kusanguka kwa kwa Yesu. Bino byalengela kusekelela kusanguka kwa kwa Yesu kubula kwitabilwa kwi Lesa. Lesa ‘ukeba bantu kumwingijilatu bunke bwanji,’ kabiji umvwa kutama ku muchima umvwe saka tuvwangamo bintu byo abula kwitabizha pa kumupopwela.—Kulupuka 20:5; 1 Bamfumu 18:21.
Twaketekela kuba’mba kufuukulapo kubula kusekelela Kusanguka kwa kwa Yesu kwa mu binembelo kabiji kwitukwasha kwingijisha “maana alumbuluka ne maana a kupima bintu” mu kifulo kya kulondela mizhilo ya bantu. (Byambo bya Mana 3:21; Mateo 15:3) Nangwa kya kuba pa bimye bimo twisamba na bantu pa bintu byakunza Kusanguka kwa kwa Yesu, umvwe betwipuzha tunemeka kyonse kyafuukulapo muntu mwine.—1 Petelo 3:15.
MARCH 17-23
BYA BUNEME BIJI MU MAMBO A LESA BYAMBO BYA MAANA 5
Chinuzhukainga Bulalelale
w00 7/15 29 jifu. 1
Mwakonsha Kwikala Babula Bubipisho mu Ntanda Mwavula Bulalelale
Mu buku wa Byambo bya Maana, mwanamukazhi wa byubilo byatama bamutela’mba “mwanamukazhi mwenyi,” ko kuba’mba pite. Byambo byanji byamulambisha byo amba pa kongola banabalume byatobala nobe jipuma ja buki ne kuwama nobe manyi a maolivi. Nanchi kechi byobyo kikala ku bavula bobongola kuba bulalelale nenyi? Byobyo kyajinga ne kwi Amy, nsongwakazhi wa myaka 27 walamba bingi waingilanga mingilo ya bunembeshi. Washimikizhe’mba: “Kuji mwanamulume umo ku nkito wanta bingi muchima kabiji watemwa bingi kuntakaika kimye kyonse. Tumvwa bulongo kwituta muchima. Bino namwene’mba waimanatu pa kukeba kuñongola kuba’mba nkobe nanji bulalelale. Kechi nkongolwa na byo oba ne.” Byambo byamulambisha byumvwanyika bingi bulongo, kanatu inge wayuka bukiji kibena kulengela yewo muntu kwamba byobyo byambo. Onkao mambo, twafwainwa kwikala na maana a kupima bintu.
w00 7/15 29 jifu. 2
Mwakonsha Kwikala Babula Bubipisho mu Ntanda Mwavula Bulalelale
Bifuma mu kuba bulalelale byalulatu nobe kavungundeya kabiji byatwa nobe mpoko yatwa kubiji. Mufuma kalulu kuvimba meso ne misongo itwala ku lufu. Bintu bimo byatama bifumama ke kwituyanjisha ku jiwi ja mu muchima, kupula memi, nangwa kusambula bikola. Kabiji akilangulukai pa kuno kubula bukishinka byo kukozha ku muchima mukwabo wa mu masongola. Bulalelale bukozha bingi ku muchima kine kya kuba ufwatu nakyo. Bulalelale bwatama bingi.
w00 7/15 29 jifu. 5
Mwakonsha Kwikala Babula Bubipisho mu Ntanda Mwavula Bulalelale
Twafwainwa kuchinuzhukanga kwitongola ku bantu ba bulalelale. Mambo ka o twafwainwa kulekela muchima wetu waongolwa na nyimbo yabo, na kutamba bitundaika byubilo byatama nangwa na mambo a kutamba bya mulekese? (Byambo bya Maana 6:27; 1 Kolinda 15:33; Efisesa 5:3-5) Kabiji kinetu kusengula nabo nangwa kuvwala byabula kufwainwa bibongola ke bumbulwa maana bingi!—1 Timoti 4:8; 1 Petelo 3:3, 4.
Bishinka Bikwabo Byanema
w00 7/15 29 jifu. 7
Mwakonsha Kwikala Babula Bubipisho mu Ntanda Mwavula Bulalelale
Solomone waambile pa byatama bifuma mu kuba bulalelale. Kuba bukende kupwisha munema wa muntu ne kumusebanya. Nanchi kukebatu kupwisha kikala kya kwilaala nangwa kukebatu kumvwisha bulongo muntu kechi kwilengulwishatu obewa mwine nenyi? Nanchi kulaala na muntu wabula mukwenu wa mu masongola kechi kwilengulwishatu nenyi?
MARCH 24-30
BYA BUNEME BIJI MU MAMBO A LESA BYAMBO BYA MAANA 6
Ñanyi Bintu byo Tufunjilako ku Tuzhengekene?
it-1 115 mafu. 1-2
Kazhengekene
‘Maana a Kisemwa.’ Tuzhengekene kechi twingijisha maana a kufunda ne, pa kuba twingijisha ‘maana’ a kisemwa o betulenga nao. Baibolo waamba pa tuzhengekene amba ‘Tunengezha kajo kato mu kimye kya kisalo, kabiji tubungizha kajo kato mu kimye kya kunowa.’ (Man 6:8) Ku Palestine kuji mitundu ya tuzhengekene yapusa pusana, nabiji tutelwa’mba Messor semirufus tubungizha nchaacha yavula mu kimye kya kisalo ne kimye kya mwela wa mebele ya kuja mu bañondo ba mashika kimye kikatazha bya kuja. Tuno tuzhengekene javula tutanwa kimye bantu kyo bapuula kajo mambo kyo kimye kivula ntetele ne nchaacha. Inge mvula wanoka ne kulengela mo tubika kajo kuzoba, tuno tuzhengekene tutunta kajo ne kutwala pa mute kuba’mba kano kajo koome, kabiji tufumyako ne misele ku kano kajo kuba’mba kabule kumena. Tuno tuzhengekene tulenga mashinda awama kabiji pa mena ato javula pekala bipu bya ntetele.
Byo Tufunjilako ku Byubilo Byato. Kumona byuba tuzhengekene kwitulengela kushiinwa na byaamba Baibolo kuba’mba: “Obewa nkope, yanga ku tuzhengekene; umone byo twingila, ufunjileko maana.” (Man 6:6) Kechi tufunjilatu ku byo tunengezhezha kajo jimo ne, bino ne ku byo twingila na ngovu ne na mukoyo pa kusenda kajo kanema kukila mibiji yato. Twingila papelela bulume bwato kupwisha mwingilo wato. Nangwa kya kuba pa kimye kimo twakonsha kupona nangwa kutezhimuka, bino twibikako kujimba pa kwenda na byanema. Twingijila pamo kulama bulongo mo twikala ne kukwasha tukwabo twikozha nangwa twakooka kwitubwezha mo tulaala.
w00 9/15 26 mafu. 3-4
Lamawizhai Jizhina Jenu
Twakonsha kwingilanga byepi na ngovu byonkatu byuba tuzhengekene? Kwingila na ngovu kwawama bingi nangwa kya kuba paji babena kwitusopa nangwa ne. Twafwainwa kwingilanga na ngovu ku sukulu, ku nkito ne pa kwingijila Yehoba. Byonkatu kazhengekene byo kamwenamo mu kwingila na ngovu, ne atweba Lesa ukeba’mba ‘tusangalelenga mu mingilo yetu yonse.’ (Musapwishi 3:13, 22; 5:18) Muntu utondwa ne kwikala na jiwi ja mu muchima jawama na mambo a kwingila na ngovu.—Musapwishi 5:12.
Solomone wangijishe mepuzho abiji kwamba pa muntu ubula kwingila na ngovu amba: “Bimye binga, obewa nkope, byo ukalaala? Ñanyi kimye kyo ukabuuka?” Kabiji uno mfumu wanungilepo amba: “Inge wauba’mba ndaaleko pacheche, nsendalaaleko pacheche, mvungeko maboko pacheche ne kukokolokako, buyanji bukakufikilatu nobe ngivi, ne kukajilwa kukakufikilatu nobe muntu uji na kilwilo.” (Byambo bya Maana 6:9-11) Na mambo a kutemwa kukookoloka, nkope buyanji bumufikila kabiji ukajilwatu nobe bamulukukile ku muntu uji na bilwilo. Mu bujimi bwa nkope mukumbanatu nseku ne miba. (Byambo bya Maana 24:30, 31) Busulu bwanji buzhiyatu nobe mu kukopa kwa jiso. Nanchi mukulumpe wa nkito wakonsha kutalangapotu pa wa mwingilo nkope nyi? Nangwa mwana wa sukulu wakonsha kuba bulongo pa mpeso inge kya kuba kechi utanga nenyi?
Bishinka Bikwabo Byanema
w00 9/15 27 jifu. 3
Lamawizhai Jizhina Jenu
Bintu bitanu na bibiji byo baambapo mu Byambo bya Maana bimenako bintu byonse byatama. “Meso a bwitote” ne “muchima ulanguluka kuba byatama” ke mambo alengwa kupichila bilanguluka bantu. “Lujimi wamba bya bubela” ne “kamonyi wa bubela, yenka ubepa mu byonse byo amba” ke mambo alengwa kupichila mu byambo. “Maboko echila mashi a bantu babula mambo” ne “maulu anyemena kuba bubi” ke mambo a bumbanzhi alengwa kupichila mu byubilo. Kabiji Yehoba washikwa kikatakata muntu ubuusha lutoobo pa bantu bakeba kwikala pamo mu mutende. Kunungako kufuma pa bitanu na kimo kuya ku bitanu na bibiji kumwesha kuba’mba bino kechi byobyonkatu bintu byatama bifichisha Lesa ku muchima ne, mambo ne luno bantu bakyubilapotu ne byatama bikwabo.
MARCH 31–APRIL 6
BYA BUNEME BIJI MU MAMBO A LESA BYAMBO BYA MAANA 7
Chinuzhukainga Kwibika mu Lweseko
w00 11/15 29 jifu. 5
“Lama Mikambizho Yami pa Kuba’mba Wikale Myaka Yavula.”
Kipenze pa tajilenga Solomone kyajinga na meso meso, kyamweka bapikwilepo bulongo ne ku mbaji kwajinga mapulanga o basonga bulongo. Kimye kya muntuwa muntuwa byo payilenga na kufiita wamwene nsongwalume wakosama kabiji wabula maana na kupita mu mukwakwa wajinga na mansanga. Kyamweka wayukile bitanwa mu uno mukwakwa kabiji ne byakonsha kumumwekela. Uno nsongwalume wapichilenga mu mukwakwa watajile kwajinga nzubo ya mwanamukazhi. Uno mwanamukazhi ye ñanyi? Kabiji ñanyi kintu kyo akebelenga?
w00 11/15 30 mafu. 4-6
“Lama Mikambizho Yami pa Kuba’mba Wikale Myaka Yavula.”
Uno mwanamukazhi wamba byambo bya mulambisha. Ye kalokwete kabiji kechi uji na bumvu ne. Waambilenga byambo byakujimbaika nsongwalume kuba’mba amongole. Byo aambile kuba’mba naji kutapisha kitapisho kya mutende ne kufikizha byo nachipile, wakebelenga kumwesha’mba waoloka kabiji wakamwa Lesa. Pa kupana kitapisho kya mutende pa nzubo ya Lesa mu Yelusalema bapananga, nyama, bunga bwalamba, manyi, ne binyu. (Bena Levi 19:5, 6; 22:21; Kubala 15:8-10) Na mambo a kuba’mba wapananga uno mulambo naye wajangako, walumbulwilenga kuba’mba ku nzubo yanji kuji kajo kavula ne binyu. Mu byo aambilenga walumbulwilenga’mba uno nsongwalume usakwiyowa kabiji walangulukilenga amba waji kwiyatu na kusenda yenkaye. Byambo byaingijishe onu mwanamukazhi bya mongwele. Shayuka umo wa Baibolo waambile’mba. “Ibyo kuba’mba kuji ye akebelenga, pano nanchi kya kine kuba’mba wakebelengatu yenka uno nsongwalume nyi? Kulanguluka bino ke bumbulwa maana.”
Byo amongwele na mambo a mvwajilo yanji, byambo bya mulambisha, kumukumbachilamo, ne kumufyompa. Uno pite waingijishe ne binunka bulongo pa kongola uno nsongwalume. Waambile’mba: “Naanshika kala bisapi byawama pa mwanya wami, bisapi bya linenyi bya musombelo wawama bya ku Ijipita. Pa mwanya wami, nasansapo kala mola, manyi a maalo ne kinamonyi.” (Byambo bya Maana 7:16, 17) Waanshikile mwanya wanji na bisapi linenyi byawamisha bya ku Ijipita ne kusansapo binunka bulongo, mola, manyi a maalo, ne kinamonyi.
Uno mwanamukazhi watwajijile kwamba’mba, “Twaya, twisangajike na butemwe kufikatu ne lukelo; twaya twiyowe butemwe.” Kuno kechi kwajingatu kumwita ku kajo konkatu ne. Bino wamwichilenga ne kuba’mba alale nanji. Uno nsongwalume waumvwine bingi bulongo pa byo amubujile! Kabiji wanungilepo’mba: “Mambo bamwatawami bafwapo pa nzubo; baaya kwalepa bingi. Basendele ne kikwama kya mali, kabiji bakabwelatu pa kutentama ñondo.” (Byambo bya Maana 7:18-20) Wamubujilenga’mba kafwako kyo bafwainwe kuchina ne, mambo bamwatawanji bayile na kuba busulu kwalepa kabiji kechi bakabwela bukiji ne. Uno mwanamukazhi waongwele nsongwalume! “Wamujimbaikile na byambo byavula bya kumwitabisha. Kabiji wamongwele na byambo byanji bya mulambisha.” (Byambo bya Maana 7:21) Pa kuba’mba ushinde luno lweseko kanatu inge uji byonka byajinga Yosefwa. (Ntendekelo 39:9, 12) Nanchi uno nsongwalume byo byo ajinga nyi?
w00 11/15 31 jifu. 2
“Lama Mikambizho Yami pa Kuba’mba Wikale Myaka Yavula”
Uno nsongwalume wakankelwe kushinda luno lweseko. Bamongwele muchima kabiji watendekele kumulondela ‘byonka biya ñombe kwa kumwipayila.’ Byonkatu bikala muntu ye bakasa na minyololo, ne uno nsongwalume byo byo akankelwe kushinda luno lweseko. Kechi wayukile’mba ubena kwibika mu kizumba ne, kufikatu ne ‘muketo byo amwashile mu jichima,’ ko kuba’mba kufikatu byo bamwipayile. Mu kuba bulalelale mufuma lufu na mambo a bikola bisambukilañana. Uba bino onauna bulunda bwanji ne Lesa kabiji ‘kukamwipayisha.’ Bwikalo bwanji bonse bonaika kabiji ubika bumi bwanji mu kizumba na mambo a kuba’mba walenga mambo kwi Lesa. Kabiji uponena mu kitewa kya lufu, byonkatu kañonyi byo kaya lubilo mu kakose!
Bishinka Bikwabo Byanema
w00 11/15 29 jifu. 1
“Lama Mikambizho Yami pa Kuba’mba Wikale Myaka Yavula”
Solomone watwajijile kwamba pa mikambizho yanji amba, “Wibikashile ku minwe yobe; wibinembe pa muchima wobe.” (Byambo bya Maana 7:3) Byonkatu byo tumona minwe yetu kimye kyonse ne byo itukwasha kwingila mingilo yapusana pusana, byo biji ne bintu byo tufunda mu Binembelo nangwa’mba mu Baibolo, nabyo byafwainwa kwituvululangamo ne kwitutangijilanga kimye kyonse mu byonse byo tuba. Twafwainwa kwibinemba pa michima yetu ne kwibilondelanga mu bwikalo bwetu bonse.
APRIL 7-13
BYA BUNEME BIJI MU MAMBO A LESA BYAMBO BYA MAANA 8
Yesu ye ye Batela’mba Maana
“Nebatemwa Batata”
7 Mu kyepelo 22, Maana aamba’mba: ‘Yehoba mwine ye wandengele kwikala ntatwilo ya bintu, kasa akyangye kwingila mingilo yanji itanshi kala kene.’ Maana afwainwa abena kulumbulula kintu kikwabo mambo kino kyubilo kechi ‘kyalengelwe’ ne. Maana kechi aji na ntendekelo ne, mambo Yehoba wa kala kene kabiji kimye kyonse wa maana. (Salamo 90:2) Pano bino, Mwana Lesa ‘ye mubeji wa pa bilengwa byonse.’ Aye wajinga na ntatwilo nangwa’mba bamulengele; ye wajinga mutanshi pa bintu byonse byalengele Yehoba. (Kolose 1:15) Aye Mwana wajinga konka ntanda ne meulu saka bikyangye kulengwa byonka byo kyalumbululwa mu Byambo bya Mana. Byo aji Mambo, ko kuba’mba wakumwambilako Lesa, aye ye walumbuluka mu kumwesha maana a Yehoba.—Yoano 1:1.
“Nebatemwa Batata”
8 Mwana saka akyangye kwiya panopantanda, waubilenga ka kimye kyalengelwenga bintu bikwabo? Kyepelo 30 kitubula’mba, aye wajinga ne Lesa nobe “sendwe mwine.” Nanchi kino kilumbulula ka? Mu Kolose 1:16 balumbululamo’mba: ‘Mwi aye mo mwalengelwe byonse, ne bya mwiulu ne bya panopantanda . . . Byonse byalengelwe mwi aye, ne kulengwa byalengejilwe aye yenka.’ Onkao mambo, Yehoba aye Mulenga, waingijishe Mwananji, Sendwe Mwine pa kulenga bilengwa byonse kutendekelatu ku bilengwa bya mupashi biji mwiulu, jiulu, ntanda muji bichi byapusana pusana ne banyama ba mitundu ne mitundu, kubikapotu ne bantu bilengwa bya maana. Mu jishinda jikwabo, twakonsha kupashañanya kuno kukwatankana kuji pakachi ka Shanji ne Mwana ku muntu mwine ulenga bintu ne yewa ye engijisha. Umvwe twakumya pa bintu byonse byo alenga, ko kuba’mba tubena kupa lukumo mwine wibilengele. (Salamo 19:1) Pano bino, twakonsha ne kuvuluka Mulenga ne “sendwe mwine” wanji byo bakwatankana bulongo pa myaka ya kukankalwa kubala.
9 Umvwe bantu bambulwakoloka babiji ke bengijile pamo, javula kibakatazha bingi kumvwañana. Kino kechi byo byo kiji kwi Yehoba ne Mwananji ne! Mwana waingijile na Shanji pa myaka yavula bingi ne kwikala wa ‘lusekelo ku meso anji moba onse.’ (Byambo bya Maana 8:30) Ee, wasekejilemo kwikala pamo na Shanji, kabiji bonse bubiji bwabo bakwatankene bingi. Pachepache Mwana wafunjilenga bintu byavula bingi ne kwikala na byubilo bijipo ne Shanji. O ene mambo, bulunda bwajinga pakachi ka Shanji ne Mwana o bwakosejile! Kya kine, buno butemwe bwakonsha kwambiwa’mba bwa kala kene bwakosa mu kulengwa konse.
Kuyuka Yesu, Davida Mukatampe Kabiji Solomone Mukatampe
14 Muntutu umo ye wakijile Solomone maana. Uno wajinga Yesu Kilishitu, awo wilumbulwile kwikala “Wamukila Solomone.” (Mat. 12:42) Yesu waambile “byambo bya bumi bwa myaka.” (Yoa. 6:68) Kya kumwenako, jashi ja pa mutumba janungileko mafunde a mu byambo bya maana bya kwa Solomone. Solomone waambile bintu byavula bileta lusekelo ku bapopweshi ba Yehoba. (Man. 3:13; 8:32, 33; 14:21; 16:20) Yesu waambishepo bingi’mba lusekelo lwa kine lufuma mu bintu byalamata mpopwelo ya Yehoba ne kufika kwa milaye ya Lesa. Waambile’mba: “Bata muchima ku mupashi bo batokwa mambo bufumu bwa mwiulu bo bwabo.” (Mat. 5:3) Aba bengijisha mafunde aji mu lufunjisho lwa kwa Yesu bafwenya kwipi ne Yehoba, “nsulo ya bumi.” (Sala. 36:9; Mana. 22:11; Mat. 5:8) Kilishitu wimenako ‘maana a Lesa.’ (1 Ko. 1:24, 30) Byo aji Mfumu wa Bumesiasa, Yesu Kilishitu ye ‘mupashi wa maana.’—Isa. 11:2.
Bishinka Bikwabo Byanema
Nanchi Mumvwa ‘Maana byo Abena Kwita Nyi’?
▪ Buku wa The World Book Encyclopedia waamba pa Baibolo amba “ye buku ye basapanya bingi mu byalo byavula, kabiji bamutuntulula pa bimye byavula mu milaka yavula kukila mabuku onse.” Baibolo bamutuntulula yense nangwa lubaji lumo mu milaka kukila pa 2,600, ko kuba’mba bantu bavula mwaya ntanda bakonsha kumutanga mu mulaka wabo.
▪ Kabiji maana ‘abijika’ ne kimye kyo tusapwila mambo awama. Pa Mateo 24:14 tutangapo’mba: “Ano mambo awama a Bufumu bakeasapwila pano pa ntanda ponse kwikala bukamonyi ku bisaka byonse bya bantu, apa bino mpelo ikafike.”
TAIKO MUCHIMA KU MWINGILO WA KUSAPWILA
Mambo ka Yesu o Atelelwa’mba Mwana Lesa?
ijwbq kibaaba 160
Mambo ka Yesu o Atelelwa’mba Mwana Lesa?
Mukumbu wa mu Baibolo
Baibolo javula utela Yesu amba “Mwana Lesa.” (Yoano 1:49) Byambo bya kuba amba “Mwana Lesa” bimwesha kuba’mba Lesa ye Mulenga, nangwa’mba ye Nsulo ya bumi bonse, kubikakotu ne bumi bwa kwa Yesu. (Salamo 36:9; Lumwekesho 4:11) Baibolo kechi ufunjisha amba Lesa waikele na mwana byonka bantu byo basema baana ne.
Baibolo utela ne bamalaika amba “baana ba Lesa.” (Yoba 1:6) Kabiji Baibolo waamba’mba muntu mutanshi, aye Adama, wajinga “mwana wa kwa Lesa.” (Luka 3:38) Nangwa byonkabyo, Lesa walengele Yesu patanshi kabiji ye yenkatu yeelengejile mwine, o ene mambo Baibolo o atelela Yesu amba Mwana Lesa wakila.
● Nanchi Yesu waikalanga mwiulu saka akyangye kusemwa pano pa ntanda nyi?
● Ñanyi mwingilo waingilanga Yesu saka akyangye kwiya pano pa ntanda?
Nanchi Yesu waikalanga mwiulu saka akyangye kusemwa pano pa ntanda nyi?
Ee. Yesu wajinga kilengwa kya mupashi mwiulu saka akyangye kusemwa pano pa ntanda. Yesu aye mwine waambile’mba: “Amiwa nafuma mwiulu.”—Yoano 6:38; 8:23.
Lesa walengele Yesu saka akyangye kulenga bintu byonse. Baibolo walumbulula Yesu amba:
● “Aye ye . . . mubeji wa bilengwa byonse.”—Kolose 1:15.
● Aye ye “ntendekelo ya bilengwa bya Lesa.”—Lumwekesho 3:14.
Yesu wafikizhe bungauzhi bwaamba pa mwine uji na “Ntendekelo yanji ya kala kene, kufumatu ku moba a kala.”—Mika 5:2; Mateo 2:4-6.
Ñanyi mwingilo waingilanga Yesu saka akyangye kwiya pano pa ntanda?
Wajinga na kifulo kikatampe mwiulu. Wajinga na kifulo kikatampe mwiulu. Yesu waambile pa kino kifulo byo alombele’mba: “Tata, ntumbijikai na lukumo lo najinga nalo nenu saka mukyangye kulenga ntanda.”—Yoano 17:5.
Wakwashisheko Shanji kulenga bintu byonse. Yesu waingijilanga pamo ne Lesa nobe “sendwe wanji.” (Byambo bya Maana 8:30) Baibolo walumbulula Yesu amba: “Bintu byonse byalengelwe kupichila mwi aye, bya mwiulu ne bya pano pa ntanda.”—Kolose 1:16.
Lesa waingijishe Yesu kulenga bintu byonse biji pano pa ntanda. Mu bintu byalengele Lesa mwavwangwa ne bamalaika ne bya mwiulu. (Lumwekesho 5:11) Yehoba Lesa ne Yesu baingijijile pamo pa kulenga bintu, byonkatu byo kikala pa kushimika, sendwe wingijila pamo na bantu bakwabo. Sendwe wibabuula bya kuba pa kushimika kishimikwa, kepo nabo balondela byo ebamubuula.
Wajinga Mambo. Yesu saka akyangye kwiya pano pa ntanda, Baibolo waamba’mba wajinga, “Mambo.” (Yoano 1:1) Kino kilumbulula’mba Lesa yeye aingijishanga pa kubuula bilengwa bikwabo bya mupashi mikambizho.
Kabiji Lesa wamwingijishe Yesu kumwambilako ku bantu bekala pano pa ntanda. Lesa waingijishe Yesu pa kupana mikambizho kwi Adama ne Evwa mu bujimi bwa Edena. (Ntendekelo 2:16, 17) Kyamweka Yesu ye wajinga yewa malaika watangijilenga bena Isalela ba kala mu kiselebwa kabiji ye wajinga mwina jiwi bena Isalela jo bafwainwe kukokela.—Kulupuka 23:20-23.*
*Yesu nangwa’mba Mambo kechi ye yenkatu Lesa ye aingijishe pa kwisamba na bantu ne. Pa kupana Mizhilo ku bena Isalela, Lesa kechi waingijishe Mwananji Mubeji ne. Waingijishe bamalaika bakwabo.—Byubilo 7:53; Ngalatiya 3:19; Bahebelu 2:2, 3.
APRIL 14-20
BYA BUNEME BIJI MU MAMBO A LESA BYAMBO BYA MAANA 9
Ikalai ba Maana, Kechi Bamwenga Ne
‘Umvwainga Byamba Bantu ba Maana’
4 Kwambatu kine, kechi kyapeela kuswa lujimuno kufuma ku mukwetu ne. Bimye bimo twakonsha ne kuzhingila. Mambo ka? Mambo nangwa kya kuba twayuka’mba twi bambulwa kulumbuluka, bino kyakosha kwitukatazha kuswa lujimuno inge mukwetu witubuula kintu kyo twalubankanya. (Tangai Musapwishi 7:9.) Twakonsha kwibingisha atweba bene. Twakonsha kuzhinauka kine kintu kyalengela yewo muntu kwiya na kwitupa lujimuno, nangwa kumuzhingijila pa jishinda jo etupelamo lolo lujimuno. Twakonsha ne kulengulula muntu witupa lujimuno ne kulanguluka’mba: ‘Ñanyi wamupa luusa lwa kwiya na kumpa lujimuno? Ne aye ulubankanya!’ Kabiji inge kechi twaumvwa bulongo pa lujimuno lo betupa ne, twakonsha kwilulengulula nangwa kukebako muntu mukwabo wakonsha kwitupa lujimuno lo tukeba kumvwa.
‘Umvwainga Byamba Bantu ba Maana’
12 Ki ka kyakonsha kwitukwasha kuswa lujimuno? Twafwainwa kwipelula ne kuvulukanga’mba twi bambulwa kulumbuluka kabiji bimye bimo tutamisha bingi. Byonka byo twaambapo kala, Yoba waikele na milanguluko yatama. Bino palutwe kacheche wapimpwile ndangulukilo yanji, kabiji Yehoba wamupesheshe. Mambo ka? Mambo Yoba wipelwile. Wamwesheshe’mba wipilwile kupichila mu kuswa lujimuno lwamupele Elihu, nangwa kya kuba Elihu wajinga mwanyike bingi kwi aye. (Yoba 32:6, 7) Ne atweba kwipelula kwakonsha kwitukwasha kumvwina lujimuno nangwatu inge twamona’mba alo lujimuno kechi lwitufwainwa ne, nangwa inge witupa lolo lujimuno mwanyike. Mukulumpe mu kipwilo ku Canada waambile’mba, “Na mambo a kuba’mba bitumona bakwetu kechi byo byo twimona atweba bene ne, twakonsha kuyilako byepi palutwe inge kafwako wa kwitujimunoka ne?” Ñanyi mwi atweba ubula kukeba kuyilako palutwe mu kwikala na bipangwa bya mupashi ne kwingila bulongo mwingilo wetu wa bwina Kilishitu?—Tangai Salamo 141:5.
13 Monainga lujimuno amba jishinda Lesa jo amwesheshamo butemwe. Yehoba ukeba bintu bituwamina. (Man 4:20-22) Inge witupa lujimuno kwingijisha Mambo anji, mabuku aimena pa Baibolo, nangwa mukwetu wakoma mu lwitabilo, ko kuba’mba ubena kumwesha byo etutemwa. Kinembelo kya Bahebelu 12:9, 10 kyaamba’mba witufunda’mba “tumwenemo bintu byawama.”
14 Tai muchima pa lwine lujimuno, kechi pa jishinda jo belupainamo ne. Bimye bimo, twakonsha kumona’mba jishinda jo betupelamo lujimuno kechi jawama ne. Ibyo, yense ubena kupana lujimuno wafwainwa kumona kuba’mba wilwipana mu jishinda ja kuba’mba ye abena kupa lolo lujimuno wilutambwila bulongo. (Nga. 6:1) Pano bino, inge yetu babena kujimunako, tafwainwa kuta muchima pa byambo, nangwa kya kuba twamona’mba kechi bebyamba mu jishinda jawama ne. Twakonsha kwiipuzha atweba bene amba: ‘Nangwa kya kuba kechi natemwa jishinda jo bampelamo lujimuno ne, nanchi mujipo bishinka mu byambo byo baamba nyi? Nanchi nakonsha kulubako ku bumbulwa kulumbuluka bwa muntu wampa lujimuno ne kuta muchima pa byambo byo aamba nyi?’ Ke kintu kya maana kumonapo jishinda jo twakonsha kumwenamo mu lujimuno lo betupa.—Man 15:31.
w01 5/15 30 mafu. 1-2
‘Moba etu Akavula na Mambo a Maana’
Byakonsha kukumbula muntu wa maana inge bamololako byapusana na byakonsha kukumbula muntu wabula maana. Solomone waambile’mba: “Ololako muntu wa maana, ne aye ukakutemwa. Funjisha muntu wa maana, ne aye ukekala na maana avula.” (Byambo bya Maana 9:8b, 9a) Muntu wa maana wayuka’mba “kimye muntu kyo babena kumufunda kechi usekelamo ne, bino kimukola ku muchima; nangwa byonkabyo, kulutwe na lwendo aba bo bafunda bapanga bipangwa bya mutende ne bololoke.” (Behebelu 12:11) Nangwa kya kuba kitukola bingi ku muchima inge betufundako, kechi twafwaiwa kukana nangwa kwikangaizha ne, mambo kwitufundako kuketulengela kwikala na maana.
Mfumu wa maana watwajijile kwamba’mba “Funjisha muntu waoloka, ne aye ukafunjilapo bikwabo.” (Byambo bya Maana 9:9b) Kafwako muntu uji na maana nangwa wakoma wafwainwa kuleka kufunda ne. Twikala bingi na lusekelo pa kumona bavula kuvwangakotu ne bakote byo batambwila bukine ne kwipana kwi Yehoba! Twayai atweba bonse tutwajijile kufunda.
w01 5/15 30 jifu. 5
‘Moba etu Akavula na Mambo a Maana’
Twafwainwa kwibikako kufunda maana pa kuba’mba tukamwenemo. Bino byo byaambile ne Solomone amba: “Umvwe waikala na maana, ukamwenamo byawama, pano bino, inge waikala wa mwenga, ukeyanjisha obe mwine.” (Byambo bya Maana 9:12) Muntu wa maana ukamwenamo byawama pa kuba muntu wa mwenga ukeyanjisha aye mwine. Tunowa byo tubyala, onkao mambo twafwainwa ‘kuta muchima ku maana.’—Byambo bya Maana 2:2.
Bishinka Bikwabo Byanema
Bishinka Bikatampe Kufuma mu Buku wa Byambo bya Mana
9:17—Mema a kwiba” o aka, kabiji mambo ka kyo ‘atobela’? Byo kiji kuba’mba Baibolo wapashañanya kwilaala mu masongola amba kujitu nobe kutoma mema ekizha kyefu o batapula mu mushima, ko kuba’mba mema a kwiba emenako kwilaala mu bufyamfya. (Byambo bya Mana 5:15-17) Kino kyo kilengela kuba’mba ano mema atobale.
APRIL 21-27
BYA BUNEME BIJI MU MAMBO A LESA BYAMBO BYA MAANA 10
Bwikalo bwa Mutundu ka Buleta Lusekelo lwa Kine?
w01 7/15 25 mafu. 1-3
“Mapesho aji pa Muntu Waoloka”
Muntu waoloka bamupesha mu jishinda jikwabo. “Bukope buleta buyanji, pakuba kwingila na ngovu kuleta bunonshi. Mwana wa milangwe ubungizha kajo mu kimye kya kisalo, bino mwana ulaala mu kimye kya kunowa, ulengesha bumvu.”—Byambo bya Maana 10:4, 5.
Bino byambo byaambile mfumu byakonsha kukwatankanyatu bantu bengile mwingilo wa kunowa. Kimye kya kunowa kechi kyo kimye kya kwikala nkope ne. Mambo kwikala kwingila kimye kyabaya kabiji mingilo ikosa bingi.
Yesu waesakenye mwingilo wa kusapwila ku mwingilo wa kunowa byo abujile baana banji ba bwanga amba: “Mwingilo wa kunowa wabaya, pakuba ba mingilo bakepa. Onkao mambo, lombai Mwine mwina mwingilo wa kunowa [Yehoba Lesa] atume ba mingilo mu mwingilo wanji wa kunowa.” (Mateo 9:35-38) Mu mwaka wa 2000, bantu kukila pa 14 milyonyi bo batainwe ku Kivuluko kya lufu lwa kwa Yesu—bavujile kukila Bakamonyi ba kwa Yehoba. Ñanyi wakonsha kukaana kuba’mba majimi kechi ‘atoka kala a kufwainwa kunowa ne’? (Yoano 4:35) Bapopweshi ba kine balomba mwina majimi bamingilo bavula aku saka bengila mwingilo wa kufunjisha bantu kwikala baana ba bwanga na mukoyo. (Mateo 28:19, 20) Yehoba wapesha bingi uno mwingilo. Mu mwaka wa mwingilo wa 2000, bantu kukila pa 280,000 bo babatizhiwe. Kabiji bano baikala ke bafunjishi ba Mambo Lesa. Twikala bingi na lusekelo inge ketwingileko mwingilo wa kunowa ne kufunjisha bantu kwikala baana ba bwanga.
w01 9/15 24 mafu. 3-4
Endainga mu ‘Jishinda ja Bololoke’
Solomone waambile pa buneme bwa bololoke byo ambile’mba: “Bunonshi bwa muntu nonshi ye muzhi wanji wakosa. Buyanji bo bonauna muntu muyanji. Mwingilo wa muntu waoloka utwala ku bumi; pakuba byuba muntu mubi bitwala ku bubi.”—Byambo bya Maana 10:15, 16.
Bunonshi bwituzhikijila ku bintu bya mu bwikalo byonkatu nsakwa byo izhikijila bantu bekala mu muzhi. Buyanji nabo bonauna muntu inge kwaiya bintu bya kubula kuketekela. (Musapwishi 7:12) Mfumu wa maana waambile pa byatama bifuma mu bunonshi ne buyanji. Muntu uji na bunonshi uketekela mu bunonshi bwanji kuba’mba busakumuzhikijila nobe “yo nsakwa.” (Byambo bya Maana 18:11) Kabiji muntu muyanji naye utwajijilatu kulanguluka amba ukayandangatu. Kino kilengela bonse kukankalwa kulenga jizhina jawama na Lesa.
it-1 340
Mapesho
Yehoba Upesha Bantu. “Mapesho a Yehoba o alengela muntu kunonka, kabiji kechi wiapaina pamo na misongo ne” (Man 10:22) Yehoba upesha bantu banji kupichila mu kwibazhikijila, kwibapa bintu bikebewa mu bwikalo, kwibatangijila ne kwibalengela kusekela mu bintu byo baji nabyo.
Bishinka Bikwabo Byanema
Kwenda mu Bololoke Mufuma Lusekelo
18 “Mapesho a Yehoba” o alengela bantu banji kunonka ku mupashi. Kabiji witubula’mba “kechi unungako [kyatama, NW] ne.” (Byambo bya Mana 10:22) Pano nga mambo ka meseko kyo afikila bantu bakishinka ba Lesa bavula ne kwibalengela kumanama? Kuji bintu bisatu bilengela’mba tupitenga mu meseko ne kufikilwa na malwa. (1) Milanguluko yetu yatama. (Ntendekelo 6:5; 8:21; Yakoba 1:14, 15) (2) Satana ne bademona banji. (Efisesa 6:11, 12) (3) Ntanda yatama. (Yoano 15:19) Nangwa kya kuba Yehoba uswisha bintu byatama kubiwa kwi atweba, kechi ye ulengela’mba byubiwenga ne. Mambo “bya kupana byonse byawama ne bya bupe byonse byalumbuluka bifuma mwiulu, kasa bikila panshi kufuma kwi Tata wa byeya.” (Yakoba 1:17) Mapesho a Yehoba kechi alengela muntu kumanama ne.
APRIL 28–MAY 4
BYA BUNEME BIJI MU MAMBO A LESA BYAMBO BYA MAANA 11
Byo Mwafwainwa Kubula Kwamba!
w02 5/15 26 jifu. 4
Bukishinka Bukwasha Bantu Baoloka
Bantu batemwa bololoke bakwasha bakwabo pakuba bantu batemwa bubi batwala bakwabo mungi, byonkatu byaambile mfumu wa bena Isalela amba: “Nsatuki onauna mukwabo na byambo byanji, pakuba bantu baoloka bebapokolola na maana a kuyuka bintu.”(Byambo bya Maana 11:9) Atweba bonse twayuka kuba’mba miyebe, luntepentepe, ñambilo ya mwenga ne misambo yatu bitwala bantu mungi. Pakuba ñambilo ya muntu waoloka yawama mambo ikwasha bantu ne kwibatundaika. Inge ke bamubepele bya bubela, bukishinka bwanji bumupokolola mambo bushiina babena kumubepela.
w02 5/15 27 mafu. 2-3
Bukishinka Bukwasha Bantu Baoloka
Bantu balondalonda bololoke mu bwikalo bwabo batundaika mutende ne kukwasha bakwabo bakinkalankulo kwikala bwikalo bwawama. Kino kilengela bonse kwikala bulongo. Pa kuba batemwa miyebe, ñambilo yatama ne byubilo bincha bekazha bingi bakwabo bufinda, kwibalengela kupopomenwa, kubula kukwatankana ne kwibaletelatu makatazho akwabo. Javula kikala bino inge baji na bino byubilo byatama bo baji ne pa bifulo bikatampe. Mu kimasamasa muji bantu ba uno mutundu mwikala biwoowo, mazhikakanwa, byubilo bincha kabiji ne bukomo bubwela bingi panshi.
Jino jifunde jiji pa Byambo bya Maana 11:11 jingila ne ku bantu ba Yehoba byo bapwanañana mulwabo mu kipwilo. Mu kipwilo muji bantu batemwa Lesa, muji batangijila batemwa bololoke, balengela bantu ba Lesa kwikala na lusekelo, kizaku ne kwikwasha mulwabo. Kino kileta bingi munema kwi Lesa. Yehoba upesha kipwilo, kabiji bonse bakomenako mu bulunda bwabo na Lesa. Bamo baji na muchima wa bunsatuki, batemwa kwijizhanya pa bintu bibena kubiwa bekela nobe “muzhazhi wa bulembe” ulengela ne bakwabo nabo kwikala na uno muteeto watama. (Bahebelu 12:15) Bantu ba uno mutundu javula bakeba bingi bifulo ne kutumbalala. Bakosela kwamba pa manwinwi o baumvwine a bintu bimwesha nobe kuji kufwa bamo nshiji, bitundaika misalululo mu kipwilo nangwa mu bakulumpe mu kipwilo. Bantu ba uno mutundu bavulañanya bingi mutende mu kipwilo. Kechi twafwainwa kutako muchima ku byo baamba ne. Atweba twafwanwatu kutwajijila kwikala bantu bakamwa Lesa batundaika mutende ne lukwantankano mu kipwilo.
w02 5/15 27 jifu. 5
Bukishinka Bukwasha Bantu Baoloka
Muntu ubula kufuukula bintu bulongo nangwa “wabula maana” uvulañanya bingi mutende! Mambo utwajijila kuba luntepentepe nangwa mwenga. Bakulumpe mu kipwilo bafwainwa kulekesha bukiji byubilo bya uno mutundu. Kabiji “yense wabula maana,” ulengulula bantu pa kuba muntu uji na milangwe aye uzhindamapotu. Kechi usolola bya bufyamfya ne. Byo twayuka kuba’mba kubula kwikanya mu ñambilo mufuma bintu byatama bingi, twafwainwa kwikala bantu ba maana ‘baketekelwa.’ Twafwainwa kwikala bakishinka ku bakwetu bena Kilishitu ne kubula kusolola bya bufyamfya byakonsha kwibabika mu kizumba. Twatokwa bingi kwikala na bantu bakishinka mu kipwilo!
Bishinka Bikwabo Byanema
g20.1 11-12, kakitenguluzha
Bya Kuba na Bijikila
“KWIKALA NA LUSA KWITUKWASHA KUBULA KWIKALA NA BIJIKILA”
“Muntu wa lusa umwenamo byawama, pakuba muntu washinta wiletela makatazho.”—BYAMBO BYA MAANA 11:17.
Mu buku wa kuba’mba, Overcoming Stress muji kitango kya kuba’mba, “Kwikala na Lusa Kwitukwasha Kubula Kwikala na Bijikila.” Ba Dr. Tim Cantopher baambile’mba, kubila bakwetu lusa kwitukwasha kwikala na butuntulu bwa mubiji bwawama ne kwikala na lusekelo. Bino inge lusa tufwalo kabiji twashinta, kechi tukekala na lusekelo mu bwikalo bwetu ne, mambo tuketolwelanga.
Twakonsha kukepeshako bijikila inge twiyuka byo tuji. Kechi twafwainwa kwibikanga po twabula nangwa kwilengulula atweba bene ne. Yesu Kilishitu waambile’mba: “Wafwainwa kutemwa mukwenu byonka byo witemwa obe mwine.”—Mako 12:31.