Baimene ne Kunkwasha

Ba Bob bajinga mu motoka wabo kabiji wanyemenenga makilomita 100 pa jiola jimo saka kubena kupuupa mwela kabiji kwajinga bingi mashika pa jije juba mu muzhi wa Alberta, mu kyalo kya Canada. Byo bayilenga jiwilo ja kunyuma ya motoka wabo jasabikile. Patanshi ba Bob kechi bayukile kyamwekele ne, onkao mambo, batwajijile na lwendo lwabo kuba’mba baye na kufika ku nzubo kwalepele makilomita atanu.

Mu nkalata yo batumine ku Nzubo ya Bufumu ya Bakamonyi ba kwa Yehoba, ba Bob balumbulwile kikwabo kyamwekele. Baambile’mba: “Banyike batanu bajinga mu mutoka wabo bafikile po najinga bashinkula ne kipenze bambuula ne kyamwekele. Bambujile’mba jiwilo jatubika. Byo naimikile motoka, nabo baimikile kuba’mba bankwashe kufumyako jiwilo jasabikile ne kubikako jikwabo. Kechi nayukilepo’mba nji na jiwilo jikwabo ja kupingizhako nangwa kyela kya kuzandwilako motoka ne. Byo naikele kwapela mukwakwa mu kakinga kami ka bilema, bano banyike batwelele munshi ya motoka kabiji batainemo jiwilo jikwabo ne kyela kya kuzandwilako motoka ne kufumyako jiwilo jasabikile ne kubikako jikwabo. Kwajinga bingi mashika ne mabebe. Kechi bajingapo na bivwalo bikwabo bya kuvwala pa kupwisha kulungisha motoka ne, pano bino, baingijile uno mwingilo kabiji bañambijile kukanjilamo ne kuya. Bunke bwami inge kafwako kyo naubile ne.

“Nebasanchila bingi banyike Bakamonyi batanu pa byo bankwashishe. Bajinga mu ino nyaunda mambo bayilenga pa mazubo a bantu na kusapwila. Bano baana kine bengijisha bintu byo basapwila. Kwa kubula bukwasho bwabo, bintu inge byankatezhe bingi, onkao mambo, mbena kwibasanchila kya kine kine pa kyo baubile. Kechi nayukilepo’mba pa jo ja juba kwajinga banyike baji na muchima wawama ne.