BYAMBA BAIBOLO

Paladisa

Paladisa ye Muka?

BANTU BYO BALANGULUKA Bamo balanguluka kuba’mba paladisa ke kishimitu. Bakwabo nabo baitabila amba ke bujimitu bwa kifwanyikizho mwikala bantu bawama myaka ne myaka baji na lusekelo kabiji bamwenamo mu mingilo yabo.

BYAMBA BAIBOLO Kyambo kya “paladisa” bekingijisha kulumbulula muzhi mutanshi mwaikalanga bantu, bujimi bwa Edena. (Ntendekelo 2:7-15) Baibolo umwesha kuba’mba bwajinga bujimi bwa kine mwaikalanga bamulume ne mukazhi kwa kubula kubela ne kufwa. (Ntendekelo 1:27, 28) Na mambo a kuba’mba basatukijile Lesa bebapangilemo mu paladisa. Nangwa byonkabyo, bungauzhi bwa mu Baibolo butongola kimye kya kulutwe bantu kyo bakekalanga mutende mu Paladisa.

MAMBO KA O KYANEMENA KWI ANWEBA? Umvwe Lesa ye butemwe, kyailamo kuba’mba ukafweta bakalume banji bakishinka bwikalo bwawama mu Paladisa. Kabiji ukabula bantu bintu byo bafwainwa kuba pa kuba’mba betabilwe kwi aye. Baibolo wamba kuba’mba twakonsha kwitabilwa kwi Lesa kupichila mu kufunda pe aye ne kukokela mikambizho yanji.—Yoano 17:3; 1 Yoano 5:3.

“Yehoba Lesa wajimine bujimi bwa bichi mu Edena . . . mo mo amubikile muntu ye abumbile.”—Ntendekelo 2:8.

Paladisa uji pi?

BILANGULUKA BANTU Bamo baitabila kuba’mba Paladisa iji mwiulu, bakwabo nabo bamba’mba ikekala ponka pano pa ntanda.

BYAMBA BAIBOLO Paladisa mutanshi mwaikalanga bantu wajinga pano pa ntanda. Lesa walengele ino ntanda kuba’mba pakekalenga bantu myaka ne myaka. Baibolo waamba kuba’mba Lesa walengele ino ntanda kwikala myaka ne myaka. (Salamo 104:5) Waamba ne kuba’mba: “Mwiulu mo mwiulu mwa Yehoba, Pa kuba pano pa ntanda wipapaine ku bantu.”—Salamo 115:16.

Kechi twafwainwa kuzhinaukanga kuba’mba Baibolo walaya Paladisa pano pa ntanda ne. Lesa ukapesha bantu bakekalangamo na bumi bwa myaka ne myaka. Mukekala mutende ne kukwatankana. Misongo ne buyanji bikapwa. Bantu bakamwenamo mu bintu bikekala pano pa ntanda.—Isaya 65:21-23.

“Jipa Tala! Tente wa Lesa ukekala na bantu, . . . ne lufu, mabingo, kujila nangwa misongo kechi bikekalako jibiji ne.”—Lumwekesho 21:3, 4.

Ba ñanyi bakekala mu Paladisa?

BANTU BYO BALANGULUKA Bupopweshi bwavula bufunjisha kuba’mba bantu bawama bobonkatu bakekala mu Paladisa. Pano bantu bavula kechi bayuka byo kilumbulula kwikala muntu “wawama” ne. Bamo balanguluka amba kuya ku chechi ne kulombanga kimye kyonse byo bintu bikebewatu.

BYAMBA BAIBOLO Baibolo ufunjisha amba “baoloka” bakaswana ntanda. Pano nanchi ba ñanyi Lesa bo amona amba baoloka? Kechi muntu wivwanga mu bisho bya bupopweshi bwa bubela ne kulengulula kyaswa muchima wa Lesa ne. Baibolo waamba’mba: “Nanchi aye Yehoba usekela mu milambo ya kusoka ne mu bitapisho pamo byonka byo asekela na bantu pa kukokela jiwi janji nyi? Aki umvwai, lukokelo lwakila bitapisho.” (1 Samwela 15:22) Kwa kubula nangwa kuzhinaukatu ne, bantu “baoloka” bakekala mu ntanda ipya ke boba balondela mikambizho ya Lesa iji mu Baibolo.

BYO MWAKONSHA KUBA Kukokela mikambizho ya Lesa kechi kulumbululatu kwivwanga mu bya bupopweshi ne. Mu bintu byo tuba pa juba pa juba byakonsha kutokesha Lesa pa muchima nangwa kumufichisha. Mwafwainwa kuyuka bya kutokesha Lesa pa muchima kupichila mu kufunda Baibolo. Kabiji kechi kyakatazha kumutokesha ku muchima ne. Baibolo waamba’mba: “Mikambizho yanji kechi yakatazha ne “ (1 Yoano 5:3) Lesa wakebesha kwimufweta kupichila mu kwimuswisha kutwela mu ntanda ipya.

“Baoloka bakaswana ntanda, Ne kwikalamo myaka ne myaka.”—Salamo 37:29.