Mukumbu Wanema wa Kulangulukapo

PANYUMA ya kulanguluka pa bino bishiino, bantu bavula bataana kishinka kya kuba’mba kuji umo uji na maana akila a bantu walengele bumi. Akilangulukai pe Antony Flew, wajinga mufunjishi mukulumpe wa bya buntemwa maana, kabiji watundaikanga mulanguluko wa kuba’mba Lesa ufwako. Kimye kyo afunjile pa mashinda a kukumya alengelwamo mitundu yonse ya bilengwa byumi ne byalengwa ntanda ne jiulu, Antony Flew wapimpwile milanguluko yanji. Monka mwaambijile bantemwa maana ba kala, Antony Flew naye wanembele’mba: “Twafwainwa kuswa bishinka byo tubena kutaana mu bishiino byonse, nangwa kya kuba’mba kechi byo byo twajikuketekelanga ne.” Antony Flew waswile bishiino bimwesha’mba kuji Mulenga.

Gerard ye twaji kwambapo mu kibaba kitanshi naye waswile kuba’mba kuji Mulenga walengele byonse. Nangwa kya kuba’mba wafunda bingi kabiji wajinga shayuka wafunjishanga byalengwa bilongolo, waambile’mba: “Kafwako kishiino kyo nataana kimwesha’mba bumi bwafumine ku bintu bibula kupeema ne. Mitundu yapusana pusana yalengelwamo bilengwa byumi yanshiina kuba’mba kuji Mulenga wibilengele.”

Byonka muntu byo akonsha kuyuka biji sendwe kupichila mu kumona bintu byo alenga, Gerard naye wayukile byubilo biji na Mulenga kupichila mu kufunda pa bilengwa na Lesa. Kabiji Gerard wafunjile Baibolo, buku waamba pa Mulenga. (2 Timoti 3:16) Mu Baibolo mo mo ataaine mikumbu ya mepuzho a kwafumine bantu ne maana akonsha kukwasha bantu kupwisha makatazho o babena kupitamo. Onkao mambo, washiinwe kuba’mba Baibolo wafumine kwi yenka uji na maana akila a bantu.

Byonka byataaine Gerard, mu Baibolo muji mikumbu yanema bingi. Twimutundaika ne anweba kupesa pesa ino mikumbu.