Byalengwa Manungi a Maulu a Tete Wikala ku Mabula

KULANGULUKA kuba’mba bantu bo bajitu na maana a kulenga bintu bifyukauka kechi kine ne. Bino bintu bifyukauka byatanwa ne mu kilengwa na Lesa. Kino kilengwa na Lesa ke tete utanwa mu mashamba mu byalo bya ku Europe.a

Kano katete inge saka kakijitu kaana kakonsha kukiluka palepa kukila pa mamita asatu mu kakimyetu kacheche. Inge kakiluka kuya mwiulu, kechi kabanda kubwela panshi ne. Kakilukatu nobe mu kukopa kwa jiso. Pa kuba’mba kakiluke bulongo, maulu onse abiji afwainwa kufyukukila pamo. Ñanyi kintu kilengela kino kubiwa?

Langulukai pa kino: Bashayuka ba bya sayansi bataana kuba’mba kano katete kaji na bifyukauka panungakena maulu abiji a kunyuma. Kano katete pa kuba’mba kakiluke, maulu onse abiji afyukukila pamo. Inge maulu abula kufyukukila pamo kakonsha kuba saka kazhingulukatu pantu pamo.

Bilengwa na Lesa bikatampe pa kuba’mba bikiluke bulongo, bongo ne longololo byo bingila mwingilo mukatampe pa kuba’mba maulu onse afyukukile pamo. Pakuba mu kano katete bino bintu kechi bipelawizha kwingila uno mwingilo ne. O ene mambo o kaikela na bintu bifyukauka panungakena maulu. Ukebakeba bishinka aye Gregory Sutton waambile’mba: “Javula tulanguluka kuba’mba bintu bilenga bantu nabiji myotoka mo mutanwatu bino bintu.” Kitulengela kulanguluka bino ke na mambo a kuba’mba “kechi twakebele bulongo bishinka pa bilengwa na Lesa ne.”

Mwalangulukapo’mba ka? Nanchi bino bintu bifyukauka biji mu kano katete byaishilekotu bine nyi, inyi byalengelwe?