‘Kwikala na Jizhina Jawama Kwanema Kukila Bunonshi Bwavula’

KWIKALA na jizhina jawama kwanema bingi. Mu byalo bimo, jizhina jawama jakonsha kuzhikijila muntu. Kimye kimo bantu bakonsha kwamba byambo byatama pa muntu pa waileshi nangwa mu mapepala a byambo nangwa kusansanya bya bubela pe aye. Kino kyakwatankana na byambo bya mu Baibolo bya kuba’mba: “Kyawama kwikala na jizhina jawama kukila bunonshi bwavula; kunemekwa kwawama kukila siliva ne ngolode.” (Byambo bya Maana 22:1) Twakonsha kwikala byepi na jizhina jawama ne kulengela bantu kwitunemeka? Twakonsha kuba bino inge twalondela byaamba Baibolo.

Akimonai byaamba Baibolo mu Salamo 15. Pa kukumbula bwipuzho bwa kuba’mba, “Ñanyi wakonsha kwikala mwenyi mu tente wenu?” Nembi wa Salamo wakumbwile’mba: “Kanatu yewa . . . uba bintu byaoloka kabiji wamba bya kine mu muchima wanji. Ubula kuba luntepentepe . . . , ubula kuba mukwabo bintu byatama, kabiji ubula kwamba byatama pa balunda nanji. Aye ukana mubi yense . . . Ufikizha byo alaya, nangwa kya kuba byakonsha kumuletela lukatazho. . . . Kechi utambula mazhikakanwa ne.” (Salamo 15:1-5) Nanchi muntu uba bino kechi mwakonsha kumunemeka nenyi?

Kyubilo kikwabo kilengela muntu kumunemeka ke kwipelula. Byambo bya Maana 15:33 byaamba’mba: “Kwipelula kulengela kutumbijikwa.” Akilangulukai pa kino: Bantu bepelula bengila na ngovu kwingijila pa byo batamisha. Kabiji kechi kibakatazha kulomba kwibalekelako mambo inge balenga mukwabo mambo ne. (Yakoba 3:2) Bantu betota kibakatazha kuba bino kabiji bazhingila bingi bukiji. Byambo bya Maana 16:18 byaamba’mba: “Paji kwitota palondela lonaiko, kabiji muchima wa kwilundumika ulengela kwituntula.”

Pano mwakonsha kuba byepi inge muntu ke ambe byatama pe anweba? Nanchi mwafwainwa ponkapotu kuba bintu bukiji bukiji saka mwazhingila nyi? Iipuzhai anweba bene amba: ‘Inge nafuukulapo kuzhikijila jizhina jami, nanchi kino kyakonsha kulengela byambo bya bubela byaambile muntu pe amiwa kuyukanyikwa ku bantu bavula nyi?’ Ibyo kuba’mba mwafwainwa kutwala mambo enu ku kije, pano bino Baibolo waamba’mba: “Kange upelawizhe kutwala mambo ku kije ne.” Bino waamba’mba, “pwisha mambo o uji nao na mukwenu.” (Byambo bya Maana 25:8, 9)a Kuba bino kwakonsha kwimulengela kupwisha bulongo lukatazho lo muji nalo na muntu.

Baibolo kechi buku waambatu pa bya bupopweshi ne. Ke buku wanema bingi witutangijila mu bwikalo bwetu. Bonse balondela byaamba Baibolo bekala na byubilo bibalengela kwikala na jizhina jawama.