BYA KUBA NA MITENGO YA BINTU IBENA KUKANJIJILAKOTU
Yukai’mba Bintu Byaaluka
Mitengo ya bintu inge ibena kukanjila pachepache kechi tutako ne muchima amba mitengo yakanjila ne, kikatakata inge betunungilako ne mali o tufola. Pano bino, inge mitengo ya bintu ibena kukanjila lubilo kabiji kechi babena kwitunungilako mali o tufola ne, twikala bingi na bijikila kikatakata inge tuji na kisemi.
Kechi twakonsha kukanya bantu kukanjizha mitengo ya bintu ne. Pano bino, kuyuka’mba bintu mu ntanda bibena kwaluka kwitulengela kubula kukizhamo kwikala na bijikila.
MAMBO KA O KYANEMENA KUYUKA’MBA BINTU MU NTANDA BIBENA KWALUKA?
Bantu bayuka’mba kechi bakonsha kukanya bakwabo kukanjizhako mitengo ya bintu ne, kibapeelela bingi . .
kubula kubambisha muchima. Kubula kubambisha muchima kwibakwasha kulanguluka ne kufuukula bintu bulongo.
kubula kulubako kuba bintu byanema nabiji kusonkela malaichi ne mema nangwa kwikala na kisuse kya mali.
kubula kutoboka na ba mu kisemi pa mambo a mali.
kumonapo mashinda awama a kupotelamo bintu byo bakeba. Bafwainwa kufuukula bulongo bintu byo bakeba kupota. Kimo kimye, kechi bafwainwa ne kwingijisha mali avula ne.
BYO MWAFWAINWA KUBA
Yukai mwa kubila. Inge kya kuba mitengo ibena kukanjila lubilo, kyawama bingi kubula kwingijisha mali ku bintu byabula kunema. Bantu bamo beletela makatazho na mambo a kupota bintu kipotepote nangwa kya kuba mali bafwao. Kuba bino, kwibalengela kwikala bingi na bijikila. Kya kine kuba’mba mukeba kulama bingi bulongo kisemi kyenu pa kwibanengezhezha byo bakeba mu bwikalo. Nangwa byonkabyo, vulukainga’mba: Ba mu kisemi kyenu bakeba kwibamweshanga butemwe ne kwikalangapo na kimye kya kwikala pamo ne anweba kukila bintu byonse.
Kukeba kwikala bwikalo bwa kwitobwela kijitu nobe muntu ubena kufwenka pa mukola kuya kubena kufumina mema