Mashinda o Bengijisha Kusapwilamo Mambo Awama
BENA KILISHITU bebakambizha ‘kusambisha ba mu mikoka yonse ya bantu baluke ke baana ba bwanga.’ Pano bino, kino kechi kilumbulula’mba bafwainwa kukanjikizha bantu ne. Mwingilo wa kwa Yesu wajinga wa ‘kusapwila mambo awama ku bapelulwa,’ ‘kubuka balajika michima’ ne “kwibatekenesha bonse baji na bulanda.” (Mateo 28:19; Isaya 61:1, 2; Luka 4:18, 19) Bakamonyi ba kwa Yehoba boba kino kupichila mu kusapwila mambo awama a mu Baibolo. Byonka byajinga ngauzhi Ezikyo, Bakamonyi ba kwa Yehoba lelo jino beseka kukeba bantu babena ‘kwikizha byefu ne kubinza na mambo a bya bunya bibena kubiwa.’—Ezikyo 9:4.
Jishinda jimo jayukanyikwa ku bavula jo batainamo bantu babena kwikizha byefu na mambo a bibena kubiwa luno, ke ja kuya ku nzubo ku nzubo. Onkao mambo, bebikako kuya ku bantu byonka byaubanga Yesu pa ‘kupitañana mu mizhi ikatampe ne icheche na kusapwila, ne kwibabula mambo awama a bufumu bwa Lesa.’ Ne baana banji ba bwanga batanshi nabo byo byo baubanga. (Luka 8:1; 9:1-6; 10:1-9) Lelo jino pa mwaka pa mwaka, Bakamonyi ba kwa Yehoba beseka na ngovu kuya pa mazubo a bantu bimye byavula umvwe kyakonsheka na kwisamba na bena mazubo pa kimye kicheche pa mitwe ibena kwamba pa bintu byamweka mu yoyo mpunzha nangwa mu ntanda. Bakonsha kwisamba pa kinembelo kimo nangwa bibiji, kabiji umvwe mwina nzubo wamwesha lusekelo, awo Kamonyi umulaya’mba ukabwelako pa kimye kikwabo na kutwajijila mwisambo. Basha ma Baibolo ne mabuku alumbulula Baibolo, kabiji umvwe mwina nzubo ubena kukeba kufunda, batendeka kumufunjisha lufunjisho lwa Baibolo lwa kubula kulipila. Bantu bavula ne bisemi kuzhokoloka ntanda yonse babena kufunda mafunjisho a Baibolo.
Jishinda jikwabo jo basapwilamo “mambo awama a bufumu” ku bantu ke kupichila mu kupwila kwikela pa Mazubo a Bufumu. Bakamonyi bapwila pa ano mazubo pa mulungu pa mulungu. Kupwila kumo ke jashi ja mvula bantu jamba pa bintu bibena kukebewa pa kyokyo kimye, apa bino palondela ne lufunjisho lwa mutwe wafuma mu Baibolo nangwa bungauzhi, kwingijisha Kyamba kya Usopa. Kupwila kukwabo ke sukulu wa kufunjisha Bakamonyi kuyuka bya kutaya mbila ya mambo awama, apa bino palondela ne mwisambo wa kwisamba pa bya kwingila mwingilo wa busapwishi ko bekala.
Muntu yense wakonsha kutanwako ku kuno kupwila konse. Kechi kwikala kupishamo muchiba wa kubikapo mali ne. Kuno kupwila kukwasha bingi bonse batanwako. Baibolo waamba’mba: “Twilanguluke atwe bene na bene mu kwiubisha butemwe ne mingilo yawama; ne kuleka kupwila pamo, byo boba bamo, ne, poso kwifunda, ne kwibikishakotu byo mumona aja juba kasa jibenakufwenya pepi.” Lufunjisho lwa pa bunke ne kupesapesapo kwanema bingi, bino kupwila na bakwetu kukoseshañana: “Kyela kya kapotwe kitwisha kyela kikwabo, byonkabyo ne muntu naye ulengela mulunda nanji kujimuka.”—Bahebelu 10:24, 25; Byambo bya Mana 27:17.
Kabiji Bakamonyi bashukilwapo ne bimye bikwabo bya kwisambilamo mambo awama umvwe batana bantu mu mingilo yabo ya pa juba pa juba. Mwisambo wakonsha kwikalatu wa byambo bicheche na mukwabo wakinkalankulo, muntu ye bapatama nanji sakya umo nangwa ndeke. Kabiji kimye kimo bakonsha kwisamba mwisambo walepako na mulunda nabo, mulongo wabo nangwa mukwabo mo bengijila pa kimye kyo babena kukokoloka. Buno bo busapwishi bwasapwilangapo ne Yesu javula byo ajinga panopantanda—umvwe keakuzhe kizhiba, umvwe waikala ku mutumba, pa kuja mu mazubo a bantu, umvwe watanwa ku kijiilo kya masongola nangwa pa kwenda mu bwato pa Kizhiba kya Ngalilea. Wafunjishanga mu mashinagoga ne mu nzubo ya Lesa mu Yelusalema. Konse ko ayanga, wamonangapo kimye kya kusapwilamo mambo a Bufumu bwa Lesa. Bakamonyi ba kwa Yehoba nabo bebikako kulondela mu ngayo yanji.—1 Petelo 2:21.
BOBA BINTU BYO BASAPWILA
Ano mashinda o bengijisha kusapwilamo mambo awama, kechi akonsha kwikala kintu kwi anweba umvwe awo wimusapwila keabule kulondela bintu byo abena kwimufunjisha ne. Kwambatu kintu kwakubula kwikyuba, ke bukamfutumfutu kabiji bukamfutumfutu bwa bupopweshi bo bwalengela bavula kulengulula Baibolo. Kechi twafwainwa kumupamo mambo Baibolo ne. Banembeshi ne Bafaliseo bajinga na Binembelo bya Kihebelu, bino Yesu wibasanzhilemo amba bakamfutumfutu. Patanshi wakyambile’mba batanganga mu Mizhilo ya Mosesa, kepo anungilepo bino byambo ku baana banji ba bwanga amba: “Bintu byonse byo bemwambila, mwibyubenga ne kwibilama. Kabiji kange mulonde byubilo byabo ne; mambo abo bebyambatu ne kwibyuba ne.” (Mateo 23:3) Byubilo byawama bya mwina Kilishitu byo byanema kukila byambo byo aamba. Banabakazhi bena Kilishitu baji na bamwata wabo babula kwitabila bebakambizhe’mba: “Pabula mambo betabishiwe na bwikalo bwa bakazhi babo; byo bamona bwikalo bwenu bwawama bwa mu mushingi.”—1 Petelo 3:1 2.
Onkao mambo, Bakamonyi ba kwa Yehoba basapwila mambo awama ku bantu ne mu jino jishinda: kupichila mu kwikala na byubilo byawama bya bwina Kilishitu byo bafunjisha bakwabo kuba. Beseka ‘kubila bantu byonka byo bakeba abo kwibobila.’ (Mateo 7:12) Beseka kubila bino bantu bonse kechi ku Bakamonyi bakwabo bonka, balunda nabo, bakinkalankulo nangwa balongo babo bonkatu ne. Byo baji bambulwakoloka, nabo kimye kimo batamisha. Pano bino, bakebesha bingi kubila bantu bonse byawama kechi kwibabulatu mambo awama a Bufumu onka ne, bino ne kwibakwasha umvwe ke kikebewe.—Yakoba 2:14-17.
[Picture on page 19]
Hawaii
[Picture on page 19]
Venezuela
[Picture on page 19]
Yugoslavia
[Pictures on page 20]
Mazubo a Bufumu, o bashimika bulongo, mo mwikela misambo ya mu Baibolo
[Pictures on page 21]
Mu bisemi byabo ne kimye kyo baji na bakwabo, Bakamonyi besekesha kuba bintu byo bafunjisha