Ñanyi Byubilo Biji ne Yehoba?

Mwalangulukapo’mba pe Yehoba Lesa? Bantu bamo bamba’mba Yehoba ulenga moyo kabiji uji kwalepa ne abo. Kabiji ujitu nobe tubangabanga tuji kwalepa bingi. Abya mulanguluka’mba kechi muntu ne, bino uji bingi na bulume, ujitu nobe luvula mukatampe nyi? Nanchi mulangulukapo’mba pe Yehoba byo aji? Baibolo witubuula byubilo bya Yehoba. Kabiji witubuula ne kuba’mba wimuta bingi muchima.

1. Mambo ka o tubujila kumumona Lesa?

“Lesa Mupashi.” (Yoano 4:24) Yehoba kechi uji na mubiji wa nyama ne mashi byonka biji bantu ne. Aye mupashi kabiji wikala mwiulu mo tubula kumona.

2. Ñanyi byubilo bimo bya Yehoba?

Kechi twakonsha kumumona Yehoba ne. Bino inge twamuyuka, tukamutemwa bingi mambo ko aji kabiji uji na byubilo byawama bingi. Baibolo waamba’mba: “Yehoba watemwa bunchibamambo bwaoloka, kabiji kechi ukalekelela bantu banji ba kishinka ne.” (Salamo 37:28) Yehoba “wa kifyele ne lusa,” umwesha bino byubilo kikatakata ku bantu babena kupita mu makatazho. (Yakoba 5:11) “Yehoba uji kwipi na boba balajika michima; upulusha boba balefulwa.” (Salamo 34:18, tubyambo twa munshi.) Nanchi mwayuka’mba Yehoba utemwa bingi inge twauba bintu byawama kabiji kimukola ku muchima inge twalenga mambo nyi? Muntu uba byatama umukozha ku muchima ne kumuletela bulanda. (Salamo 78:40, 41) Pakuba muntu uba bintu byawama umutokesha bingi ku muchima.​—Tangai Byambo bya Maana 27:11.

3. Yehoba umwesha byepi amba witutemwa?

Kyubilo kikatampe kya Yehoba ke butemwe. Kwambatu kine, “Lesa butemwe.” (1 Yoano 4:8) Yehoba witumwesha butemwe bwanji kechi mu Baibolo monkatu ne, bino bumwekela ne mu bintu byo alenga. (Tangai Byubilo 14:17.) Langulukai pa jishinda jo etulengelamo. Witupa bulume bwa kumona misombelo yawama bingi, kuteleka ku nyimbo yawama ne bulume bwa kutompa kajo kawama. Ukeba atweba kwikala bwikalo bwawama bingi.

FUNJILAIPO BIKWABO

4. Mupashi wazhila ke ngovu ya Lesa ingila

Byonkatu atweba bantu byo twingijisha maboko pa kwingila, Yehoba naye wingijisha mupashi wanji wazhila. Baibolo waamba’mba mupashi wazhila kechi muntu ne, pakuba ke ngovu Lesa yo engijisha pa kuba bintu. Tangai Luka 11:13 ne Byubilo 2:17, ne kwisamba ano mepuzho:

• Lesa ‘uketulwila’ mupashi wanji wazhila pa bantu bamulomba. Pano mwalanguluka’mba mupashi wazhila Lesa nyi, inyi ngovu ya Lesa ingila? Mambo ka o mwakumbwila byobyo?

Yehoba wingijisha mupashi wanji wazhila kuba bintu byonsetu byo akeba. Tangai Salamo 104:30 ne 2 Petelo 1:20, 21, ne kwisamba buno bwipuzho:

• Ñanyi mashinda amo Yehoba mo aingijishe mupashi wanji wazhila?

5. Yehoba uji na byubilo byawama bingi

Mosesa waingijiile Lesa mu bukishinka pa myaka yavula bingi, pano bino wakebelenga kuyuka bulongo Mulenga wanji. Onkao mambo, Mosesa walombele’mba: “Mbuulai mashinda enu, pa kuba’mba nemuyuke.” (Kulupuka 33:13) Pa kumukumbula, Yehoba wabuujile Mosesa byubilo byanji bimo. Tangai Kulupuka 34:4-6, ne kwisamba ano mepuzho:

• Ñanyi byubilo Yehoba byo abuujile Mosesa?

• Ñanyi byubilo bya Yehoba anweba byo mwatemwa bingi?

6. Yehoba wata bingi muchima bantu

Bantu ba Lesa Bahebelu bajinga bazha mu Ijipita. Yehoba waumvwine byepi ku muchima kumona byayanjilenga bantu banji? Telekai ku Kifwanyikizho kya MAWITU kabiji londelaingamo, nangwa tangai Kulupuka 3:1-10. ne kwisamba ano mepuzho.

KIFWANYIKIZHO KYA MAWITU: Yehoba Wibatele Muchima byo Bamanaminenga (2:45)

• Ajino jishimikila jimufunjishapo ka pe Yehoba byo omvwa ku muchima pa makatazho apitamo bantu?​—Monai byepelo 7 ne 8.

• Nanchi mwalanguluka’mba Yehoba ukebesha bingi kukwasha bantu kabiji wafwainwa kuba kino nyi? Inge mwakumbula’mba ee, mambo ka o mwakumbwila bino?

7. Bintu byalenga Yehoba bisolola byubilo byanji

Yehoba witusolwela byubilo byanji mu bintu byo alenga. Tambai VIDYO. Kepo mutange Loma 1:20, ne kwisamba buno bwipuzho.

VIDYO: Byalenga Yehoba Bimwesha Butemwe Bwanji—Mubiji wa Muntu (1:57)

• Ñanyi byubilo bya Yehoba byo mumona mu bintu byo alenga?

ÑANYI BISHINKA BYO MWAFUNDA?

Yehoba Mupashi ubula kumweka kabiji uji na byubilo byawama bingi kikatakata butemwe.

Mepuzho a kupitulukamo

• Mambo ka o tubujila kumumona Yehoba?

• Nga mupashi wazhila ye muka?

• Ñanyi byubilo bimo biji ne Yehoba?

KEBAI BISHINKA BIKWABO

Funjilaipo bintu bikwabo pa byubilo bina bya Yehoba.

“Lesa Uji na Ñanyi Byubilo?” (Kyamba kya Usopa Na. 1 2019)

Monai bishinka bimwesha’mba Yehoba kechi utanwa konsetu ne.

“Nanchi Lesa Utanwatu Konsetu Nyi?” (Kibaaba kiji pa jw.org)

Monai ene mambo Baibolo o aambila pa mupashi wazhila amba “ngovu ya Lesa ingila.”

“Nanchi Mupashi Wazhila ye Muka?” (Kibaaba kiji pa jw.org)

Kyakatezhe bingi mpofu umo kuswa’mba Lesa wamutemwa. Monai kyamukwashishe kupimpula milanguluko yanji.

“Pano Luno Nayuka’mba Nakonsha Kukwasha Bakwetu” (Kyamba kya Usopa, October 1, 2015)