Nanchi Yesu ye Lesa wa Bulume Bonse Nyi?
Bantu javula bakumbula’mba:
▪ “Ee, Yesu Lesa wa Bulume Bonse.”
▪ “Yesu wajinga kimwesho kya Lesa mu bumuntu.”
Nga Yesu waambilepo’mba ka?
▪ “Inge mwantemwa, inge mwasekela, mambo ngya kwi Batata, mambo Batata bo bankila.” (Yoano 14:28) Yesu wayukile’mba kechi waesakana pamo ne Shanji ne.
▪ “Nkanjila kwi Batata ne Shenu, kwi Lesa wami ne Lesa wenu.” (Yoano 20:17) Yesu kechi witongwele mwine’mba ye Lesa ne, bino waambilenga pe Lesa amba naye wiikela.
▪ “Kechi neambile ami mwine ne; Batata bantumine, bo bankambizhizhe’mba, byo byo ukamba ne byo byo ukalumbulula.” (Yoano 12:49) Mafunjisho a kwa Yesu kechi afuminenga kwi aye mwine ne, bino afuminenga kwi Shanji.
YESU waambile’mba ne Mwana Lesa, kechi ne Lesa wa Bulume Bonse ne. Inge Yesu wajinga Lesa, walombelenga kwi ñanyi byo ajinga panopantanda? (Mateo 14:23; 26:26-29) Kya kine, Yesu kechi wibepekezhanga nobe ubena kwamba ku muntu ungi ne!
Baana banji ba bwanga babiji byo balombele Yesu kwikala pa bifulo byanema mu Bufumu bwanji, wibakumbwile’mba: “Pakuba kwikala ku kilujo kyami, ne ku kipiko kyami, kechi yami nekipana ne; nanchi kyo kya boba bo banengezhezhakyo jimo kwi Batata.” (Mateo 20:23) Nanchi Yesu wabepelenga byo ebambijile kuba’mba kechi uji na lūsa lwa kukumbula bwipuzho bwabo nenyi? Ine, kechi wabepele ne! Mambo mu kwikepesha wayukile kuba’mba Lesa ye ujitu na lūsa lwa kuba bino. Kabiji Yesu wibabujile ne kuba’mba kuji bintu bimo byo abujile kuyuka aye nangwa bamalaika, byayukiletu kana Shanji.—Mako 13:32.
Nanchi Yesu wabujiletu kwesakana ne Lesa kimye kyo ajinga panopantanda mu bumuntu nyi? Ine. Nangwatu panyuma ya lufu ne kusangulwa kwanji, Yesu bamulumbulula mu Baibolo amba kechi waesakene ne Lesa ne. Mutumwa Paulo wituvululamo’mba ‘Lesa wakila Kilishitu.’ (1 Kolinda 11:3, Today’s English Version) Baibolo waamba’mba mu moba a kulutwe ‘kimye bintu byonse kyo bikalamwa ne Kilishitu, ponkapo ne aye Mwana naye ukakokela Lesa wamukokeshesha bintu byonse, amba Lesa alame byonse mu byonse.’—1 Kolinda 15:28, TEV.
Kwambatu kine, Yesu kechi Lesa wa Bulume Bonse ne. O ene mambo kyo atongwejile Shanji amba “Lesa wami.”—Lumwekesho 3:2, 12; 2 Kolinda 1: 3, 4.a
[Tubyambo twa mushi]
a Umvwe mukeba kuyukilapo byavula pa uno mutwe, monai mapeja 201-204 mu buku wa Nanchi Baibolo Kine Ufunjisha’mba Ka? wanembwa na Bakamonyi ba kwa Yehoba.
[Mabulañano pa peja 7]
Kabiji Yesu waambile’mba kuji bintu bimo byo abujile kuyuka aye nangwa bamalaika, byayukiletu kana Shanji