Mapesho “mu Bimye Byawama ne Byakatazha.”—2 Timo. 4:2.

BYO kyanangijilenga ku mwaka wa 2000, Bakamonyi mu Georgia bavujilenga bingi kabiji bantu bakebelenga kufunda bukine bavujile. Mu 1998, ku Kivuluko kya lufu lwa kwa Kilishitu kwataainwe bantu 32,409.

Pano bino, basapwishi bavula, kubikapotu ne bakulumpe mu kipwilo kechi babanjile mu bukine ne, kabiji kechi bayukile byavula ne. Onkao mambo, bakebewenga kwibafunjisha byavula pa mwingilo wa Lesa. Pano bañanyi bafwainwe kwibafunjisha?

Jibumba ja Yehoba Jibakwashishe Bingi

Ba Arno ne ba Sonja Tüngler bataainwe ku Sukulu wa Gileada mu Germany, bebatumine na kwingijila ku Georgia mu March 1998. Mu yenkawa mwaka, Jibumba Jitangijila jaitabizhe kuba’mba bashimike ofweshi wa kyalo mu Georgia wa kutangijila mwingilo na bukwasho bwa ofweshi wa musampi wa mu Russia.

Kavoto ka Kyalo katendekele kutangijila busapwishi. Mwingilo wetu byo bamuswishishe ku kafulumende, balongo batendekele kutambula mabuku alumbulula Baibolo kufuma ku ofweshi wa musampi wa mu Germany. Na mambo a kuba mwingilo wetu bamuswishishe mwayila mizhilo, balongo bapotele mapunzha pa kushimikila Mazubo a Bufumu ne ofweshi wa musampi.

Kufunjisha Balongo bya Kwingila Mwingilo

Basapwishi bavula kechi basapwilanga ku nzubo ku nzubo kimye kyo bakainye mwingilo wetu ku kafulumende wa Soviet ne. Ba Arno Tüngler bavuluka’mba: “Basapwishi bavula baingilanga bingi busapwishi bwa mu mikwakwa, bino bachechetu bo baingilanga busapwishi bwa ku nzubo ku nzubo ne kubwela ku bantu bakebelenga kufunda bukine.”

Ba Davit Devidze batendekele kwingijila pa ofweshi wa kyalo mu May 1999, bashimikizhe’mba: “Mwingilo wabayile bingi pa Betele ne mu kyalo kyonsetu. Kwajinga bintu byo twatangilenga bino kechi twayukile bya kwibingijisha ne. Onkao mambo, twafunjijilenga ku balongo bayukile bingi mingilo bafumanga ku Jibumba Jitangijila.”

Mwingilo wa kufunjisha balongo watendekele mu Georgia. Pano bino, byonka byo kikalatu ku bonse baya na kwingijila kubena kukebewa basapwishi bavula, balongo bafunjishenga bakwabo, nabo kuji bimo byo bafunjijilengako ku balongo bo bafunjishenga. (Maana 27:17) Kya kine, aba baishile na kwitukwasha nabo bafunjijileko byavula ku balongo ne banyenga ba mu Georgia.

Bakamonyi ba mu Georgia Bamwesheshe Byubilo Byawama Bingi

Ba Arno ne ba Sonja bakivuluka byo bebatambwijile bulongo kimye kyo bafikile mu Georgia. Balongo ne banyenga bebakwashishe bingi kupimpulako bwikalo ne kwingila bulongo mwingilo wabo.

Ba Sonja bavuluka bumpanyi bwa balongo. Bashimikizhe’mba: “Ba mukazhi ne mulume baikalanga kipi kipi betuletelanga kajo kawama bingi. Nyenga mu kipwilo kyo twafikijilemo witusendeleko mu busapwishi, kabiji witubuujile byavula bingi pa kisho kya bena Georgia. Nyenga mukwabo witufunjishe mulaka wa bena Georgia.”

Ba Warren ne ba Leslie Shewfelt, bo batumine ku Georgia kufuma ku Canada mu 1999, baambile’mba: “Twaumvwine bingi bulongo pa butemwe bwitumwesheshe balongo ne banyenga bena Georgia. Bonsetu, bakulumpe ne banyike bamwesheshenga byo betemwa bene na bene.”

Aba bo batumine kuya na kwingijila mu Georgia kufuma mu byalo bikwabo kechi batele muchima pa makatazho o bapichilengamo ne, bino bateletu muchima pa byubilo byawama bya bantu ba mu kino kyalo. Kabiji byubilo byawama bya bamishonale byalengejile kwibatemwa bingi ku balongo bena Georgia.

Bantu Baakamwanga Lesa Batambwijile Bukine

Kufuma mu 1990 kufika mu 2000, bantu baakamwanga Lesa batwajijile kutambwila bukine. Mu mwaka wa 1998, bantu 1,724 babatizhiwe. Ñanyi kintu kyalengejile bena Georgia bavula kutemwa bukine?

Ba Tamazi Biblaia, baingijile bukalama bwa mwanzo pa myaka yavula balumbulula’mba: “Kutemwa Lesa kyo kintu bantu bavula kyo bebafunjisha kufumatu ku bwanyike. Onkao mambo, byo twisambilenga nabo byambo bya mu Baibolo, bafikenejiletu kuswa bukine.”

Ba Davit Samkharadze, bafunjisha Sukulu wa Basapwishi ba Bufumu baambile’mba: “Umvwe muntu watatula kufunda Baibolo, balongo banji ne balunda nanji javula bakeba kumuvulañanya. Na mambo a kukebesha kukanya muntu ubena kufunda Baibolo, javula kitanwa kuba’mba nabo batendeka kufunda Baibolo!”

Byambo bya Bufumu byakumbene konse konse kabiji byapimpwile bwikalo bwa bantu bavula. Mu April 1999, bantu bataainwe ku Kivuluko bajinga 36,669.

“Kuji Balwanyi Bavula”

Mutumwa Paulo wanembele pa mwingilo wa kusapwila ye aingijile mu muzhi wa kala wa Efisesa amba: “Banshinkwila kibelo kikatampe kya mwingilo, bino kuji balwanyi bavula.” (1 Ko. 16:9) Byambo bya kwa Paulo byalumbulula bingi bulongo bintu byapichilemo Bakamonyi mu Georgia byo papichiletu bañondo bacheche kufuma kimye kya Kivuluko mu 1999.

Mu yenkawa mwaka mu ñondo wa August, pulishiti aye Vasili Mkalavishvili ne jibumba janji ja bantu ba mu chechi wa Orthodox, bakonkenye pamo bantu bavula bingi mu muzhi wa Tbilisi ne kusoka mabuku etu. Ino yo yajinga ntendekelo ya kumanyika bantu ba Lesa pa myaka ina yalondejilepo.

Pa 17 October, 1999, jibumba ja bantu 200 bakanama ba mu chechi wa Orthodox, javulañenye kupwila kwa Kipwilo kya Gldani mu muzhi wa Tbilisi. Baingijishe mipinyi ne tukonkolo, kabiji bakozhezhe bantu bavula bingi bataainweko, kabiji Bakamonyi bavula bebakozhezhe bingi kya kuba bakapupulukijilenga mu kipatela.

Kyataminekotu ke kya kuba’mba bano bambanzhi kechi bebakashile ne, batwajijiletu na kumanyika Bakamonyi. Biloolo bimo mu kafulumende, kubikapotu ne Ndamakyalo Shevardnadze bakainyenga bantu kulukuka bakwabo, bino kafwako kyo baubilepo pa bantu baubilenga bino ne. Inge Bakamonyi bebalukuka, papitanga kimye kyabaya bingi pa kuba’mba bakapokola beye.

Kabiji ntomesha wa mu nzubo ya mizhilo aye Guram Sharadze watendekele mukwekele wa kupitamo na kwamba byatama bingi pa Bakamonyi. Waambilenga’mba Bakamonyi bantu bakanama bingi. Kyamwekeshetu patoka’mba “bimye byawama” bya kusapwila mambo awama byapwile.

Jibumba ja Yehoba Jabuujile Bakamonyi bya Kuba Umvwe Kebebamanyike

Jibumba ja Yehoba jakwashishe bingi Bakamonyi mu kyalo kya Georgia. Balongo bebabuujile bya kuba inge bebalukuka. Kabiji bebavulwilemo ene mambo bena Kilishitu ba kine o bebamanyikila.—2 Timo. 3:12.

Kabiji jibumba ja Yehoba jakwashishe bingi balongo bo batwajile mu bije bya mambo. Mulongo waingijilanga ba pa ofweshi wa musampi mu Georgia, mu dipatimenti utala pa bya mambo a mu bije, uvuluka’mba: “Mu yoya myaka ina ya lumanamo, twanembele makalata kukilaila pa 800 a kwijizhanya pa byubilo bya kwa Vasili Mkalavishvili ne jibumba janji. Twalombele biloolo mu kafulumende ne tubungwe tutala pa luusa lwa bantu kuba’mba betukwashe. Ofweshi mukatampe wa ntanda yonse wa Bakamonyi ba kwa Yehoba wasampenye masawakya amwesheshenga Bakamonyi byo bebamanyikilenga, bino kechi balekele kwibamanyika ne.”a