Bavulukanga Mulenga Wabo

Bavula bo twaambapo mu bibaaba byafumako ke banyike ‘bavuluka Mulenga wabo mu moba a bwanyike bwabo.’ (Sapwi. 12:1) Bavujilapo pa bapainiya 3,197 baji mu kyalo kya Georgia ke banyike baji na myaka 25 ne kubwela panshi. Ñanyi bintu byalengela’mba bano banyike bavula bayilengako palutwe mu mwingilo wa Lesa?

Kuji bintu byavula bilengela kino. Kimo kyalengela ke kya kuba’mba bisemi mu Georgia byakwatankana bingi. Ba Konstantine baji na baana batanu bo bafunjisha bukine, balumbulwile’mba: “Kyandengejile kufunda bukine ke kuyuka kuba’mba Yehoba ye Shetu witutemwa bingi. Byo naikele na baana, nafuukwilepo kwibakwasha kuyuka kino kishinka.”

Ba Malkhazi ne benakwabo, baji na baana basatu bebikako bingi kukwatankana mu kisemi kyabo. Baambile’mba: “Kimye kyonse twambila baana betu kulanguluka pa bintu byo batemwa pe atweba ne pa bankasabo ne bakolojabo. Apa bino twibambila kwamba byobyo bintu pa kupopwela kwa kisemi. Kyafumamo ke kya kuba’mba bafunda kuta muchima pa bintu byawama byuba bakwabo ne kwibasanchila.”

“Luno Mbena Kwikala Bwikalo Bwawama!”

Kununga pa mwingilo wingila bansemi wa kufunjisha baana, bakulumpe mu kipwilo bapapo banyike mingilo mu kipwilo. Nestori wabatizhiwe saka aji na myaka 11 washimikizhe’mba: “Bakulumpe mu kipwilo batendekele kumpapo tumingilo tucheche mu kipwilo saka nkijitu mucheche. Kino kyankwasha kuyuka’mba nanema mu kipwilo.”

Kupwanañana na bantu baji na byubilo byawama ne bukwasho bwa bakulumpe mu kipwilo nako kwanema bingi. Kolojanji Nestori aye Koba washimikizhe’mba: “Mu moba o najinga mwanyike, bintu byakatezhe bingi kupusanako na moba abena kukomenamo bankasami. Mukulumpe mu kipwilo wajinga mwanyike ye nafunjilangako byavula wandangulukilangako kabiji kechi wanzhachishanga ne. Wankwashishe bingi pa kuba’mba mbwele kwi Yehoba.”

Lelo jino, Nestori ne Koba, kubikapotu ne nyenga yabo aye Mari, babena kwingijila mu nyaunda iji kwalepa bingi. Koba waambile’mba, “Luno mbena kwikala bwikalo bwawama!”

“Baana Bami Batwajijila Kwenda mu Bukine”

Ofweshi wa musampi utundaika bansemi kwibikako kufunjisha baana babo, kupichila mu kwibavwangamo mu mingilo ya Bufumu. Umo wa mu Kavoto ka Musampi waambile’mba: “Twibatemwa bingi bano banyike, onkao mambo, twibatundaika ne kwibakwasha kufikizha bikonkwanyi byabo mu mwingilo wa Lesa.”

Kwingijila pamo ne kupwanañana na balongo ne banyenga bakosa mu lwitabilo kukwasha bingi banyike. Mamuka waingijijile pamo na balongo bafumine mu byalo byapusana pusana pa kushimika Nzubo ya Kubuñenamo mu muzhi wa Tbilisi, waambile’mba: “Kupwanañana na bantu bafumine mu byalo bingi kwafunjishe bintu byavula bingi. Kununga pa kufunjilako busendwe, nafunjile ne bintu byavula bingi byakoseshe bulunda bwami na Lesa.”

Kukwatankana mu bisemi, lutundaiko lwa bakulumpe mu kipwilo, ne kupwanañana na bantu baji na byubilo byawama kwakwasha bingi banyike bavula mu Georgia. Bansemi babo bamba byonka byaambile mutumwa Yoano amba: “Kafwako kintu kindetela lusekelo kyakila kino ne: kya kumvwa’mba baana bami batwajijila kwenda mu bukine.”—3 Yoa. 4.

Kukosesha Mwingilo wa Kutuntulula Mabuku

Mu mwaka wa 2013, Jibumba Jitangijila jakambizhe misampi yonse kumona inge kya kuba kubena kukebewa mabuku mu milaka ikwabo yamba bantu mu manyaunda a misampi yabo. Kine kintu kyo baubijile bino ke kukeba kukwasha bantu bavula kumvwisha mambo awama.

Onkao mambo, musampi wa mu Georgia wafuukwilepo kutuntulula mabuku amo mu mulaka wa Svan ne wa Mingrelia, ino milaka ibiji ipasha bingi na mulaka wa bena Georgia kya kuba bamo beimona’mba ke imotu, yapusanakotu pacheche.

Bapainiya babambakana ba mu kibunji kya Svaneti banembele’mba: “Bantu bamba mulaka wa Svan batemwa bingi kufunda pe Lesa kabiji banemeka bingi Baibolo. Ne boba bakankazhamanga kimye kitanshi kutambula mabuku etu batatwile kutambula mabuku o batuntulwijile mu mulaka wabo wa kisemwa.”

Basapwishi bonse bamba mulaka wa Mingrelia batemenwe bingi byo batatwile kupwila kwingijisha mulaka wabo wa kisemwa. Nsongwalume painiya wa jizhina ja Giga waambile’mba: “Luno pa kupwila kechi ntanga mikumbu ya kutanga ne, ñambatu mu byambo byami. Naleka byo naubanga kala bya kutuntulula byambo mu muchima bino apa nakumbulapo.”

Zuri, mukulumpe mu kipwilo kya mulaka wa Mingrelia mu muzhi wa Tkaia naye waambile’mba: “Napita mu bintu byavula bingi mu bwikalo bwami, bya lusekelo ne bya bulanda, bino kechi nakijijilepo ne mipolo ne. Bino kimye kitanshi kyo twaimbile nyimbo ya Bufumu mu mulaka wa Mingrelia, bonsetu mu luonde bajijile ne mipolo, kabiji ne amiwa najijile.”

Bintu Bikatampe Byaubiwa Katataka

Kintu kikatampe kyaubiwa mu bwikalo bwa Bakamonyi mu Georgia kyamwekele pa Kibelushi pa 6 April, 2013, kimye Mulongo David Splane wa mu Jibumba Jitangijila kyo aambile jashi ja kupana bishimikwa bya musampi byo bawamishishe ne byo banungileko, Nzubo ya Kubuñenamo, ne bishimikwa bya masukulu a Baibolo. Balongo 338 bafumine mu byalo 24 baishile na kutanwako, kabiji Bakamonyi bavula batambwijile bano balongo mu mazubo abo.

Juba jalondejilepo, Mulongo Splane waambile jashi ku bantu 15,200, bavula batelekelenga ku jino jashi kupichila mu mavidyo o basokankenye mu Mazubo a Bufumu, kabiji bakwabo batelekelengakotu jiwi mu mapunzha apusana pusana a mu kino kyalo. Kuno ko kupwila kukatampe bingi kwataainwe bantu bafumine mu byalo byapusana pusana kwajingako mu kyalo kya Georgia. Kyawamine bingi pa kumona balongo ne banyenga byo betundaikilenga bene na bene, ne lusekelo lo bajinga nalo. Mulongo umo ukitwala waambile’mba, “Pano luno nayuka ntanda ipya byo ikekala.”

Sukulu wa Baibolo wa Bena Kilishitu Baji mu Masongola luno ubena kutelwa’mba Sukulu wa Basapwishi ba Bufumu, ubena kukwasha bingi bantu ba Yehoba mu Georgia. Kufuma mu 2013, ku uno sukulu kwataanwa bantu 200. Na mambo a kusanta pa byo bebafunjisha, aba batanwa ku uno sukulu bepana kuya na kwingijila konse ko bakonsha kwibatuma kubena kukebewa basapwishi bavula.

“Kukanamina Bintu bya Kulutwe”

Tubena kusanchila bingi basapwishi ba Bufumu batanshi basapwijilenga kwa kubula moyo mu Georgia, balengela mambo awama kufika ku bantu bonse mu kino kyalo. Butemwe bo batemwa Lesa ne bantu ne lwitabilo lwabo, kuchinchika, ne mashinda o baingijishe, Yehoba wiapesha bingi.

Balongo ne banyenga kukila pa 18,000 mu Georgia batwajijila kwingila mwingilo waingijile basapwishi batanshi mu kino kyalo wa kukwasha bantu kwimwena bulume bwa Mambo a Lesa.—Fili. 3:13; 4:13.