“Kino kyo kya Buswanyi kya Bakalume ba Yehoba.”—Isa. 54:17.

BAKALUME ba Yehoba mu kyalo kya Georgia basapwila mambo awama na mukoyo, kabiji Yehoba wapesha bingi mwingilo wabo. Kyafumamo ke kya kuba’mba mambo awama afika ne monse mwapela kino kyalo.

Pa myaka ya kulutwe kuno, basapwishi babambakana ne bapainiya babena kuya na kwingijila mu manyaunda mo babula kwingijila javula. Mu mapunzha a mitumba, pa kuba’mba basapwishi baye na kusapwila bantu bekala mu mizhi imo, bafwainwa kukanjila myotoka yazandama bulongo iji na mawilo akatampe nangwa myotoka yo bakashila ku ntambo ya malaichi ipita peulu.

Kutendeka mu mwaka wa 2009, ofweshi wa musampi wa mu Georgia utumina bipwilo byonse mutanchi wa manyaunda mwabula bipwilo, ne kulomba basapwishi kuya na kwingijilamo. Bamo pa kuba’mba bengileko uno mwingilo, baleka bintu bimo byanema byo boba ne kuya ku ano mapunzha.

Ba Temuri ne ba Ana Bliadze po po batweleletu mu masongola kimye kyo baumvwine’mba kubena kukebewa basapwishi mu kibunji kya mitumba kya Ajaria. Kabiji po po bapoteletu mpunzha kuba’mba bashimikepo nzubo yabo. Bino bakebelenga kuya na kwingilako pakatampe mu mwingilo wa kusapwila.

Patanshi, baikeleko mulungu umo mu kibunji kya Ajaria. Ba Temuri bavuluka bintu byo bamwene kimye kitanshi kyo bafikiletu. Baambile’mba: “Basapwishi baendanga miseke yalepa pa kuba’mba bafike kwajinga mizhi ya bantu. Twajinga na motoka wazandama bulongo wajinga na mawilo akatampe, kabiji ponkapotu twalangulukile’mba usakwitukwasha bingi.”

Ba Ana banungilepo’mba: “Kyakatezhe bingi kuvilukila ku mpunzha ikwabo, mambo twatemenwe bingi kipwilo kyo twajingamo ne kisemi kyetu. Bino twimwenejile Yehoba byo etupesheshe.” Papita ne myaka isatu ba Temuri ne ba Ana yo baikala mu kibunji kya Ajaria na kukwasha jibumba jiji mu muzhi wa Keda.

Bapainiya Bakebelepo Mashinda mwa Kumwena Bikebewa

Bapainiya beikajila bakwasha bingi mwingilo wa kusapwila mu mapunzha aji mwalepa. Inge kimye kyo bebabuujile’mba kyo bakaleka kwingila bupainiya bwiikajila kyafika, bapainiya bavula bafuukulangapo kutwajijila kwikala konkakwa pa kuba’mba bakwashe bantu bo batendekele kufunjisha Baibolo.

Banyenga babiji bapainiya baji na jizhina jimo ja Khatuna, bebatumine kuya na kwingijila mu muzhi wa Manglisi. Kechi kwajingapo Kamonyi ne, bino bano banyenga baingijile bingi bulongo mwingilo wa kusapwila. Mu ñondo mutanshi bajinga na bantu 9 bo bafunjishenga Baibolo, mu ñondo walondejilepo baikele na bantu 12, mu ñondo wa busatu baikele na bantu 15, kabiji mu ñondo wa buna baikele na bantu 18 bo bafunjishenga. Pa kuba’mba batwajijile kukwasha bano bantu bo bafunjishanga Baibolo, bafuukwilepo kutwajijila kwikala mu muzhi wa Manglisi.

Bano banyenga bakebelepo mashinda mwa kumwena bikebewa mu bwikalo. Bantu bavula baya na kufwakesha muzhi wa Manglisi batemwa kajo ko balenga kufuma ku bipangwa bya ku kichi kyapasha mulemu, kano kajo bamba’mba kalengela mubiji wa muntu kwikala bulongo. Onkao mambo, kimye kitanshi banyenga batolanga tubipangwa tupanga ku bino bichi ne kulenga kajo kawama bingi ko bapoteshanga pa kisankanyi. Bino juba jimo batambwijile bukwasho bo babujilenga kuketekela.

Juba jimo, muntu ye bafunjishanga Baibolo wibaletejile twana twa nzolo twavula. Uno mwanamukazhi walumbulwile’mba kyaje wanji umo wasemejile make pa mpunzha pafyamika kabiji bamwenekotu waiya na twana pa muzhi. Uno inetu wafuukwilepo kupa bamufunjishanga Baibolo tuno twana twa nzolo to abujile kubajila pa banzolo bo ajinga nabo. Nyenga umo pa bano bapainiya wayukile bingi bya kulama banzolo, onkao mambo, bafuukwilepo kulenga kikumbi.

Nyenga umo pa bano bapainiya waambile’mba: “Bukwasho bwa Yehoba, ne balongo mu kipwilo ne bantu bo twafunjishanga Baibolo bwitulengejile kwikala myaka itanu mu muzhi wa Manglisi.” Lelo jino, mu uno muzhi muji jibumba ja balongo ne banyenga babambakana.

Kwingila Bupainiya mu Manyaunda Muji Bantu Bamba Milaka ya ku Byalo Bingi

Mu myaka ya kulutwe kuno, mu kyalo kya Georgia mwaiya bantu bavula bingi bafuma mu byalo bikwabo. Bapainiya bavula bamona kuba’mba kuji nyaunda ya katataka yo bafwainwa kwingijilamo. Onkao mambo, batendeka kufunda milaka nabiji Arabic, Azerbaijani, Kichainizi, Kizungu, mulaka wa bena Pelisha, ne mulaka wa bena Turkey.

Nangwa kya kuba bapainiya bavula babena kukwasha mabumba a milaka ya ku byalo bingi, bakwabo baya na kwingijila mu byalo bingi mubena kukebewa basapwishi bavula. Ba Giorgi ne ba Gela bajingatu na myaka ya mu ma 20 kimye kyo bayile na kwingijila mu kyalo kikwabo. Ba Giorgi baambile’mba: “Twakebanga kwingijila Yehoba papelela bulume bwetu, kabiji kuvilukila ku kyalo kikwabo jo jishinda jimo jo twaubijilemo kino.”

Ba Gela byo bavulukile byo baingijilenga kokwa, baambile’mba: “Kwikala mukulumpe mu kipwilo mu kyokya kyalo, kwafunjishe bintu byavula bingi. Ke kintu kyawama bingi inge Yehoba wakwingijisha kukwasha ‘mikooko’ yanji.”—Yoa. 21:17.

Ba Giorgi banungilepo’mba: “Kwajinga makatazho o twapichilengamo, bino twatele muchima pa mwingilo wetu kabiji kechi twilangulwishenga ne. Twamwene’mba twaingijilenga mwingilo wanema.”

Mulongo mukwabo, naye uji na jizhina ja Gela, wayile na kwingijila mu kyalo kya Turkey pa myaka icheche. Uvuluka’mba: “Kimye kitanshi, na mambo a kubula kuyuka bulongo mulaka, kechi naikelenga na lusekelo ne. Pano bino, byo nafunjile mulaka ne kutendeka kwisamba bulongo na balongo ne banyenga ne na bantu mu busapwishi, naikele bingi na lusekelo.”

Ba Nino baingijila bupainiya mu muzhi wa Istanbul, mu kyalo kya Turkey pa myaka kukila pa 10 baambile’mba: “Kufumatu pa juba jitanshi jo nafikile, nemwenejile Yehoba byo ankwashishenga. Kwingila bupainiya mu kyalo kingi kwitulengela kwimena pa juba pa juba bintu byo tutanga mu Buku wa Mwaka.”