Ɛzra
4 We di pipul dɛn na Juda ɛn Bɛnjamin dɛn ɛnimi dɛn yɛri se di wan dɛn we di Babilonian dɛn bin kapchɔ, we dɔn kam bak, de bil tɛmpul fɔ Jiova di Gɔd na Izrɛl, 2 dɛn go wantɛm wantɛm to Zɛrubabɛl ɛn di wan dɛn we de bifo na dɛn papa say ɛn tɛl dɛn se: “Lɛ wi jɔyn una fɔ bil; bikɔs wisɛf de wɔship* una Gɔd jɔs lɛk una ɛn wi dɔn de sakrifays to am frɔm Kiŋ Isaadɔn na Asiria we briŋ wi kam na ya in tɛm.” 3 Bɔt Zɛrubabɛl, Jɛshwa, ɛn di ɔda wan dɛn we de bifo na dɛn papa say na Izrɛl tɛl dɛn se: “Una nɔ gɛt ɛni rayt fɔ jɔyn wi fɔ bil os fɔ wi Gɔd, na wi nɔmɔ go bil am fɔ Jiova di Gɔd na Izrɛl, jɔs lɛk aw Kiŋ Sayrɔs we na di kiŋ na Pashia dɔn tɛl wi fɔ du.”
4 So di pipul dɛn na di land bin kɔntinyu fɔ mek di pipul dɛn na Juda dɛn at pwɛl ɛn mek dɛn fred so dat dɛn go lɛf fɔ du di bildin wok. 5 Dɛn pe advaysa dɛn fɔ de agens dɛn ɛn mek di tin dɛn we dɛn dɔn plan nɔ wok. Dɛn bin de du dis insay Kiŋ Sayrɔs na Pashia in tɛm te di tɛm we Kiŋ Darayɔs bi kiŋ na Pashia. 6 We Aazuirɔs bigin fɔ rul as kiŋ, dɛn rayt bad tin bɔt di pipul dɛn na Juda ɛn Jerusɛlɛm. 7 Insay Kiŋ Atazaksis na Pashia in tɛm, Bishlam, Mitridat, Tabiɛl, ɛn in ɔda kɔmpin dɛn bin rayt lɛta to Atazaksis di kiŋ; dɛn translet di lɛta insay Arameik, dɛn rayt am wit Arameik lɛta dɛn.*
8 * Riɔm di chif gɔvmɛnt ɔfisa ɛn Shimshay di sɛktri rayt lɛta to Kiŋ Atazaksis. Insay di lɛta, dɛn tɔk bad bɔt di pipul dɛn na Jerusɛlɛm. Dɛn rayt se: 9 (I kɔmɔt frɔm Riɔm di chif gɔvmɛnt ɔfisa, Shimshay di sɛktri, dɛn ɔda kɔmpin dɛn, di jɔj dɛn, di dɛpiti gɔvnɔ dɛn, di sɛktri dɛn, di pipul dɛn na Irɛk, di Babilonian dɛn, di pipul dɛn na Susa, dat na, di Ilamayt dɛn, 10 ɛn di ɔda neshɔn dɛn we di gret ɛn ɔnɔrebul Asanapa bin kapchɔ ɛn kam put na di siti dɛn na Sameria, ɛn di ɔda wan dɛn na di eria Biɛn di Riva. 11 Dis na wan kɔpi ɔf di lɛta we dɛn bin sɛn to am.)
“Kiŋ Atazaksis, yu savant dɛn, di man dɛn we de na di eria Biɛn di Riva de rayt dis lɛta to yu: 12 Wi want lɛ di kiŋ no se di Ju dɛn we kɔmɔt to yu ɛn kam to wi dɔn rich na Jerusɛlɛm. Dɛn de bil di siti bak. Di pipul dɛn na dis siti wikɛd ɛn trangayes, ɛn dɛn de dɔn fɔ mek di wɔl dɛn ɛn mek di fawndeshɔn dɛn bak. 13 Wi want lɛ di kiŋ no se if dɛn bil dis siti bak ɛn dɔn fɔ mek di wɔl dɛn, dɛn nɔ go pe lokal taks, biznɛs taks, ɔ rod taks, ɛn dis go mek dɛn nɔ gɛda bɛtɛ mɔni fɔ di kiŋ dɛn. 14 Bikɔs wi de it di sɔl na di pales* ɛn wi nɔ want fɔ si dis kayn bad tin apin we go afɛkt di kiŋ, nain mek wi sɛn dis lɛta fɔ lɛ di kiŋ go no, 15 so dat dɛn go chɛk di istri buk dɛn bɔt di wan dɛn we bin de bifo yu. If yu chɛk di istri buk dɛn yu go si se di pipul dɛn na dis siti trangayes, na prɔblɛm to kiŋ dɛn ɛn prɔvins dɛn, ɛn di pipul dɛn we de de dɔn de tɔn agens gɔvmɛnt dɛn frɔm trade trade. Na dat mek dɛn dɔnawe wit dis siti. 16 Wi want lɛ di kiŋ no se if dɛn bil dis siti bak ɛn dɔn fɔ mek di wɔl dɛn, yu nɔ go ebul fɔ kɔntrol di eria Biɛn di Riva.”
17 Di kiŋ sɛn wɔd to Riɔm we na di chif gɔvmɛnt ɔfisa ɛn Shimshay we na di sɛktri ɛn dɛn ɔda kɔmpin dɛn we de na Sameria ɛn di ɔda eria dɛn we de Biɛn di Riva:
“A de grit una! 18 Di lɛta we una sɛn to wi, dɛn dɔn rid* am klia wan bifo mi. 19 A tɛl mi savant dɛn fɔ chɛk di istri buk dɛn, ɛn dɛn faynd awt se frɔm trade trade di pipul dɛn na dis siti bin de tɔn agens kiŋ dɛn, mek trangayes ɛn nɔ bin de tek kɔntrol. 20 Pawaful kiŋ dɛn bin de oba Jerusɛlɛm we bin de rul di wan ol eria Biɛn di Riva, ɛn pipul dɛn bin de pe lokal taks, biznɛs taks, ɛn rod taks to dɛn. 21 Tɛl di man dɛn fɔ stɔp di wok, so dat dɛn nɔ go bil di siti bak te a tɛl dɛn fɔ du so. 22 Una mek shɔ se una du wetin a tɛl una, so dat natin bad nɔ go apin igen we go afɛkt di kiŋ.”
23 Afta dɛn dɔn rid Kiŋ Atazaksis in lɛta bifo Riɔm ɛn Shimshay di sɛktri ɛn dɛn kɔmpin dɛn, dɛn go kwik kwik wan na Jerusɛlɛm to di Ju dɛn ɛn tɛl dɛn fɔ stɔp bay fos. 24 Na da tɛm de di wok we dɛn bin de du pan Gɔd in os, we bin de na Jerusɛlɛm, bin stɔp; ɛn i bin lɛf so te di sɛkɔn ia we Kiŋ Darayɔs na Pashia de rul.