Sam

9 E Jiova, a go prez yu wit ɔl mi at;

A go tɔk bɔt ɔl yu wɔndaful wok dɛn.

 2 A go gladi pasmak bikɔs ɔf yu;

E di Wan We De Pantap Ɔlman, a go siŋ fɔ prez* yu nem.

 3 We mi ɛnimi dɛn rɔnawe pan mi,

Dɛn go fɔdɔm ɛn day bifo yu.

 4 Yu de tɔk fɔ mi ɛn mek a gɛt jɔstis;

Yu sidɔm na yu tron de jɔj di rayt we.

 5 Yu dɔn kɔrɛkt neshɔn dɛn ɛn dɔnawe wit di wikɛd wan dɛn,

Nɔbɔdi nɔ go mɛmba dɛn* sote go.

 6 Yu dɔn dɔnawe wit di ɛnimi dɛn sote go;

Yu dɔn dɔnawe wit dɛn siti dɛn,

Ɛn nɔbɔdi nɔ go mɛmba dɛn igen.

 7 Bɔt Jiova sidɔm na in tron sote go;

I de kɔntinyu fɔ rul, ɛn ɔltɛm i de du tin fia wan we i de jɔj.

 8 I go jɔj di pipul dɛn we de na di wɔl di rayt we;

I go jɔj di neshɔn dɛn akɔdin to wetin rayt.

 9 Jiova go bi sef ples fɔ ayd fɔ di wan dɛn we dɛn de sɔprɛs;

I go bi sef ples fɔ ayd di tɛm we trɔbul de.

10 Di wan dɛn we sabi yu nem go abop pan yu;

E Jiova, yu nɔ go ɛva lɛf di wan dɛn we de luk fɔ yu.

11 Siŋ fɔ prez Jiova we de na Zayɔn;

Mek lɛ pipul dɛn no wetin i de du.

12 Di Wan we de fɛt fɔ di pipul dɛn we dɛn kil go mɛmba dɛn;

I nɔ go fɔgɛt di kray we di wan dɛn we de sɔfa de kray.

13 E Jiova, sɔri fɔ mi; si di sɔfa we di wan dɛn we et mi de mek a sɔfa,

Yu we de pul mi kɔmɔt na di grev,

14 So dat a go tɔk bɔt di gud tin dɛn we yu de du na di siti get na Zayɔn,*

Ɛn gladi fɔ di tin dɛn we yu dɔn du fɔ sev mi.

15 Di neshɔn dɛn dɔn go dɔŋ na di ol we dɛn dig;

Dɛn fut dɛn dɔn fasin na di trap we dɛn ayd.

17 Di wan dɛn we wikɛd ɛn ɔl di neshɔn dɛn we dɔn fɔgɛt Gɔd,

Go go na di Grev.*

18 Bɔt nɔto ɔltɛm dɛn go fɔgɛt di po wan dɛn;

Di op we di wan dɛn we ɔmbul gɛt nɔ go ɛva dɔn.

20 E Jiova, mek lɛ dɛn fred,

Mek lɛ di neshɔn dɛn no se dɛn na ɔdinari mɔtalman dɛn. (Sila)