Mak

3 Wan ɔda tɛm i go na wan sinagɔg,* ɛn wan man we in an bin day* bin de de. 2 So dɛn bin de wach am gud gud wan fɔ si if i go mɛn di man di Sabat de, so dat dɛn go tɔk se i dɔn du bad. 3 I tɛl di man we in an day* se: “Grap, kam midul.” 4 Dɔn i aks dɛn se: “I rayt fɔ du gud ɔ fɔ du bad, fɔ sev layf* ɔ fɔ kil insay di Sabat?” Bɔt dɛn nɔ tɔk natin. 5 We i dɔn luk dɛn, i vɛks ɛn in at rili pwɛl bikɔs di pipul dɛn at tan lɛk ston, so i tɛl di man se: “Stret yu an.” Ɛn i stret in an ɛn in an wɛl. 6 Na de di Faresi dɛn go bigin fɔ ol mitin wantɛm wantɛm wit Ɛrɔd in pati pipul dɛn, so dat dɛn go kil am.

7 Bɔt Jizɔs go na di si wit in disaypul dɛn, ɛn bɔku bɔku pipul dɛn na Galili ɛn Judia fala am. 8 Bɔku bɔku pipul dɛn ivin kɔmɔt na Jerusɛlɛm, na Idumia, frɔm di ist pat na di Jɔdan, arawnd Taya ɛn Saydɔn ɛn kam to am we dɛn yɛri bɔt di bɔku tin dɛn we i de du. 9 Ɛn i tɛl in disaypul dɛn fɔ rɛdi wan smɔl bot fɔ am so dat di pipul dɛn nɔ go kam prɛs pan am. 10 Bikɔs i mɛn bɔku pipul dɛn, ɔl di wan dɛn we sik bad bad wan kam gɛda rawnd am fɔ tɔch am. 11 Ivin di dimɔn dɛn bin de butu bifo am we dɛn si am ɛn ala se: “Yu na Gɔd in Pikin.” 12 Bɔt bɔku tɛm, i bin de tɛl dɛn strikt wan se lɛ dɛn nɔ mek pipul dɛn no bɔt am.

13 I go ɔp wan mawntin ɛn kɔl di wan dɛn we i want, ɛn dɛn kam to am. 14 I mek* wan grup. Na 12 man dɛn bin de na dis grup, ɛn i kɔl dɛn apɔsul. Na dɛn go de fala am, ɛn i go de sɛn dɛn fɔ go prich 15 ɛn gi dɛn pawa fɔ pul dimɔn dɛn.

16 Ɛn di 12 man dɛn we de na di grup we i mek* na Saymɔn we i bin gi di nem Pita, 17 Jems we na Zɛbidi in pikin ɛn Jɔn we na Jems in brɔda (i gi dɛn di nem Boanajis, we min “Tɛnda in Pikin dɛn”), 18 Andru, Filip, Batalomi, Matyu, Tɔmɔs, Jems we na Alfiɔs in pikin, Tadiɔs, Saymɔn di Kenanian,* 19 ɛn Judas Iskariɔt we leta ɛp pipul dɛn fɔ arɛst am.

Dɔn i go insay wan os, 20 ɛn bɔku pipul dɛn kam gɛda de bak, so dɛn nɔ bin ivin ebul fɔ it. 21 Bɔt we in fambul dɛn yɛri bɔt dat, dɛn go fɔ go ol am, bikɔs dɛn bin de tɔk se: “In ed nɔ de.” 22 Dɔn di Lɔ ticha dɛn we kɔmɔt ɔp Jerusɛlɛm bin de se: “I gɛt Biɛlzibɔb.* Na di rula fɔ di dimɔn dɛn de gi am pawa fɔ pul dimɔn dɛn.” 23 Afta i kɔl dɛn fɔ kam to am, i yuz ɛgzampul dɛn fɔ tɔk to dɛn. I tɛl dɛn se: “Aw Setan go pul Setan kɔmɔt? 24 Ɛni kiŋdɔm we di pipul dɛn we de de, de fɛt dɛnsɛf nɔ go las; 25 ɛn ɛni os usay di pipul dɛn nɔ gɛt wanwɔd nɔ go las. 26 Semweso, if Setan de fɛt insɛf ɛn i nɔ gɛt wanwɔd, i nɔ go las, in ɛnd wan de kam. 27 Infakt, nɔbɔdi nɔ go go insay trɛnkman in os ɛn tif in prɔpati dɛn if i nɔ tay am fɔs. Na dat nɔmɔ go mek i ebul tek di prɔpati dɛn na in os. 28 Fɔ tru, a de tɛl una se Gɔd go fɔgiv ɔl di sin dɛn we mɔtalman de sin, ilɛk uskayn sin we dɛn sin ɔ uskayn bad tin we dɛn tɔk. 29 Bɔt ɛnibɔdi we tɔk bad bɔt di oli spirit, Gɔd nɔ go ɛva fɔgiv am, ɛn i go gɛt sin sote go.” 30 I bin tɔk dis bikɔs dɛn bin de se: “I gɛt dimɔn.”

31 In mama ɛn in brɔda dɛn kam ɛn tinap na do. Dɔn dɛn sɛn pɔsin insay fɔ kɔl am. 32 Bikɔs bɔku pipul dɛn sidɔm rawnd am, dɛn tɛl am se: “Yu mama ɛn yu brɔda dɛn tinap na do de aks fɔ yu.” 33 Bɔt i aks dɛn se: “Udat na mi mama ɛn mi brɔda dɛn?” 34 Dɔn i luk di wan dɛn we sidɔm rawnd am ɛn se: “Luk mi mama ɛn mi brɔda dɛn! 35 Ɛnibɔdi we de du wetin Gɔd want, na in na mi brɔda, mi sista, ɛn mi mama.”