Emɔs
5 “E pipul dɛn na Izrɛl, una yɛri dis mɛsej we tan lɛk sɔri siŋ we a de tɛl una:
2 ‘Di vajin, Izrɛl, dɔn fɔdɔm;
I nɔ go ebul grap igen.
Dɛn dɔn lɛf am na in yon grɔn;
Nɔbɔdi nɔ de fɔ es am ɔp.’
3 “Dis na wetin Jiova we na di Masta We De Rul Ɔlman se:
‘Di siti we de mach wit wan tawzin go lɛf wit wan ɔndrɛd;
Di wan we de go wit wan ɔndrɛd go lɛf wit tɛn, fɔ di pipul dɛn na Izrɛl.’
4 “Dis na wetin Jiova se to di pipul dɛn na Izrɛl:
‘Una luk fɔ mi ɛn kɔntinyu fɔ liv.
5 Una nɔ luk fɔ Bɛtɛl,
Una nɔ go na Gilgal ɔ pas na Bia-shiba,
Bikɔs dɛn go mɔs go wit Gilgal na ɔda land,
Ɛn Bɛtɛl nɔ go de igen.
6 Una luk fɔ Jiova ɛn kɔntinyu fɔ liv,
So dat i nɔ go bɔs pan Josɛf in famili lɛk faya,
Ɛn bɔn Bɛtɛl we nɔbɔdi nɔ go de fɔ ɔt di faya.
7 Una dɔn mek jɔstis tan lɛk bita plant,
Ɛn una nɔ de du wetin rayt na Gɔd in yay.
8 Di Wan we mek di Kayma sta dɛn* ɛn di Kisil sta dɛn,*
Di Wan we de tɔn tik tik daknɛs to mɔnin,
Di Wan we de mek di de dak lɛk nɛt,
Di Wan we de tɛl di wata na di si
Fɔ fɔdɔm na di wɔl
—In nem na Jiova.
9 I go dɔnawe wit di wan dɛn we strɔng
Ɛn pwɛl di strɔng ples dɛn.
10 Dɛn et di wan dɛn na di siti get we de kɔrɛkt dɛn,
Ɛn dɛn nɔ lɛk ɛnibɔdi we de tɔk tru.
11 Bikɔs una de mek di po wan pe fɔ di fam*
Ɛn una de tek sɔm pan di tin dɛn we i plant as taks,
Una nɔ go kɔntinyu fɔ de na di os dɛn we una bil wit fayn ston,
Ɛn una nɔ go drink wayn frɔm di bɛst vayn gadin we una dɔn plant.
12 Bikɔs a no ɔl di bad tin* dɛn we una dɔn du
Ɛn aw una sin dɛn dɔn bɔku;
Una de aras di wan dɛn we de du wetin rayt,
Una de tek brayb,
Ɛn una nɔ de gi di po wan dɛn dɛn rayt na di siti get.
13 So di wan dɛn we gɛt sɛns go sɛt mɔt da tɛm de,
Bikɔs da tɛm de, na soso trɔbul go de.
14 Una luk fɔ wetin gud ɛn nɔto wetin bad,
So dat una go kɔntinyu fɔ liv.
Dɔn Jiova di Gɔd we gɛt bɔku bɔku sojaman dɛn go de wit una,
Jɔs lɛk aw una tɔk se i de du.
15 Una et wetin bad ɛn lɛk wetin gud,
Mek lɛ jɔstis de na di siti get.
I go bi se Jiova di Gɔd we gɛt bɔku bɔku sojaman dɛn
Go sho sɔri-at to di wan dɛn we lɛf na Josɛf in famili.’
16 “So dis na wetin Jiova, dat na, Jiova we gɛt bɔku bɔku sojaman dɛn se. I se:
‘Dɛn go de kray na ɔl di pɔblik ples* dɛn,
Ɛn na ɔl di strit dɛn, dɛn go de se, “E-ya, E-ya!”
Dɛn go kɔl di fama dɛn fɔ kray
Ɛn di wan dɛn we dɛn de pe fɔ kray, fɔ kray bita bita wan.’
17 Jiova se, ‘Dɛn go de kray na ɔl di vayn gadin dɛn;
Bikɔs a go pas usay una de.’
18 ‘Bad tin go apin to di wan dɛn we de wet fɔ Jiova in de!
Wetin Jiova in de go min fɔ una?
I go bi daknɛs ɛn nɔto layt.
19 I go tan lɛk pɔsin we rɔnawe pan layɔn ɛn go mit-ɔp bia,
Ɛn we i ɛnta in os ɛn put in an na di wɔl, snek bɛt am.
20 Jiova in de go bi daknɛs ɛn nɔto layt;
I go dak bad bad wan, ɛn i nɔ go brayt.
21 A et una fɛstival dɛn, a rili et dɛn,
Ɛn a nɔ kin lɛk di smɛl we de kɔmɔt pan una sakrifays dɛn we una kin mek na una oli asɛmbli dɛn.
22 Ivin if una gi mi wan ol bɔn sakrifays ɛn gift ɔfrin,
A nɔ go gladi fɔ dɛn;
A nɔ go gladi fɔ di fat animal dɛn we una kin yuz as pis sakrifays.
23 Una stɔp fɔ mek nɔys wit una siŋ dɛn;
Lɛ a nɔ yɛri di myuzik we de kɔmɔt na una myuzik instrumɛnt dɛn we gɛt string.
24 Lɛ jɔstis flo lɛk wata,
Ɛn fɔ du wetin rayt, bi lɛk riva we de rɔn ɔltɛm.
25 E di pipul dɛn na Izrɛl, fɔ se una bin de gi mi sakrifays dɛn ɛn gift ɔfrin dɛn
Insay di 40 ia we una bin de na di wildanɛs?*
26 Naw una go nid fɔ kɛr go Sakut una kiŋ ɛn Kaywan,*
Una imej dɛn, di sta fɔ una gɔd, we una mek fɔ unasɛf,
27 Ɛn a go mek dɛn kapchɔ una ɛn kɛr una go biɛn Damaskɔs.’ Na so di wan we nem Jiova, di Gɔd we gɛt bɔku bɔku sojaman dɛn se.”