1 Jɔn

1 Wi de rayt to una bɔt di wan we bin dɔn de frɔm di biginin, we wi dɔn yɛri bɔt, we wi dɔn si wit wi yay, we wi dɔn tek tɛm luk ɛn tɔch wit wi an—wi de rayt to una bɔt di wɔd we de gi layf 2 (dɛn bin sho wi di layf, ɛn wi dɔn si am ɛn de tɔk bɔt am, ɛn wi de tɛl una bɔt di layf we go de sote go we bin de wit di Papa ɛn we dɛn bin sho wi). 3 Wi de tɛl una bɔt di wan we wi dɔn si ɛn yɛri bɔt, so dat unasɛf go de wit wi, jɔs lɛk aw wi de wit di Papa ɛn wit in Pikin Jizɔs Krays. 4 Ɛn wi de rayt to una dɛn tin ya so dat wi ɔl go rili gladi.

5 Na dis na di mɛsej we wi yɛri frɔm am ɛn de tɛl una: Gɔd na layt ɛn no daknɛs nɔ de insay am atɔl.* 6 If wi se, “Wi de wit am,” bɔt wi kɔntinyu fɔ waka na daknɛs, wi de lay ɛn wi nɔ de liv akɔdin to di trut. 7 Bɔt if wi de waka na di layt lɛk aw insɛf de na di layt, wi de wit wi kɔmpin dɛn, ɛn in Pikin Jizɔs in blɔd de pul wi pan sin.

8 If wi se, “Wi nɔ gɛt wan sin,” wi de ful wisɛf ɛn di trut nɔ de insay wi. 9 If wi kɔnfɛs wi sin dɛn, i fetful ɛn de du wetin rayt, so i go fɔgiv wi sin dɛn ɛn pul wi pan ɔl wetin nɔ rayt. 10 If wi se, “Wi nɔ de sin,” wi de mek i bi layman, ɛn in wɔd nɔ de insay wi.