Osia
11 “We Izrɛl na bin bɔbɔ, a bin lɛk am,
Ɛn a kɔl mi bɔypikin fɔ kɔmɔt na Ijipt.
2 Di mɔ we dɛn* de kɔl dɛn,
Na di mɔ dɛn de kɔmɔt nia dɛn.
Dɛn kɔntinyu fɔ sakrifays to Beal in imej dɛn
Ɛn mek sakrifays dɛn to imej dɛn we dɛn kav.
3 Bɔt na mi tich Ifrem fɔ waka, a bin de ol dɛn na mi an;
Ɛn dɛn nɔ gri se na mi dɔn mɛn dɛn.
4 A yuz gudnɛs ɛn lɔv as rop* fɔ drɔ dɛn kam to mi;
A bin tan to dɛn lɛk pɔsin we de es yok* kɔmɔt na dɛn nɛk,
Ɛn a briŋ it saful wan to dɛn ɔl.
5 Dɛn nɔ go tɔn bak na Ijipt, bɔt Asiria go bi dɛn kiŋ,
Bikɔs dɛn nɔ gri fɔ tɔn bak to mi.
6 Ɛnimi dɛn go atak in siti dɛn wit sɔd
Ɛn pwɛl pwɛl di ba dɛn na in get bikɔs ɔf dɛn bad plan dɛn.
7 Mi pipul dɛn dɔn mek-ɔp dɛn maynd nɔ fɔ fetful to mi.
Pan ɔl we dɛn de kɔl dɛn fɔ go ɔp,* nɔbɔdi nɔ de grap.
8 Aw a go sɔrɛnda yu, E Ifrem?
Aw a go an ova yu, E Izrɛl?
Aw a go trit yu lɛk Adma?
Aw a go mek yu tan lɛk Zɛboim?
A dɔn chenj mi maynd;
Da sem tɛm de, a gɛt sɔri-at fɔ yu.
9 A nɔ go pul mi wamat pan yu.
A nɔ go dɔnawe wit Ifrem igen,
Bikɔs mi na Gɔd, mi nɔto mɔtalman,
Di Oli Wan we de wit yu;
A nɔ go pɔnish yu bikɔs a vɛks pan yu.
10 Dɛn go fala Jiova, ɛn i go ala lɛk layɔn;
We i ala, in pikin dɛn go kam frɔm di wɛst de trimbul.
11 Dɛn go trimbul lɛk bɔd we dɛn de kɔmɔt Ijipt,
Lɛk dɔv we dɛn de kɔmɔt Asiria;
A go mek dɛn sɛtul na dɛn os dɛn.” Na dat Jiova se.
12 “Ifrem dɔn sɔrawnd mi wit lay lay,
Ɛn na soso lay lay Izrɛl de pan.
Bɔt Juda de stil du wetin Gɔd want,*
Ɛn i fetful to di Wan We Oli Pas Ɔl.”