Matyu

14 Da tɛm de Ɛrɔd, we de rul di distrikt, yɛri bɔt Jizɔs, 2 ɛn i tɛl in savant dɛn se: “Dis na Jɔn we Bin De Baptayz Pipul Dɛn. I dɔn gɛt layf bak, na in mek i de du pawaful tin dɛn.” 3 Ɛrɔd* bin dɔn arɛst Jɔn ɛn chen am ɛn put am na prizin bikɔs ɔf Ɛrodias. Ɛrodias na bin Filip in wɛf ɛn Filip na bin Ɛrɔd in brɔda. 4 Jɔn bin dɔn de tɛl am se: “Yu nɔ gɛt rayt fɔ tek am as yu wɛf.” 5 Bɔt pan ɔl we i bin want fɔ kil Jɔn, i bin de fred di pipul dɛn, bikɔs dɛn bin biliv se Jɔn na prɔfɛt. 6 Bɔt we dɛn bin de sɛlibret Ɛrɔd in batde, Ɛrodias in galpikin dans bifo di pipul dɛn ɛn Ɛrɔd bin so gladi 7 dat i swɛ se i go gi am ɛnitin we i aks fɔ. 8 Dɔn bikɔs in mama put wɔd na in yes, i se: “A want Jɔn, we Bin De Baptayz Pipul Dɛn, in ed na tre. Gi mi am na ya.” 9 Di kiŋ in at pwɛl, bɔt bikɔs i dɔn swɛ bifo di wan dɛn we de it* wit am, i se mek dɛn gi di gal. 10 So i sɛn mek dɛn go kɔt Jɔn in ed na prizin. 11 Dɛn briŋ in ed na tre ɛn gi am to di gal, ɛn i kɛr am go to in mama. 12 Leta in disaypul dɛn kam pul in bɔdi ɛn bɛr am, dɔn dɛn go tɛl Jizɔs. 13 We Jizɔs yɛri dis, i go insay bot ɛn go na wan ples usay pipul dɛn nɔ de, so dat i go de in wan. Bɔt we bɔku pipul dɛn yɛri dis, dɛn kɔmɔt na dɛn siti dɛn ɛn waka bay fut fɔ fala am.

14 We i kam na di bich, i si bɔku bɔku pipul dɛn ɛn i sɔri fɔ dɛn, ɛn i mɛn di wan dɛn we sik. 15 Bɔt we ivintɛm kam, in disaypul dɛn kam mit am ɛn tɛl am se: “Pipul dɛn nɔ de liv na dis ples ɛn tɛm dɔn go, mek lɛ dɛn pipul ya go, so dat dɛn go go na di vilej dɛn ɛn bay it fɔ dɛnsɛf.” 16 Bɔt Jizɔs tɛl dɛn se: “Dɛn nɔ nid fɔ go, una gi dɛn sɔntin fɔ it.” 17 Dɛn tɛl am se: “Wi nɔ gɛt natin na ya pas fayv bred ɛn tu fish.” 18 I tɛl dɛn se: “Una kam wit am to mi.” 19 Dɔn i tɛl di pipul dɛn fɔ sidɔm na di gras. I tek di fayv bred ɛn tu fish, ɛn luk ɔp ɛvin ɛn pre. Dɔn i brok brok di bred dɛn ɛn gi di disaypul dɛn, ɛn di disaypul dɛn gi di pipul dɛn. 20 So dɛn ɔl it ɛn bɛlful, ɛn we dɛn gɛda di balans we lɛf, i ful-ɔp 12 baskɛt. 21 Na bin lɛk 5,000 man dɛn so it. Dɛn nɔ kɔnt di uman dɛn ɛn smɔl pikin dɛn. 22 Dɔn wantɛm wantɛm, i mek in disaypul dɛn go insay di bot ɛn go bifo na di ɔdasay na di si, ɛn in lɛf biɛn fɔ mek di pipul dɛn go.

23 We i dɔn mek di pipul dɛn go, in wangren go ɔp di mawntin fɔ pre. We di ples dak, i bin stil de de, in wangren. 24 Bay naw di bot dɔn go fa frɔm land, ɛn i nɔ bin izi fɔ dɛn bikɔs di briz bin de kɔmɔt usay dɛn de go. 25 Bɔt ali mɔnin,* i waka pantap di wata fɔ kam to dɛn. 26 We di disaypul dɛn si am de waka pantap di wata, dɛn fred ɛn se: “Na vishɔn!” Dɛn bin so fred dat, dɛn ala. 27 Bɔt wantɛm wantɛm Jizɔs tɛl dɛn se: “Una tek kɔrej! Na mi; una nɔ fred.” 28 Pita tɔk se: “Masta, if na yu, tɛl mi fɔ waka pantap di wata kam mit yu.” 29 I tɛl am se: “Kam!” Na de Pita kɔmɔt insay di bot ɛn waka pantap di wata fɔ go mit Jizɔs. 30 Bɔt we i pe atɛnshɔn to di big briz, i fred. Ɛn we i bigin fɔ go dɔŋ di wata, i ala lawd wan se: “Masta, sev mi!” 31 Wantɛm wantɛm Jizɔs stret in an ɛn ol am ɛn aks am se: “Wetin mek yu dawt? Yu nɔ gɛt bɛtɛ fet.” 32 We dɛn go insay di bot, di big briz stɔp fɔ blo. 33 Dɔn di wan dɛn we de insay di bot sho am rɛspɛkt* ɛn tɔk se: “Yu na Gɔd in Pikin fɔ tru.” 34 Ɛn dɛn krɔs oba di wata ɛn kam na Gɛnɛsarɛt.

35 We di pipul dɛn na da ples de kam no se na in, dɛn sɛn mɛsej na ɔl di eria dɛn we de nia de, ɛn pipul dɛn kam wit ɔl di wan dɛn we sik to am. 36 Ɛn dɛn beg am fɔ lɛ dɛn jɔs tɔch di ɛj pat pan in klos we i wɛr pantap, ɛn ɔl di wan dɛn we tɔch am bin wɛl gud gud wan.