Jɔn

9 We i de pas, i si wan man we blayn frɔm we dɛn bɔn am. 2 So in disaypul dɛn aks am se: “Ticha,* na dis man sin ɔ na in mama ɛn papa sin, we mek dɛn bɔn am blayn wan?” 3 Jizɔs ansa dɛn se: “Nɔto dis man ɔ in mama ɛn papa sin, bɔt i apin so dat tru am, pipul dɛn go no wetin Gɔd ebul fɔ du. 4 Na we di ples brayt na in wi fɔ du di Wan we sɛn mi in wok; nɛt de kam we nɔbɔdi nɔ go ebul fɔ wok. 5 Wans a de na di wɔl, na mi na di layt fɔ di wɔl.” 6 Afta i tɔk dɛn tin ya, i pit na grɔn ɛn miks di dɔti wit in pit, dɔn i rɔb am na di man in yay. 7 Ɛn i tɛl am se: “Go was na Siloam wata (we dɛn translet am, i min “Di Wan we Dɛn Sɛn”). Di man go was de, ɛn i bin de si we i kam bak.

8 Dɔn di neba dɛn ɛn di wan dɛn we bin dɔn de si am we i de beg, bigin fɔ tɔk se: “Nɔto di man dis we bin de sidɔm ɛn beg?” 9 Sɔm bin de tɔk se: “Na di man dis.” Ɔda wan dɛn bin de se: “Nɔ, na fiba dɛn fiba.” Di man bin de tɔk se: “Na mi.” 10 So dɛn aks am se: “Aw yu bigin fɔ si?” 11 I ansa dɛn se: “Da man we dɛn de kɔl Jizɔs miks in pit wit dɔti ɛn rɔb am na mi yay, ɛn i tɛl mi se, ‘Go was na Siloam.’ So a go was de ɛn a bigin fɔ si.” 12 Na de dɛn aks am se: “We di man?” I tɛl dɛn se: “A nɔ no.”

13 Dɛn kɛr di man we bin blayn to di Faresi dɛn. 14 I apin se di de we Jizɔs miks in pit wit dɔti ɛn mek di man bigin fɔ si na bin di Sabat de. 15 So di Faresi dɛnsɛf aks di man aw i bigin fɔ si. I tɛl dɛn se: “I miks in pit wit dɔti ɛn rɔb am na mi yay, dɔn a go was ɛn a ebul fɔ si.” 16 Sɔm Faresi dɛn bigin tɔk se: “Dis man nɔ kɔmɔt to Gɔd, bikɔs i nɔ de kip di Sabat.” Bɔt ɔda wan dɛn se: “Aw sina go pafɔm dɛn kayn sayn ya?” So dɛn nɔ bin gɛt wanwɔd. 17 Dɛn aks di blaynman bak se: “Ɛnti na yu yay i opin, wetin yu gɛt fɔ se bɔt am?” Di man tɛl dɛn se: “In na prɔfɛt.”

18 Bɔt di Ju dɛn nɔ bin biliv se dis man bin blayn ɛn i dɔn bigin si, pas te dɛn kɔl in mama ɛn papa. 19 Ɛn dɛn aks dɛn se: “Na una pikin dis we una se una bɔn am in blayn wan? Aw i ebul fɔ si naw?” 20 In mama ɛn papa tɔk se: “Wi no se dis na wi pikin ɛn wi bɔn am in blayn wan. 21 Bɔt aw i bigin si naw, wi nɔ no, ɔ udat mek i bigin si, wi nɔ no. Una aks am. Na big man. I fɔ tɔk fɔ insɛf.” 22 In mama ɛn papa tɔk dis bikɔs dɛn bin de fred di Ju dɛn. Di Ju dɛn bin dɔn mek agrimɛnt se if ɛnibɔdi tɔk se Jizɔs na di Krays, dɛn fɔ drɛb am na di sinagɔg.* 23 Na dat mek in mama ɛn papa se: “Na big man. Una aks am.”

24 So fɔ di sɛkɔn tɛm, dɛn kɔl di man we bin blayn ɛn tɛl am se: “Na Gɔd yu fɔ prez; wi no se da man de na sina.” 25 Di man tɛl dɛn se: “Mi nɔ no if in na sina. Wan tin we a no na dat a bin blayn, bɔt naw a ebul si.” 26 Dɔn dɛn aks am se: “Wetin i du to yu? Aw i mek yu bigin fɔ si?” 27 I ansa dɛn se: “A bin dɔn tɛl una, bɔt una nɔ lisin. Wetin mek una want lɛ a tɔk am bak? Fɔ se unasɛf want fɔ bi in disaypul dɛn?” 28 Na de dɛn tɔk pan am se: “Yu na da man in disaypul, bɔt wi na Mozis in disaypul dɛn. 29 Wi no se Gɔd bin tɔk to Mozis, bɔt wi nɔ no usay dis man kɔmɔt.” 30 Di man tɛl dɛn se: “Dis de rili sɔprayz mi; una nɔ no usay da man de kɔmɔt, bɔt i mek a bigin fɔ si. 31 Wi no se Gɔd nɔ de lisin to sina dɛn, bɔt if pɔsin de fred am ɛn du wetin i want, i de lisin to am. 32 Frɔm tɛm, wi nɔ ɛva yɛri se pɔsin mek sɔmbɔdi we dɛn bɔn blayn bigin si. 33 If nɔto Gɔd dis man ya kɔmɔt to, i nɔ bin fɔ ebul du natin.” 34 Dɛn tɛl am se: “Yu we dɛn rili bɔn insay sin, na yu de kam tich wi?” Na de dɛn drɛb am!

35 Jizɔs yɛri se dɛn dɔn drɛb am, so we i si am, i aks am se: “Yu gɛt fet pan mɔtalman Pikin?” 36 Di man aks am se: “Udat na in sa, so dat a go put fet pan am?” 37 Jizɔs tɛl am se: “Yu dɔn si am, ɛn infakt, na in de tɔk to yu so.” 38 Di man tɛl am se: “Masta, a gɛt fet pan am.” Dɔn i sho Jizɔs rɛspɛkt.* 39 Na de Jizɔs tɔk se: “Na fɔ dis jɔjmɛnt mek a kam na di wɔl, dat na fɔ mek di wan dɛn we blayn si ɛn di wan dɛn we de si blayn.” 40 Di Faresi dɛn we bin de wit am ɛn we yɛri wetin i tɔk aks am se: “Wisɛf blayn?” 41 Jizɔs tɛl dɛn se: “If una bin blayn, una nɔ go gɛt ɛni sin. Bɔt naw una se, ‘Wi de si.’ Una sin go lɛf pan una.”