Mayka
3 A se: “Duya, una lisin, una dɛn bigman dɛn fɔ Jekɔp in pikin dɛn
Ɛn una dɛn rula dɛn fɔ Izrɛl in pikin dɛn.
Una nɔ no se una fɔ du tin fia wan?
2 Bɔt una et wetin gud ɛn lɛk wetin bad;
Una dɔn pul di kanda we de pan mi pipul dɛn bɔdi
Ɛn pul di flɛsh pan dɛn bon dɛn.
3 Dɔn una de it mi pipul dɛn flɛsh
Ɛn pul dɛn kanda pan dɛn,
Una de brok brok dɛn bon dɛn ɛn nyamanyama dɛn,
Lɛk tin we dɛn de kuk na pɔt, ɛn lɛk bif we dɛn de kuk na pɔt.
4 Da tɛm de, dɛn go pre to Jiova fɔ lɛ i ɛp dɛn,
Bɔt i nɔ go ansa dɛn.
Da tɛm de, i go ayd in fes pan dɛn,
Bikɔs ɔf di wikɛd tin dɛn we dɛn de du.
5 Na dis Jiova se bɔt di prɔfɛt dɛn we de ful in pipul dɛn,
We de tɔk se ‘Pis de!’ we dɛn gɛt tin fɔ bɛt.*
Bɔt we de tɔk se wɔ de fɔ di wan we nɔ gi dɛn sɔntin fɔ put na dɛn mɔt:
6 ‘Nɛt go kam; bɔt una nɔ go si vishɔn;
Na daknɛs nɔmɔ una go de si, una nɔ go put an pan juju biznɛs igen.
Di san go go dɔŋ pan di prɔfɛt dɛn,
Ɛn di de go tan lɛk nɛt fɔ dɛn.
7 Di wan dɛn we de si vishɔn go shem,
Ɛn di wan dɛn we de put an pan juju biznɛs go disapɔynt.
Dɛn ɔl go kɔba dɛn mɔt,*
Bikɔs Gɔd nɔ go ansa dɛn.’”
8 As fɔ mi, Jiova in spirit dɔn mek a gɛt pawa,
Ɛn i de ɛp mi fɔ du tin fia wan ɛn fɔ gɛt maynd,
Fɔ tɛl Jekɔp in pikin dɛn se dɛn dɔn tɔn dɛn bak pan Gɔd
Ɛn fɔ tɛl Izrɛl in pikin dɛn se dɛn dɔn sin.
9 Duya, una lisin, una dɛn bigman dɛn fɔ Jekɔp in pikin dɛn
Ɛn una dɛn rula dɛn fɔ Izrɛl in pikin dɛn,
We et fɔ du tin fia wan ɛn we de bɛn ɛnitin we stret,
10 We bin de kil pipul dɛn we dɛn bin de bil Zayɔn
Ɛn we nɔ bin de du wetin rayt we dɛn bin de bil Jerusɛlɛm.
11 Pas dɛn brayb di lida dɛn bifo dɛn jɔj,
Pas dɛn pe di prist dɛn bifo dɛn tich,
Ɛn di prɔfɛt dɛn de put an pan juju biznɛs fɔ mɔni.*
Bɔt dɛn de tɔk se dɛn abop pan Jiova.
Dɛn de aks se: “Jiova nɔ de wit wi?
No bad tin nɔ go mit wi.”
12 Bikɔs ɔf una,
Dɛn go dig Zayɔn lɛk fam,
Jerusɛlɛm go bi ples usay dɛn payl pwɛl pwɛl tin dɛn,
Ɛn di mawntin usay di Os de go tan lɛk ay ples dɛn na fɔrɛst.