Koloshians

2 A want mek una no aw a rili de tray tranga wan fɔ una sek ɛn fɔ di wan dɛn we de na Laodisia ɛn fɔ ɔl di wan dɛn we nɔ si mi yet.* 2 Dis apin fɔ mek dɛn go tek kɔrej ɛn gɛt wanwɔd bikɔs ɔf lɔv, ɛn fɔ lɛ dɛn gɛt ɔl di tin dɛn we gɛt valyu, bikɔs dɛn shɔ ɔf wetin dɛn ɔndastand klia wan, so dat dɛn go no di kɔrɛkt tin bɔt Gɔd in oli sikrit we na Krays. 3 Ɔl di sɛns ɛn tin dɛn we pɔsin fɔ no we rili gɛt valyu tek tɛm ayd insay am. 4 A de se dis so dat nɔbɔdi nɔ go ful una wit agyumɛnt dɛn we tan lɛk se na tru. 5 Pan ɔl we a nɔ de wit una, a de tink bɔt una, ɛn a de gladi fɔ si di we aw una ɔganayz ɛn di fet we una rili gɛt pan Krays.

6 So jɔs lɛk aw una dɔn put fet pan Krays Jizɔs di Masta, una kɔntinyu fɔ gɛt wanwɔd wit am. 7 Jɔs lɛk aw dɛn bin tich una, una fet pan am fɔ mek una strɔng ɛn tinap tranga wan lɛk tik we in rut dɛn go rayt ɔnda di grɔn ɛn una fɔ de tɛl Gɔd tɛnki ɔltɛm.

8 Una tek tɛm mek nɔbɔdi nɔ kapchɔ una wit di sɛns na dis wɔl ɛn di lay lay we aw pipul dɛn de tink we gɛt sɔntin fɔ du wit mɔtalman tradishɔn ɛn dɛn pikin pikin tin dɛn na di wɔl, bɔt we nɔ gɛt ɛnitin fɔ du wit Krays; 9 bikɔs ɔl di kwaliti dɛn we Gɔd gɛt de insay am kɔmplit wan. 10 So una dɔn gɛt ɔltin tru am, dat na, di wan we de oba ɔl di gɔvmɛnt dɛn ɛn di wan dɛn we gɛt pawa. 11 Di wanwɔd we una gɛt wit am dɔn mek una bak dɔn sakɔmsayz, bɔt nɔto lɛk aw mɔtalman de sakɔmsayz, bifo dat, una dɔn lɛf fɔ du wetin una bɔdi we de sin want, bikɔs na so Krays in savant dɛn fɔ sakɔmsayz. 12 Dɛn bɛr una wit am bay we una baptayz di sem we aw i baptayz, ɛn di wanwɔd we una gɛt wit am dɔn mek una gɛt layf bak togɛda bikɔs ɔf di fet we una gɛt pan di pawaful tin dɛn we Gɔd, we gi am layf bak, du.

13 Pantap dat, Gɔd gi una layf wit am, pan ɔl we una sin dɛn bin dɔn mek una day ɛn una nɔ bin sakɔmsayz. I dɔn fɔgiv wi fɔ ɔl wi sin dɛn wit ɔl in at, 14 ɛn i ires* di dɔkyumɛnt we dɛn rayt wit an we gɛt lɔ dɛn we bin de agens wi. I dɔn pul am kɔmɔt bay we i nel am pan di tik we Jizɔs sɔfa pan.* 15 I dɔn yuz am* fɔ pul ɔltin pan di gɔvmɛnt dɛn ɛn di wan dɛn we gɛt pawa, ɛn i dɔn sho ɔlman se i dɔn win dɛn, ɛn i de go ɛn sɛlibret we i de kɛr dɛn go as prizina dɛn.

16 So lɛ nɔbɔdi nɔ jɔj una we i kam pan wetin una de it ɛn drink ɔ fɔ sɛlibret fɛstival ɔ di nyu mun ɔ sabat. 17 Dɛn tin ya na shado we de sho di tin dɛn we gɛt fɔ kam, bɔt di rial tin gɛt fɔ du wit Krays. 18 Una nɔ alaw ɛnibɔdi we de mek lɛk se i ɔmbul ɛn we de wɔship enjɛl dɛn, fɔ stɔp una fɔ gɛt di prayz. Pɔsin lɛk dat “de tinap fɔ”* di tin dɛn we i dɔn si. Ɛn i kin mek prawd fɔ tin dɛn we nɔ gɛt valyu bikɔs i de tink lɛk mɔtalman, 19 ɛn i nɔ de fala di ed, dat na, di wan we de gi di wan ol bɔdi wetin i nid ɛn mek i jɔyn togɛda fayn fayn wan tru di jɔynt dɛn ɛn di tin dɛn we mek di bon dɛn jɔyn togɛda ɛn na in de mek i gro tru Gɔd in pawa.

20 If una dɔn day wit Krays we i kam pan dɛn pikin pikin tin dɛn na di wɔl, wetin mek una de liv lɛk se na di wɔl gɛt una bay we una de obe di lɔ dɛn we se: 21 “Una nɔ ol am, una nɔ tes am, una nɔ tɔch am,” 22 we i bi se dɛn lɔ ya de tɔk bɔt tin dɛn we go pwɛl we dɛn de yuz dɛn ɛn na tin dɛn we mɔtalman de tich ɛn tɛl pipul dɛn fɔ du? 23 Pan ɔl we i tan lɛk se sɛns de insay dɛn tin ya, dɛn nɔ de ɛp pipul dɛn mek dɛn nɔ du wetin di bɔdi want, bikɔs na dɛnsɛf de pik aw dɛn go wɔship Gɔd, ɛn dɛn de mek dɛn bɔdi sɔfa bikɔs dɛn want mek pipul dɛn tink se dɛn ɔmbul.