1 Tɛsalonians

3 So we wi nɔ ebul fɔ bia igen, wi si am se i go fayn mek wi kɔntinyu fɔ de na Atɛns. 2 Ɛn wi sɛn Timoti, we na wi brɔda ɛn Gɔd in savant* we de prich di gud nyuz bɔt di Krays, fɔ mek i ɛp una fɔ tinap tranga wan ɛn kɔrej una ɛn mek una fet strɔng, 3 so dat dɛn prɔblɛm ya nɔ go shek ɛnibɔdi. Unasɛf sɛf no se dɛn tin ya go apin to wi, ɛn wi nɔ go ebul fɔ avɔyd dɛn. 4 We wi bin de wit una, wi bin de tɛl una bifo tɛm se wi go sɔfa, ɛn na dat dɔn apin, jɔs lɛk aw unasɛf no. 5 Na dat mek we a nɔ ebul bia igen, a sɛn pɔsin to una fɔ no aw una fetful, sɔntɛm di wan we de tɛmt pipul dɛn go dɔn tɛmt una, ɛn wi wok go dɔn go fɔ natin.

6 Bɔt Timoti jɔs dɔn kɔmɔt to una ɛn kam to wi, ɛn i dɔn tɛl wi gud nyuz bɔt aw una fetful ɛn di lɔv we una gɛt, ɛn aw una kin gladi ɔltɛm we una de mɛmba wi ɛn aw una rili want fɔ si wi di sem we aw wisɛf want fɔ si una. 7 Wi brɔda dɛn, na dat mek pan ɔl we wi gɛt prɔblɛm dɛn ɛn tin dɛn we de mɔna wi,* wi dɔn gɛt kɔrej bikɔs ɔf una ɛn di we aw una de sho se una fetful. 8 Naw wi go kɔntinyu fɔ liv if una rili tinap tranga wan bikɔs una gɛt wanwɔd wit di Masta. 9 Aw wi go sho se wi de tɛl Gɔd tɛnki fɔ una ɛn fɔ we wi rili gladi bifo am bikɔs ɔf una? 10 De ɛn nɛt wi de rili beg Gɔd siriɔs wan so dat wi go si una* ɛn ɛp una wit wetin una nid fɔ gɛt mɔ fet.

11 Mek wi Gɔd ɛn Papa insɛf ɛn wi Masta Jizɔs mek we fɔ lɛ wi ebul fɔ kam to una. 12 Pantap dat, lɛ di Masta mek una lɛk unasɛf ɛn ɔlman mɔ ɛn mɔ, jɔs lɛk aw wi lɛk una, 13 so dat i go mek una* tinap tranga wan, dɛn nɔ go blem una fɔ ɛnitin, ɛn una go oli bifo wi Gɔd ɛn Papa di tɛm we wi Masta Jizɔs go de wit wi wit ɔl in oli wan dɛn.