Rɛvɛleshɔn

20 Ɛn a si wan enjɛl kɔmɔt na ɛvin de kam dɔŋ. I gɛt di ki fɔ di ol we nɔ gɛt bɔtɔm ɛn wan big chen de na in an. 2 I kech di dragɔn, di orijinal snek, we na di Dɛbul ɛn Setan, ɛn tay am fɔ 1,000 ia. 3 Ɛn i ib am na di ol we nɔ gɛt bɔtɔm ɛn lɔk am ɛn put sil pantap, so dat i nɔ go ful di neshɔn dɛn igen te di 1,000 ia dɔn. Afta dat dɛn go fri am fɔ shɔt tɛm.

4 Ɛn a si tron dɛn, ɛn dɛn gi di wan dɛn we sidɔm pan di tron dɛn pawa fɔ jɔj. A si di wan dɛn we dɛn kil* bikɔs dɛn prich bɔt Jizɔs ɛn bɔt Gɔd, dɛn sol* dɛn, ɛn di wan dɛn we nɔ wɔship di wayl animal ɔ in imej ɛn we nɔ tek di mak na dɛn fɔɛd ɛn na dɛn an. Ɛn dɛn gɛt layf bak ɛn rul as kiŋ dɛn wit Krays fɔ 1,000 ia. 5 (Di ɔda wan dɛn we dɔn day nɔ gɛt layf bak te di 1,000 ia dɔn.) Dis na di wan dɛn we fɔs gɛt layf bak. 6 Ɛnibɔdi we de pan di wan dɛn we fɔs gɛt layf bak gɛt gladi-at ɛn oli; di sɛkɔn day nɔ gɛt pawa oba dɛn, bɔt dɛn go bi prist fɔ Gɔd ɛn fɔ di Krays, ɛn dɛn go rul as kiŋ dɛn wit am fɔ 1,000 ia.

7 As di 1,000 ia dɔn so, dɛn go pul Setan kɔmɔt na prizin, 8 ɛn i go go fɔ ful di neshɔn dɛn na di 4 kɔna dɛn na di wɔl, dat na, Gɔg ɛn Megɔg, fɔ gɛda dɛn fɔ di wɔ. Dɛn bɔku lɛk di sansan na di si. 9 Ɛn dɛn go ɔlsay na di wan ol wɔl ɛn sɔrawnd di oli wan dɛn kamp ɛn di siti we Gɔd rili lɛk. Bɔt faya kɔmɔt na ɛvin ɛn bɔn dɛn. 10 Ɛn di enjɛl ib di Dɛbul we bin de ful dɛn, insay di lek we gɛt faya ɛn sɔlfɔ, usay di wayl animal ɛn di lay lay prɔfɛt bin ɔlrɛdi de; ɛn dɛn go tɔmɛnt dɛn* de ɛn nɛt sote go.

11 Ɛn a si wan big wayt tron ɛn di Wan we sidɔm pan am. Di wɔl ɛn di ɛvin kɔmɔt bifo am, ɛn no ples nɔ bin de fɔ dɛn. 12 Ɛn a si di wan dɛn we dɔn day, di kɔmɔn wan dɛn ɛn di wan dɛn we gɛt ay pozishɔn, tinap bifo di tron, ɛn Gɔd opin skrol dɛn. Bɔt i opin ɔda skrol; na di skrol we de sho se pɔsin go gɛt layf. Dɛn yuz di tin dɛn we rayt na di skrol fɔ jɔj di wan dɛn we dɔn day akɔdin to wetin dɛn du. 13 Ɛn di si pul di wan dɛn we dɔn day insay am, ɛn day ɛn di Grev* pul di wan dɛn we day insay dɛn, ɛn dɛn jɔj dɛn wan bay wan akɔdin to wetin dɛn du. 14 Ɛn dɛn ib day ɛn di Grev* insay di lek we gɛt faya. Di lek we gɛt faya min di sɛkɔn day. 15 Pantap dat, dɛn ib ɛnibɔdi we in nem nɔ rayt na di buk we de sho se pɔsin go gɛt layf, na di lek we gɛt faya.