Lyuk

9 Dɔn Jizɔs kɔl di 12 apɔsul dɛn ɛn gi dɛn pawa ɛn rayt fɔ kɔntrol ɔl di dimɔn dɛn ɛn fɔ mɛn sik dɛn. 2 Dɔn i sɛn dɛn fɔ go prich bɔt Gɔd in Kiŋdɔm ɛn mɛn di wan dɛn we sik. 3 I tɛl dɛn se: “Una nɔ kɛr natin we una de travul. Una nɔ kɛr wɔkinstik, bag fɔ put it, bred, mɔni,* ɔ tu klos.* 4 Bɔt we una go na ɛni os, una de de te una kɔmɔt na da ples de. 5 Ɛn ɛni siti we pipul dɛn nɔ wɛlkɔm una, we una de kɔmɔt de, una nak nak una fut fɔ pul di dɔst fɔ sho se una dɔn wɔn dɛn.” 6 Dɔn dɛn go na difrɛn vilej dɛn, de prich di gud nyuz ɛn mɛn pipul dɛn ɔlsay.

7 Ɛrɔd* we de rul di distrikt yɛri bɔt ɔl wetin bin de apin, ɛn i bin rili kɔnfyuz bikɔs pipul dɛn bin de se Jɔn dɔn gɛt layf bak, 8 bɔt ɔda wan dɛn bin de se na Ilayja, ɛn ɔda wan dɛn bak bin de se na wan pan di prɔfɛt dɛn trade trade dɔn gɛt layf bak. 9 Ɛrɔd se: “A bin kɔt Jɔn in ed. So, udat dis we a de yɛri se de du ɔl dɛn tin ya?” So i bin de tray fɔ si am.

10 We di apɔsul dɛn tɔn bak, dɛn tɛl Jizɔs ɔl wetin dɛn dɔn du. Na de Jizɔs pul dɛn usay di pipul dɛn de ɛn kɛr dɛn go na wan siti we dɛn de kɔl Bɛtseda. 11 Bɔt we di pipul dɛn no, dɛn fala am. Jizɔs gladi we i si dɛn, ɛn i bigin fɔ tɛl dɛn bɔt Gɔd in Kiŋdɔm ɛn mɛn di wan dɛn we nɔ wɛl. 12 Dɔn we ivintɛm de kam, di 12 apɔsul dɛn kam mit am ɛn tɛl am se: “Mek lɛ dɛn pipul ya go, so dat dɛn go go na di vilej dɛn ɛn fam dɛn we de nia ya fɔ luk fɔ ples fɔ lɔj ɛn fɛn it, bikɔs pipul dɛn nɔ de liv na dis ples.” 13 Bɔt i tɛl dɛn se: “Una gi dɛn sɔntin fɔ it.” Dɛn tɛl am se: “Na fayv bred ɛn tu fish nɔmɔ wi gɛt. Sɔntɛm pas wisɛf sɛf go bay it fɔ dɛn ɔl.” 14 Na bin lɛk 5,000 man dɛn bin de de. Bɔt i tɛl in disaypul dɛn se: “Una mek di pipul dɛn sidɔm bay grup; na lɛk 50 pipul dɛn fɔ de na wan grup.” 15 So dɛn du dat; dɛn mek dɛn ɔl sidɔm. 16 Jizɔs tek di fayv bred ɛn tu fish, dɔn i luk ɔp ɛvin ɛn pre pan dɛn. Afta dat, i brok brok dɛn ɛn gi dɛn to di disaypul dɛn fɔ mek dɛn gi di pipul dɛn. 17 So dɛn ɔl it ɛn bɛlful, ɛn we dɛn gɛda di balans we lɛf, i ful-ɔp 12 baskɛt.

18 Leta, we in wangren bin de pre, in disaypul dɛn kam mit am, ɛn i aks dɛn se: “Udat pipul dɛn se a bi?” 19 Dɛn tɛl am se: “Sɔm pipul dɛn se yu na Jɔn we Bin De Baptayz Pipul Dɛn, ɔda wan dɛn se yu na Ilayja, ɛn ɔda wan dɛn se yu na wan pan di prɔfɛt dɛn trade trade we dɔn gɛt layf bak.” 20 Dɔn i aks dɛn se: “We una, udat una tink se a bi?” Pita ansa am se: “Yu na di Krays we Gɔd sɛn.” 21 Dɔn i wɔn dɛn siriɔs wan se mek dɛn nɔ tɛl ɛnibɔdi bɔt dis, 22 bɔt i tɛl dɛn se: “Mɔtalman Pikin go rili sɔfa, ɛn di lida dɛn, di edman dɛn fɔ di prist dɛn, ɛn di Lɔ ticha dɛn nɔ go biliv am. Dɛn go kil am, bɔt i go gɛt layf bak di tɔd de.”

23 Dɔn i tɛl ɔlman se: “If ɛnibɔdi want fɔ fala mi, i nɔ fɔ du wetin in want. Ɛn ɛvride i fɔ tot in tik we i go sɔfa pan* ɛn kɔntinyu fɔ fala mi. 24 Ɛnibɔdi we want fɔ sev in layf,* go lɔs am, bɔt ɛnibɔdi we lɔs in layf* fɔ mi sek go gɛt am bak. 25 Fɔ tru, us bɛnifit pɔsin go gɛt if i gɛt di wan ol wɔl, bɔt i lɔs in layf ɔ lɔs ɔltin? 26 Ɛnibɔdi we shem fɔ bi mi disaypul ɔ we shem fɔ biliv mi wɔd, mɔtalman Pikin insɛf go shem fɔ kɔl da pɔsin de in disaypul we i kam wit in glori, in Papa in glori, ɛn wit di oli enjɛl dɛn glori. 27 Bɔt fɔ tru, a de tɛl una se sɔm pan di wan dɛn we tinap ya nɔ go day atɔl pas dɛn si Gɔd in Kiŋdɔm.”

28 Infakt, afta lɛk et dez so we i tɔk dɛn wɔd ya, i go wit Pita, Jɔn, ɛn Jems ɔp wan mawntin fɔ pre. 29 We i de pre, in fes chenj ɛn in klos in kɔlɔ chenj to wayt ɛn bigin fɔ shayn brayt brayt wan. 30 Tu man dɛn bin de tɔk wit am. Di man dɛn na bin Mozis ɛn Ilayja. 31 Brayt layt bin de arawnd dɛn, ɛn dɛn bigin fɔ tɔk bɔt Jizɔs in go wan, we go apin na Jerusɛlɛm. 32 Slip bin de pan Pita ɛn di wan dɛn we bin de wit am, bɔt we dɛn wek fayn fayn wan, dɛn si di we aw Jizɔs bin de shayn, ɛn dɛn si di tu man dɛn we tinap wit am. 33 We di tu man dɛn want fɔ go, Pita tɛl Jizɔs se: “Ticha, i go fayn fɔ mek wi de ya. So lɛ wi bil tri bafa.* Wan fɔ yu, wan fɔ Mozis, ɛn wan fɔ Ilayja.” I nɔ bin no wetin i de tɔk. 34 Bɔt as Pita de tɔk dɛn tin ya, klawd bigin fɔ kɔba dɛn. We di klawd kɔba dɛn, dɛn fred. 35 Dɔn dɛn yɛri wan vɔys insay di klawd we tɔk se: “Na mi Pikin dis, di wan we a dɔn pik. Una lisin to am.” 36 We dɛn yɛri di vɔys, na Jizɔs in wangren dɛn si. Bɔt dɛn nɔ tɔk natin ɛn fɔ sɔntɛm, dɛn nɔ tɛl ɛnibɔdi bɔt di tin dɛn we dɛn si.

37 Di ɔda de, we dɛn kam dɔŋ di mawntin, bɔku bɔku pipul dɛn kam mit am. 38 Na de wan man na di krawd ala se: “Ticha, a de beg yu ɛp mi bɔypikin, bikɔs na in wangren a gɛt. 39 Wan dimɔn* kin atak am ɛn wantɛm wantɛm i kin bigin fɔ ala. Di dimɔn kin mek i kɔnvɔls* ɛn pul frɔsh na in mɔt, ɛn afta i dɔn brus brus am i nɔ kin izi mek i lɛf am. 40 A beg yu disaypul dɛn mek dɛn pul di dimɔn, bɔt dɛn nɔ ebul.” 41 Nain Jizɔs tɔk se: “E jɛnɛreshɔn we nɔ gɛt fet ɛn we kɔrɔpt. Aw lɔng a go de wit una, ɛn aw lɔng a go kɔntinyu fɔ bia wit una? Briŋ yu bɔypikin na ya.” 42 As di bɔbɔ de kam so, di dimɔn ib am na grɔn ɛn mek i kɔnvɔls.* Bɔt Jizɔs tɔk pan di dimɔn ɛn mek di bɔbɔ wɛl, dɔn i gi am to in papa. 43 We dɛn si di we aw Gɔd rili gɛt pawa, dɛn ɔl kɔle.

As dɛn de sɔprayz bikɔs ɔf ɔl di tin dɛn we i bin de du, i tɛl in disaypul dɛn se: 44 “Una lisin gud gud wan ɛn mɛmba dɛn wɔd ya, bikɔs pɔsin go ɛp pipul dɛn fɔ arɛst mɔtalman Pikin.” 45 Bɔt dɛn nɔ ɔndastand wetin i de tɔk. Infakt, i bin tan lɛk sikrit to dɛn so dat dɛn nɔ go ebul fɔ ɔndastand, ɛn dɛn bin de fred fɔ aks am kwɛstyɔn bɔt dat.

46 Dɔn dɛn bigin fɔ agyu bɔt uswan pan dɛn impɔtant pas dɛn ɔl. 47 Jizɔs bin no wetin dɛn de tink bɔt na dɛn at, so i tek wan smɔl pikin ɛn mek i tinap nia am, 48 dɔn i tɛl dɛn se: “Ɛnibɔdi we wɛlkɔm dis smɔl pikin bikɔs ɔf mi nem dɔn wɛlkɔm mi, ɛn ɛnibɔdi we wɛlkɔm mi dɔn wɛlkɔm di Wan we sɛn mi. Di wan we put insɛf dɔŋ pan una ɔl na in na di wan we impɔtant pas una ɔl.”

49 Na de Jɔn tɔk se: “Ticha, wi si sɔmbɔdi de yuz yu nem fɔ pul dimɔn dɛn, ɛn wi tray fɔ stɔp am bikɔs i nɔ de fala wi.” 50 Bɔt Jizɔs tɛl am se: “Una nɔ tray fɔ stɔp am, bikɔs ɛnibɔdi we nɔ de agens una de fɔ una.”

51 We di tɛm fɔ lɛ Jizɔs go na ɛvin nia, i mekɔp in maynd fɔ go na Jerusɛlɛm. 52 So i sɛn mɛsenja dɛn fɔ go bifo am. Dɛn go na wan vilej na Sameria fɔ rɛdi ɔltin fɔ in kam wan. 53 Bɔt dɛn nɔ wɛlkɔm am, bikɔs i bin dɔn mekɔp in maynd fɔ go na Jerusɛlɛm. 54 We di disaypul Jems ɛn Jɔn si dat, dɛn aks am se: “Masta, yu want lɛ wi mek faya kam dɔŋ frɔm ɛvin ɛn kil dɛn?” 55 Bɔt i tɔn ɛn tɔk pan dɛn. 56 So dɛn go na ɔda vilej.

57 We dɛn de go na rod, sɔmbɔdi tɛl am se: “A go fala yu ɛnisay we yu go.” 58 Bɔt Jizɔs tɛl am se: “Fɔks* dɛn gɛt ol ɛn bɔd dɛn we de flay na di skay gɛt bɔd os, bɔt mɔtalman Pikin nɔ gɛt ɛnisay fɔ le in ed.” 59 Dɔn Jizɔs tɛl wan ɔda man se: “Kam fala mi.” Di man se: “Masta, alaw mi lɛ a go bɛr mi papa fɔs.” 60 Bɔt i tɛl am se: “Lɛ di wan dɛn we dɔn day bɛr dɛn kɔmpin dayman. Bɔt yu go prich bɔt Gɔd in Kiŋdɔm ɔlsay.” 61 Wan ɔda pɔsin bak tɔk se: “Masta, a go fala yu, bɔt alaw mi fɔs mek a go tɛl di wan dɛn we de na mi os baybay.” 62 Jizɔs tɛl am se: “Pɔsin we de dig fɔ plant ɛn tɔn fɔ luk di tin dɛn we de biɛn nɔ fit fɔ go insay Gɔd in Kiŋdɔm.”