Job
23 Na de Job tɔk se:
2 “Tide bak a go kɔntinyu fɔ kɔmplen;
A dɔn taya bikɔs ɔf mi prɔblɛm dɛn.
3 If nɔmɔ a no usay fɔ fɛn Gɔd
A go go usay i de.
4 A fɔ kɛr mi kes go to am
Ɛn tɔk ɔl wetin a no fɔ pruv se a inosɛnt;
5 A go si aw i go ansa mi,
Ɛn a go lisin to wetin i go tɛl mi.
6 Fɔ se i go yuz in gret pawa fɔ mek a fred?
Nɔ, a shɔ se i go lisin to mi.
7 Di wan we de du wetin rayt go sɛtul di kes bitwin mi ɛn in,
Ɛn mi Jɔj go fri mi sote go.
8 Bɔt if a go na di ist, i nɔ de de;
We a kam bak, a nɔ ebul fɔ si am.
9 We i de wok na di lɛft, a nɔ ebul fɔ wach am;
Dɔn we i tɔn to di rayt, a stil nɔ ebul fɔ si am.
10 Bɔt i no wetin a dɔn du.
Afta i dɔn tɛst mi, a go tan lɛk piɔ gold.
11 A dɔn fala in futmak gud gud wan;
A nɔ ɛva stɔp fɔ du wetin i want.
12 A nɔ ɛva lɛf fɔ obe in kɔmandmɛnt dɛn.
A dɔn du pas wetin i bin want mi fɔ du.
13 We i dɔn mek-ɔp in maynd, udat go chenj am?
We i want fɔ du sɔntin, i de du am.
14 I gɛt bɔku tin dɛn we i dɔn mek-ɔp in maynd fɔ du fɔ mi,
Ɛn i go du dɛn ɔl.
15 Na dat mek a kin wɔri bikɔs ɔf am;
We a tink bɔt am, a kin fred mɔ.
16 Gɔd dɔn mek a nɔ gɛt maynd igen
Ɛn di Ɔlmayti dɔn mek a fred.
17 Bɔt daknɛs nɔ mek a sɛt mɔt
Pan ɔl we i dɔn kɔba mi fes.