Zɛkaraya
3 Ɛn i sho mi di Ay Prist Jɔshwa we bin tinap bifo Jiova in enjɛl, ɛn Setan bin tinap na Jɔshwa in raytan ɛn i bin de agens am. 2 Dɔn Jiova in enjɛl tɛl Setan se: “E Setan, lɛ Jiova tɔk pan yu, lɛ Jiova we dɔn pik Jerusɛlɛm tɔk pan yu! Fɔ se dis wan nɔto stik we de bɔn we dɛn pul kɔmɔt na faya?”
3 Di klos dɛn we Jɔshwa bin wɛr bin dɔti, ɛn i bin tinap bifo di enjɛl. 4 Di enjɛl tɛl di wan dɛn we bin tinap bifo am se: “Una pul di dɔti klos dɛn pan am.” Dɔn i tɛl am se: “A dɔn pul yu sin dɛn pan yu, ɛn dɛn go wɛr fayn klos dɛn pan yu.”
5 So a se: “Lɛ dɛn put klin tɔban* na in ed.” Ɛn dɛn put di klin tɔban na in ed ɛn dɛn wɛr klos dɛn pan am; ɛn Jiova in enjɛl bin tinap nia de. 6 Na de Jiova in enjɛl tɛl Jɔshwa se: 7 “Na dis Jiova we gɛt bɔku bɔku sojaman dɛn se: ‘If yu du wetin a se ɛn du di wok dɛn we yu fɔ du fɔ mi, yu go bi jɔj na mi os ɛn yu go tek kia ɔf* mi kɔmpawn dɛn; ɛn a go mek yu fri fɔ kam bifo mi jɔs lɛk dɛn wan ya we tinap na ya.’
8 “‘E Ay Prist Jɔshwa, duya, lisin, yu ɛn yu kɔmpin dɛn we sidɔm bifo yu, bikɔs dɛn man ya na sayn; a go briŋ mi savant we nem Plant we Jɔs Bɔs! 9 Luk di ston we a dɔn put bifo Jɔshwa! Da wan ston de gɛt sɛvin yay dɛn; ɛn a de kav raytin pan am, ɛn insay wan de a go pul kɔmɔt di sin na di land.’ Na dis Jiova we gɛt bɔku bɔku sojaman dɛn se.
10 “Jiova we gɛt bɔku bɔku sojaman dɛn se: ‘Da de de, una ɔl go invayt una neba dɛn fɔ kam ɔnda una vayn ɛn fɔ kam ɔnda una fig stik.’”