Job
39 “Yu sabi ustɛm wayl got dɛn de bɔn pikin?
Yu dɔn ɛva wach we dia de bɔn pikin?
2 Yu kin kɔnt di mɔnt we dɛn kin tek?
Yu no di tɛm we dɛn kin bɔn?
3 Dɛn kin butu we dɛn de bɔn dɛn pikin dɛn,
Ɛn di pen we dɛn kin fil we dɛn de bɔn kin dɔn.
4 Dɛn pikin dɛn kin strɔng ɛn gro na di opin ples;
Dɛn de kɔmɔt nia dɛn ɛn nɔ kam bak to dɛn igen.
5 Udat fri di wayl dɔnki,
Ɛn udat lus di rop we bin de pan di wayl dɔnki?
6 A dɔn mek di flat land na di dɛzat bi in os
Ɛn di land we sɔl de dɔn bi usay i de.
7 I de avɔyd di ala-ala na di siti;
I nɔ de yɛri di wan we de kɔmand am fɔ wok, in vɔys.
8 I de pas pas na di il dɛn de luk fɔ gras,
I de luk fɔ ɛni grin plant.
9 Man kaw we de na bush go gri fɔ wok fɔ yu?
I go spɛn di nɛt na di say usay yu de gi animal dɛn it?
10 Yu ebul tay man kaw we de na bush wit rop fɔ lɛ i mek ip fɔ yu,
Ɔ i go fala yu fɔ go dig na di vali?
11 Yu go abop pan di pasmak trɛnk we i gɛt
Ɛn alaw am fɔ du yu ɛvi wok?
12 Yu go abop pan am fɔ kam wit di tin dɛn we yu avɛst,
Ɛn i go gɛda dɛn na di say usay yu de pul sid pan plant?
13 Di ɔstrich kin nak nak in wiŋ dɛn wit gladi-at,
Bɔt yu go kɔmpia in wiŋ ɛn fɛda dɛn to stɔk bɔd in wiŋ ɛn fɛda dɛn?
14 I de lɛf in eg dɛn na grɔn,
Fɔ lɛ di dɔst wam dɛn fɔ am.
15 I de fɔgɛt se pipul dɛn go mas dɛn
Ɔ wayl animal go waka pan dɛn.
16 I de trit in pikin dɛn bad lɛk se nɔto in bɔn dɛn;
I nɔ de fred se di pen we i fil go go fɔ natin.
17 Gɔd dɔn mek i nɔ gɛt sɛns
Ɛn i dɔn mek i nɔ de ɔndastand.
18 Bɔt we i grap ɛn nak nak in wiŋ dɛn,
I de laf ɔs ɛn di wan we de rayd am.
19 Na yu gi ɔs in trɛnk?
Na yu mek bɔku bɔku ia de biɛn in nɛk?
20 Yu ebul mek i jomp lɛk grasɔpa?
Di lawd nɔys we i kin mek wit in nos kin mek pɔsin fred.
21 I de dig dig di grɔn na di vali, ɛn i de gladi fɔ sho in pawa;
I de rɔn wit spid fɔ go usay dɛn de fɛt.
22 I nɔ de tink bɔt fred, ɛn i nɔ de fred natin.
Sɔd nɔ de mek i tɔn bak.
23 Di bag fɔ put wɛpɔn de mek nɔys pan am,
Di spia ɛn di javlin de flash as i de go.
24 I de rɔn go bifo bikɔs i rili gladi,
I nɔ ebul tinap saful we i yɛri di ɔn.
25 We dɛn blo di ɔn, i de se, ‘Nain dat!’
I de lɛf fa i no se dɛn de fɛt;
I de yɛri we dɛn de ala lawd lawd wan fɔ fɛt ɛn we di kɔmanda dɛn de ala.
26 Na yu sɛns de mek di falkɔn bɔd de flay ɔp ɔp,
Ɛn de prɛd in wiŋ dɛn na di sawt?
27 Ɔ na yu de tɛl di igul fɔ flay go ɔp
Ɛn bil in os rayt ɔp?
28 Na yu de tɛl am fɔ slip na di ay pat na di mawntin,
Fɔ de na di sef ples usay rɔk dɛn de?
29 Na de i kin de, i de fɛn tin fɔ it;
In yay de si fa.
30 In pikin dɛn de drink blɔd;
Ɛnisay usay di wan dɛn we dɛn kil kin de, na de i kin de.”