Zɛkaraya

8 Jiova we gɛt bɔku bɔku sojaman dɛn tɔk bak se: 2 “Na dis mi, Jiova, we gɛt bɔku bɔku sojaman dɛn se: ‘A go gɛt pasmak zil fɔ Zayɔn, ɛn mi at go wam bad bad wan we a de sho se a gɛt zil fɔ am.’”

3 “Na dis Jiova se: ‘A go kam bak na Zayɔn ɛn de na Jerusɛlɛm; ɛn dɛn go kɔl Jerusɛlɛm di siti usay dɛn de tɔk tru,* ɛn dɛn go kɔl Jiova we gɛt bɔku bɔku sojaman dɛn in mawntin, di oli mawntin.’”

4 “Na dis Jiova we gɛt bɔku bɔku sojaman dɛn se: ‘Di ol pa dɛn ɛn ol mami dɛn go sidɔm bak na di pɔblik ples* dɛn na Jerusɛlɛm, dɛn ɔl go ol dɛn wɔkinstik dɛn bikɔs dɛn go dɔn rili ol. 5 Ɛn di pɔblik ples* dɛn na di siti go ful-ɔp wit bɔypikin dɛn ɛn galpikin dɛn we de ple ple.’”

6 “Jiova we gɛt bɔku bɔku sojaman dɛn tɔk se: ‘Pan ɔl we i go tan lɛk se i nɔ pɔsibul fɔ di pipul dɛn we go lɛf insay dɛn tɛm dɛn de, fɔ se i nɔ pɔsibul bak fɔ mi?’ Na dat Jiova we gɛt bɔku bɔku sojaman dɛn se.”

7 “Jiova we gɛt bɔku bɔku sojaman dɛn tɔk se: ‘A go pul mi pipul dɛn na di land dɛn we de na di ist ɛn na di wɛst.* 8 Ɛn a go briŋ dɛn kam na Jerusɛlɛm, ɛn dɛn go de de; dɛn go bi mi pipul dɛn, ɛn mi go bi dɛn Gɔd we de tɔk tru* ɛn we de du wetin rayt.’”

9 “Na dis Jiova we gɛt bɔku bɔku sojaman dɛn se: ‘Una sho se una gɛt maynd, una we de yɛri dɛn wɔd ya we di prɔfɛt dɛn de tɔk, di sem wɔd dɛn we dɛn bin tɔk di de we dɛn bin de le Jiova we gɛt bɔku bɔku sojaman dɛn in os in fawndeshɔn fɔ mek dɛn go bil di tɛmpul. 10 Bifo da tɛm de, dɛn nɔ bin de pe mɔtalman ɔ animal fɔ di wok we dɛn bin de du; ɛn i nɔ bin sef fɔ go ɛn kam bikɔs ɔf di ɛnimi, bikɔs a tɔn ɔlman agens in kɔmpin.’

11 “Jiova we gɛt bɔku bɔku sojaman dɛn se: ‘Bɔt naw a nɔ go dil wit di wan dɛn we dɔn lɛf pan dɛn pipul dɛn ya lɛk aw a bin de du trade trade. 12 Una go plant sid wit kolat;* di vayn go bia ɛn di plant dɛn go gro, dyu go fɔdɔm; ɛn a go mek di wan dɛn we dɔn lɛf pan dɛn pipul ya gɛt ɔl dɛn tin ya. 13 E di pipul dɛn na Juda ɛn Izrɛl, jɔs lɛk aw una bin bi swɛ midul di neshɔn dɛn, na so bak a go sev una ɛn mek una bi blɛsin. Una nɔ fred! Una sho se una gɛt maynd.’

14 “Na dis Jiova we gɛt bɔku bɔku sojaman dɛn tɔk. Jiova we gɛt bɔku bɔku sojaman dɛn se: ‘“Jɔs lɛk we a bin mek-ɔp mi maynd fɔ briŋ trɔbul pan una bikɔs una gret gret granpa dɛn mek a vɛks bad bad wan, ɛn a nɔ rigrɛt am, 15 na di sem we a dɔn mek-ɔp mi maynd dis tɛm fɔ du gud to di pipul dɛn na Jerusɛlɛm ɛn Juda. Una nɔ fred!”’

16 “‘Na dɛn tin ya una fɔ du: Una fɔ tɔk tru to una kɔmpin dɛn ɛn we una de jɔj na una get dɛn, una fɔ tɔk tru ɛn mek lɛ pis de. 17 Una nɔ plan bad fɔ una kɔmpin dɛn na una at, ɛn una nɔ fɔ lɛk fɔ de swɛ pan tin we na lay; bikɔs a et ɔl dɛn tin dɛn ya.’ Na dat Jiova se.”

18 Jiova we gɛt bɔku bɔku sojaman dɛn tɛl mi bak se: 19 “Na dis Jiova we gɛt bɔku bɔku sojaman dɛn se: ‘Di fast we una de fast insay di mɔnt we mek 4, di fast we una de fast insay di mɔnt we mek fayv, di fast we una de fast insay di mɔnt we mek sɛvin, ɛn di fast we una de fast insay di mɔnt we mek tɛn go bi tɛm dɛn we di pipul dɛn na Juda fɔ gladi pasmak—na fɛstival dɛn we fɔ mek dɛn gladi. So una lɛk pis ɛn wetin tru.’

20 “Na dis Jiova we gɛt bɔku bɔku sojaman dɛn se: ‘I go apin se pipul dɛn na bɔku siti dɛn ɛn ɔda pipul dɛn go kam; 21 ɛn di pipul dɛn na wan siti go go to di pipul dɛn na ɔda siti ɛn tɛl dɛn se: “Lɛ wi go ɛn rili beg Jiova fɔ lɛ i blɛs wi, ɛn lɛ wi luk fɔ Jiova we gɛt bɔku bɔku sojaman dɛn. Wisɛf de go.” 22 Ɛn bɔku pipul dɛn ɛn pawaful neshɔn dɛn go kam na Jerusɛlɛm fɔ luk fɔ Jiova we gɛt bɔku bɔku sojaman dɛn ɛn fɔ beg Jiova fɔ lɛ i blɛs dɛn.’

23 “Na dis Jiova we gɛt bɔku bɔku sojaman dɛn se: ‘Da tɛm de, tɛn man dɛn na ɔl di langwej dɛn na di neshɔn dɛn go ol wan Ju* in klos,* dɛn go ol am tayt wan ɛn se: “Wi want fɔ go wit una, bikɔs wi dɔn yɛri se Gɔd de wit una.”’”