Romans

16 A want mek una no bɔt wi sista we na Fibi, we de wok fɔ di kɔngrigeshɔn na Sɛnkria, 2 so dat una go wɛlkɔm am di we aw una fɔ wɛlkɔm di oli wan dɛn,* bikɔs insɛf biliv di Masta, ɛn una ɛp am ɛnikayn we we i go nid una fɔ ɛp am, bikɔs insɛf dɔn ɛp bɔku pipul dɛn, ɛn i dɔn ivin ɛp mi.

3 Una grit Priska ɛn Akwila fɔ mi, we na mi kɔmpin wokman dɛn fɔ Krays Jizɔs. 4 Dɛn dɔn put dɛn layf pan denja fɔ mi,* ɛn mi ɛn ɔl di kɔngrigeshɔn dɛn na di neshɔn dɛn de tɛl dɛn tɛnki. 5 Ɛn una grit di kɔngrigeshɔn we de na dɛn os. Una grit Ɛpinatɔs, we a rili lɛk ɛn we na wan pan di fɔs pipul dɛn* na Eshia we biliv Krays. 6 Una grit Meri, we dɔn wok tranga wan fɔ una. 7 Una grit Andrɔnikɔs ɛn Junias, we na mi fambul dɛn ɛn kɔmpin prizina dɛn. Dɛn na man dɛn we di apɔsul dɛn sabi gud gud wan, ɛn dɛn dɔn gɛt wanwɔd wit Krays fɔ lɔng tɛm pas mi.

8 Una grit fɔ mi Amplietɔs, we a rili lɛk ɛn we na di Masta in disaypul. 9 Una grit Ɔbenɔs, we na wi kɔmpin wokman fɔ Krays ɛn Stekɔs we a rili lɛk. 10 Una grit Apɛlis, di wan we Krays lɛk. Una grit di wan dɛn we de na Aristɔbyulɔs in os. 11 Una grit mi fambul we na Ɛrodiɔn. Una grit di wan dɛn we de na Nasisɔs in os ɛn we na di Masta in disaypul dɛn. 12 Una grit Trayfina ɛn Trayfosa, we na uman dɛn we de wok tranga wan fɔ di Masta. Una grit Pasis, di wan we wi rili lɛk, bikɔs i dɔn wok tranga wan fɔ di Masta. 13 Una grit Rufɔs, di wan we di Masta dɔn pik, ɛn una grit in mama we na misɛf yon mama. 14 Una grit Asinkritɔs, Fligɔn, Amis, Patrobas, Amas, ɛn di brɔda dɛn we de wit dɛn. 15 Una grit Filologɔs ɛn Julia, Nirɔs ɛn in sista, ɛn Olimpas, ɛn ɔl di oli wan dɛn we de wit dɛn. 16 Una grit una kɔmpin dɛn wit oli kis. Krays in kɔngrigeshɔn dɛn ɔl de grit una.

17 Mi brɔda dɛn, a de beg una fɔ de wach di wan dɛn we de mek pipul dɛn skata ɛn we de mek dɛn kɔmpin dɛn nɔ gɛt bɛtɛ fet igen. Dis de agens di tichin dɛn we una bin dɔn lan. Una avɔyd dɛn pipul dɛn de. 18 Dɛn kayn pipul ya nɔto slev to wi Masta Krays, bɔt dɛn na slev to dɛn yon apitayt,* ɛn dɛn de ful di wan dɛn we inosɛnt bay we dɛn de yuz swit-mɔt ɛn tɔk tin dɛn we de mek dɛn ed big. 19 Ɔlman dɔn no bɔt aw una de obe, ɛn a gladi fɔ una. Bɔt a want mek una gɛt sɛns we i kam pan gud tin, bɔt una fɔ inosɛnt we i kam pan bad tin. 20 I nɔ go te igen, di Gɔd we de gi pis go nyamanyama Setan ɔnda una fut. Lɛ wi Masta Jizɔs in spɛshal gudnɛs* de pan una.

21 Timoti, we na mi kɔmpin wokman, de grit una. Lushiɔs, Jesin, ɛn Sosipeta, we na mi fambul dɛn, dɛnsɛf de grit una.

22 Misɛf, we na Tashiɔs we na di Masta in disaypul ɛn we dɔn rayt dis lɛta, de grit una.

23 Geɔs, we na to am a lɔj ɛn we na in os di kɔngrigeshɔn de mit, de grit una. Irastɔs, we de kip di mɔni fɔ di siti, ɛn in brɔda we na Kwatɔs, dɛnsɛf de grit una. 24 *——

25 Gɔd ebul mek una tinap tranga wan. I de yuz di gud nyuz we a de tɔk bɔt ɛn di prich we a de prich bɔt Jizɔs Krays fɔ du dat. Dis gud nyuz gɛt sɔntin fɔ du wit di oli sikrit we Gɔd dɔn mek wi no. Fɔ lɔng tɛm, pipul dɛn nɔ bin no bɔt dis sikrit. 26 Bɔt naw dis sikrit dɔn kɔmɔt na do. Ɛn di prɔfɛsi dɛn na di Skripchɔ dɛn dɔn mek ɔl di neshɔn dɛn no bɔt dis sikrit. Ɔl dis apin akɔdin to wetin Gɔd, we de liv sote go, bin dɔn tɔk. I want mek ɔl di neshɔn dɛn obe am bikɔs dɛn gɛt fet. 27 Lɛ Gɔd, we na in wangren gɛt sɛns, gɛt glori sote go tru Jizɔs Krays. Emɛn