1 Kɔrintians

12 Mi brɔda dɛn, a want mek una no bɔt di gift dɛn we Gɔd de gi. 2 Una no se di tɛm we una nɔ bin biliv di Masta yet, una bin de wɔship aydɔl dɛn we nɔ gɛt vɔys, ɛn una bin de fala dɛn ɛnisay we dɛn kɛr una go. 3 Naw a want mek una no se ɛnibɔdi we de tɔk wetin Gɔd in spirit tɛl am nɔ go se: “Jizɔs gɛt swɛ!” ɛn nɔbɔdi nɔ go se: “Jizɔs na Masta!” pas di oli spirit ɛp am.

4 Na difrɛn gift dɛn de, bɔt na di sem spirit; 5 ɛn difrɛn wok dɛn de, bɔt na di sem Masta; 6 ɛn difrɛn tin dɛn de fɔ du, bɔt na di sem Gɔd de mek ɔlman de du ɔl dɛn tin dɛn de. 7 Ɔda pipul dɛn de si wetin di spirit de mek dɛn ebul fɔ du, ɛn Gɔd gi am to dɛn fɔ bɛnifit ɔda pipul dɛn. 8 Di spirit de mek wan pɔsin tɔk wit sɛns, ɛn di sem spirit bak de mek ɔda pɔsin tɔk sɔntin we di spirit mek i no, 9 ɛn di sem spirit de mek ɔda pɔsin gɛt fet, ɛn da wan spirit de, de gi ɔda pɔsin di gift fɔ mɛn pipul dɛn, 10 i de mek ɔda pɔsin ebul fɔ du pawaful tin dɛn, i de mek ɔda pɔsin tɔk tin we na prɔfɛsi, i de mek ɔda pɔsin rili no mɛsej we kɔmɔt frɔm Gɔd, i de mek ɔda pɔsin ebul fɔ tɔk difrɛn langwej dɛn, ɛn i de mek ɔda pɔsin ebul fɔ ɛksplen wetin dɛn tɔk na difrɛn langwej dɛn. 11 Bɔt na di sem spirit de mek dɛn du ɔl dɛn tin ya, ɛn i de gi ɔlman in yon jɔs lɛk aw i want.

12 Jɔs lɛk aw di bɔdi na wan, pan ɔl we i gɛt bɔku pat dɛn, ɛn ɔl di pat dɛn na di bɔdi, pan ɔl we dɛn bɔku, na wan bɔdi, na di sem tin bak wit Krays. 13 Wi ɔl baptayz insay wan bɔdi wit wan spirit, ilɛksɛf wi na Ju ɔ Grik, ɔ wi na slev ɔ wi fri, ɛn wi ɔl drink wan spirit.

14 Fɔ tru, nɔto wan pat de na di bɔdi, na bɔku pat dɛn. 15 If di fut se, “Bikɔs mi nɔto an, a nɔ de pan di bɔdi,” dat nɔ min se i nɔ de pan di bɔdi. 16 Ɛn if di yes se, “Bikɔs mi nɔto yay, a nɔ de pan di bɔdi,” dat nɔ min se i nɔ de pan di bɔdi. 17 If di wan ol bɔdi na yay, wetin pɔsin go yuz fɔ yɛri? If di wan ol bɔdi na yes, wetin pɔsin go yuz fɔ smɛl? 18 Gɔd dɔn arenj ɔl di pat dɛn na di bɔdi jɔs lɛk aw i want.

19 If ɔl di pat dɛn na bin di sem, usay di bɔdi go de? 20 Di pat dɛn bɔku, bɔt na wan bɔdi. 21 Di yay nɔ go tɛl di an se, “A nɔ nid yu,” ɔ di ed nɔ go tɛl di fut dɛn se, “A nɔ nid una.” 22 Bɔt di pat dɛn na di bɔdi we kin tan lɛk se dɛn wik, di bɔdi nid dɛn, 23 ɛn di pat dɛn na di bɔdi we wi kin tink se nɔ gɛt bɛtɛ ɔnɔ, na dɛn wi kin ɔnɔ mɔ, so di pat dɛn we nɔ fayn bɛtɛ, na dɛn mɔ wi de trit wit rɛspɛkt, 24 bɔt di pat dɛn na di bɔdi we fayn nɔ nid ɛnitin. Bɔt Gɔd put ɔl di pat dɛn na di bɔdi togɛda wan kayn we, we mek di pat dɛn we nɔ gɛt ɔnɔ, gɛt mɔ ɔnɔ, 25 so dat wanwɔd go de na di bɔdi, ɛn di pat dɛn go bisin bɔt dɛn kɔmpin. 26 If wan pat de sɔfa, ɔl di ɔda pat dɛn de sɔfa wit am; ɔ if wan pat gɛt prez, ɔl di ɔda pat dɛn de gladi wit am.

27 Una na Krays in bɔdi, ɛn una ɔl na di pat dɛn we de na in bɔdi. 28 Ɛn Gɔd dɔn gi pipul dɛn wok na di kɔngrigeshɔn: fɔs, apɔsul dɛn; sɛkɔn, prɔfɛt dɛn; tɔd, ticha dɛn; dɔn fɔ du pawaful tin dɛn; gift fɔ mɛn pipul dɛn; fɔ du tin dɛn fɔ ɛp pipul dɛn; fɔ no aw fɔ dayrɛkt; fɔ tɔk difrɛn langwej dɛn. 29 Nɔto ɔlman na apɔsul, nɔto so? Nɔto ɔlman na prɔfɛt, nɔto so? Nɔto ɔlman na ticha, nɔto so? Nɔto ɔlman de du pawaful tin dɛn, nɔto so? 30 Nɔto ɔlman gɛt gift fɔ mɛn pipul dɛn, nɔto so? Nɔto ɔlman de tɔk difrɛn langwej dɛn, nɔto so? Nɔto ɔlman ebul fɔ ɛksplen wetin dɛn tɔk na difrɛn langwej dɛn,* nɔto so? 31 Bɔt una go de tray tranga wan fɔ gɛt* di gift dɛn we mɔ impɔtant. Bɔt a go sho una sɔntin we bɛtɛ fa fawe.