Job
18 Bildad di Shuayt tɔk se:
2 “Ustɛm yu go stɔp fɔ tɔk dɛn tin dɛn ya?
Sho ɔndastandin so dat wisɛf go tɔk.
3 Wetin mek yu de si wi lɛk animal dɛn
Ɛn tink se wi ful?*
4 Ilɛksɛf yu damej yusɛf bikɔs yu vɛks,
Yu tink se ɔlman go kɔmɔt na di wɔl fɔ yu sek,
Ɔ di rɔk go muv kɔmɔt na in ples?
5 Di wikɛd wan in layt go ɔt,
Ɛn in faya go stɔp fɔ kech.
6 Di layt na in tɛnt nɔ go shayn igen,
Ɛn in lamp go ɔt.
7 I nɔ gɛt trɛnk igen fɔ waka,
Ɛn na in yon advays go mek i fɔdɔm.
8 In fut go kɛr am go insay nɛt,
Ɛn i go pas pas te i ɛnta insay de.
9 Trap go kech am,
Ɛn i go kech am na in fut;
10 Dɛn ayd rop fɔ am na grɔn,
Ɛn trap de na di say usay i de pas.
11 Fiaful tin dɛn de mek i fred ɔltɛm
Ɛn de rɔnafta am ɛnisay i go.
12 I nɔ gɛt trɛnk igen,
Ɛn trɔbul de mek i staga.
13 Sik dɔn pwɛl in skin;
Bad bad sik* dɔn prɛd ɔlsay na in bɔdi.
14 Dɛn pul am kɔmɔt na in tɛnt usay i sef
Ɛn mek i mach go to di kiŋ we fiaful.*
15 Strenja dɛn* go de na in tɛnt,
Ɛn dɛn go skata sɔlfɔ na in os.
16 In rut dɛn go dray ɔnda am,
Ɛn in branch dɛn go wida oba am.
17 Dɛn nɔ go mɛmba am igen na di wɔl,
Ɛn dɛn nɔ go sabi in nem* na di strit.
18 Dɛn go drɛb am kɔmɔt na layt ɛn mek i go na daknɛs;
Dɛn go rɔnafta am kɔmɔt na di wɔl.
19 I nɔ go gɛt pikin ɛn nɔbɔdi nɔ go de na in famili layn;
I nɔ go day lɛf ɛnibɔdi na di say we i de.
20 We in tɛm rich, di pipul dɛn na di Wɛst go shɔk
Ɛn di pipul dɛn na di Ist go fred bad bad wan.
21 Na dis go apin to di pɔsin we de du bad in tɛnt
Ɛn to di pɔsin we nɔ no Gɔd in ples.”