Mayka
4 Insay di las dez,
Di mawntin we Jiova in os de
Go tinap tranga wan, ɛn i go ay pas di ɔda mawntin dɛn;
I go ay pas di il dɛn,
Ɛn na de pipul dɛn go de go.
2 Bɔku neshɔn dɛn go go ɛn tɔk se:
“Una kam, lɛ wi go ɔp na Jiova in mawntin,
Lɛ wi go na Jekɔp in Gɔd in os.
I go tich wi di we aw i de du tin dɛn,
Ɛn wi go waka di we aw i want wi fɔ waka.”
Na frɔm Zayɔn lɔ* go kɔmɔt
Ɛn na frɔm Jerusɛlɛm Jiova in wɔd go kɔmɔt.
3 I go jɔj bɔku pipul dɛn,
Ɛn i go kɔrɛkt wetin de apin na pawaful neshɔn dɛn, ilɛksɛf dɛn de fa.
Dɛn go nak nak dɛn sɔd dɛn fɔ mek i tɔn to plawshia* dɛn,
Ɛn dɛn go nak nak dɛn spia dɛn fɔ mek i tɔn to gadin nɛf dɛn.
Neshɔn dɛn nɔ go fɛt wɔ wit ɔda neshɔn dɛn,
Ɛn dɛn nɔ go lan fɔ fɛt wɔ igen.
4 Dɛn ɔl go sidɔm ɔnda dɛn yon vayn ɛn ɔnda dɛn yon fig stik,
Ɛn nɔbɔdi nɔ go mek dɛn fred.
Na Jiova we gɛt bɔku bɔku sojaman dɛn dɔn tɔk am.
6 Jiova tɔk se: “Da tɛm de,
A go gɛda di wan dɛn we nɔ ebul waka fayn,
Ɛn a go gɛda di wan dɛn we dɔn skata,
Wit di wan dɛn we a nɔ bin trit fayn.
7 A go mek di wan dɛn we nɔ ebul waka fayn bi di wan dɛn we go lɛf,
Ɛn a go mek di wan we dɛn kɛr fa say bi pawaful neshɔn;
Da tɛm de, na Jiova go rul as kiŋ oba dɛn na Mawnt Zayɔn sote go.
8 E tawa, we de protɛkt di ship dɛn,
Di pipul dɛn na Zayɔn dɛn il,
Na to una di rulaship we bin de fɔs go kam,
Di pipul dɛn na Jerusɛlɛm dɛn kiŋdɔm.
9 Wetin mek una de ala lawd wan?
Una nɔ gɛt kiŋ,
Una advaysa nɔ de igen,
We mek una de fil pen lɛk bɛlɛ-uman we want fɔ bɔn?
10 E di pipul dɛn na Zayɔn, una pini ɛn fil siriɔs pen
Lɛk bɛlɛ-uman we want fɔ bɔn,
Bikɔs una go kɔmɔt na di siti ɛn go de na opin ples.
Una go go fa te una rich Babilɔn,
Ɛn na de dɛn go sev una;
Na de Jiova go bay una bak na una ɛnimi dɛn an.
11 Bɔku neshɔn dɛn go gɛda agens una;
Dɛn go tɔk se: ‘Lɛ dɛn dɔti dɛn,
Ɛn lɛ wi si we dis de apin to di pipul dɛn na Zayɔn.’
12 Bɔt dɛn nɔ no wetin Jiova de tink,
Dɛn nɔ ɔndastand wetin i want fɔ du;
I go gɛda dɛn na wan ro
Lɛk wit* we dɛn jɔs kɔt na di say usay dɛn de pul sid pan plant.
13 E di pipul dɛn na Zayɔn, una grap ɛn pul kanda pan di wit;*
Bikɔs a go chenj una ɔn dɛn to ayɛn,
A go chenj una fut* to kɔpa,
Ɛn una go nyamanyama bɔku pipul dɛn.
Una go gi Jiova di jɛntri we dɛn bin dɔn tif,
Ɛn una go gi di tin dɛn we dɛn gɛt to di tru Masta fɔ di wan ol wɔl.”