2 Kɔrintians

6 We wi de wok wit am, wi de beg una mek una nɔ tek Gɔd in spɛshal gudnɛs* fɔ natin. 2 I se: “Di tɛm we a fɔ blɛs yu, a yɛri yu, ɛn di de we a fɔ sev yu a ɛp yu.” Na naw mɔ na di tɛm fɔ gɛt blɛsin. Na naw na di de fɔ sev.

3 Wi nɔ de du ɛnitin we go ɔfɛn pɔsin, so dat dɛn nɔ go fɛn fɔlt pan wi wok; 4 bɔt wi de sho se wi na Gɔd in savant dɛn ɔlkayn we, wi de bia bɔku tin, prɔblɛm dɛn de mit wi, tɛm kin de we wi nid sɔntin, tin kin mɔna wi, 5 dɛn de bit wi, put wi na prizin, bɔku pipul dɛn kin gɛda fɔ du wi bad, wi de wok tranga wan, sɔm nɛt dɛn de wi nɔ de slip, sɔm tɛm de wi nɔ kin gɛt tin fɔ it; 6 wi de liv klin layf, wi no di tru, wi de peshɛnt, wi de du gud, wi de alaw di oli spirit fɔ dayrɛkt wi, wi nɔ de mek ipokrit we wi de sho lɔv, 7 wi de tɔk tru, wi abop pan Gɔd in pawa; wi ol di wɛpɔn dɛn fɔ du wetin rayt na wi raytan* ɛn lɛftan,* 8 dɛn de prez wi ɛn disgres wi, dɛn de tɔk bad bɔt wi ɛn tɔk gud bɔt wi. Dɛn de tek wi as pipul dɛn we de lay, bɔt wi de tɔk tru; 9 lɛk pipul dɛn we dɛn nɔ no, bɔt Gɔd no wi; lɛk pipul dɛn we de day,* bɔt wi de liv; lɛk pipul dɛn we dɛn dɔn pɔnish, bɔt dɛn nɔ an ova wi fɔ day; 10 lɛk pipul dɛn we sɔri, bɔt wi gladi ɔltɛm; lɛk pipul dɛn we po, bɔt wi de mek bɔku pipul dɛn jɛntri; lɛk pipul dɛn we nɔ gɛt natin, bɔt wi gɛt ɔltin.

11 Wi dɔn opin wi mɔt fɔ tɔk* to una, dɛn Kɔrintian dɛn, ɛn wi dɔn rili opin wi at. 12 Wi de rili sho se wi lɛk una, bɔt una nɔ de rili sho se una lɛk wi. 13 So a de tɔk to una lɛk se una na mi pikin dɛn, unasɛf fɔ rili opin una at.*

14 Una nɔ jɔyn* unasɛf wit di wan dɛn we nɔ biliv di Masta. Us biznɛs we pɔsin we de du wetin rayt gɛt wit pɔsin we nɔ de obe Gɔd in lɔ? Ɔ wetin layt gɛt fɔ du wit daknɛs? 15 Apat frɔm dat, us wanwɔd we de bitwin Krays ɛn Bilial?* Ɔ us biznɛs pɔsin we biliv di Masta* gɛt wit pɔsin we nɔ biliv di Masta? 16 Us agrimɛnt Gɔd in tɛmpul gɛt wit aydɔl dɛn? Wi na Gɔd we de alayv in tɛmpul, jɔs lɛk aw Gɔd se: “A go de midul dɛn ɛn waka midul dɛn, ɛn a go bi dɛn Gɔd, ɛn dɛn go bi mi pipul dɛn.” 17 “Jiova* se, ‘So una kɔmɔt midul dɛn, una nɔ gɛt ɛnitin fɔ du wit dɛn, ɛn una lɛf fɔ tɔch di tin we dɔti’”; “‘ɛn a go wɛlkɔm una.’” 18 “Jiova* di Ɔlmayti se, ‘A go bi una papa, ɛn una go bi mi bɔypikin dɛn ɛn galpikin dɛn.’”