Rɛvɛleshɔn
7 Afta dis a si 4 enjɛl dɛn tinap na di 4 kɔna dɛn na di wɔl, dɛn ol di 4 briz dɛn na di wɔl tayt tayt wan, so dat no briz nɔ go blo na di wɔl ɔ na di si ɔ pan ɛni tik. 2 Ɛn a si wan ɔda enjɛl de kɔmɔt usay di san kin kɔmɔt,* i gɛt di Gɔd we de alayv in sil;* ɛn i ala lawd wan to di 4 enjɛl dɛn we Gɔd bin dɔn alaw fɔ du bad tin to di wɔl ɛn di si. 3 I tɛl dɛn se: “Una nɔ du bad tin to di wɔl, di si, ɔ di tik dɛn, te wi dɔn fɔ stamp wi Gɔd in slev dɛn na dɛn fɔɛd.”
4 Ɛn a yɛri ɔmɔs pipul dɛn, dɛn stamp; dɛn stamp 144,000 pipul dɛn na ɔl di trayb dɛn we kɔmɔt frɔm Izrɛl in pikin dɛn:
5 Dɛn stamp 12,000 na Juda in trayb;
12,000 na Rubɛn in trayb;
12,000 na Gad in trayb;
6 12,000 na Asha in trayb;
12,000 na Naftalay in trayb;
12,000 na Manasɛ in trayb;
7 12,000 na Simiɔn in trayb;
12,000 na Livay in trayb;
12,000 na Isaka in trayb;
8 12,000 na Zɛbyulɔn in trayb;
12,000 na Josɛf in trayb;
12,000 na Bɛnjamin in trayb.
9 Afta dis a si bɔku bɔku pipul dɛn we nɔbɔdi nɔ ebul fɔ kɔnt, dɛn kɔmɔt na ɔl di neshɔn dɛn, trayb dɛn, pipul dɛn, ɛn dɛn de tɔk difrɛn langwej dɛn. Dɛn tinap bifo di tron ɛn bifo di Yɔŋ Ship, ɛn dɛn wɛr lɔng wayt klos; ɛn dɛn ol pam tik branch dɛn na dɛn an. 10 Ɛn dɛn bin de ala lawd wan se: “Wi Gɔd we sidɔm na di tron ɛn di Yɔŋ Ship dɔn sev wi.”
11 Ɔl di enjɛl dɛn bin tinap rawnd di tron, di ɛlda dɛn, ɛn di 4 chɛrɔb* dɛn, ɛn dɛn butu bifo di tron ɛn wɔship Gɔd. 12 Dɛn bin de se: “Emɛn! Mek wi Gɔd gɛt di prez, di glori, di sɛns, di tɛnki, di ɔnɔ, di pawa, ɛn di trɛnk sote go. Emɛn.”
13 Na de wan pan di ɛlda dɛn aks mi se: “Udat na dɛn wan ya we wɛr lɔng wayt klos ɛn usay dɛn kɔmɔt?” 14 So wantɛm wantɛm a tɛl am se: “Mi masta, na yu na di wan we no.” Ɛn i tɛl mi se: “Na dɛn wan ya kɔmɔt pan di big big trɔbul, ɛn dɛn dɔn was dɛn lɔng klos insay di Yɔŋ Ship in blɔd ɛn mek dɛn wayt. 15 Na dat mek dɛn de bifo Gɔd in tron, ɛn dɛn de wɔship am de ɛn nɛt na in tɛmpul; ɛn di Wan we sidɔm na di tron go put in tɛnt oba dɛn. 16 Dɛn nɔ go angri ɔ tɔsti igen, di san nɔ go wam dɛn ɛn no it nɔ go bɔn dɛn, 17 bikɔs di Yɔŋ Ship, we de midul di tron, go bi dɛn shɛpad ɛn gayd dɛn to spriŋ wata* dɛn we de gi layf. Ɛn Gɔd go wep ɔl di kray wata na dɛn yay.”