Ɛkliziastis

11 Sɛn yu bred na wata, bikɔs afta sɔm tɛm yu go si am bak. 2 Gi wetin yu gɛt to sɛvin ɔ ivin to et pipul dɛn, bikɔs yu nɔ no us prɔblɛm go bi na di wɔl.

3 If wata ful-ɔp di klawd, i go kam as ren na di wɔl, ɛn if tik fɔdɔm na di sawt ɔ na di nɔt, di ples usay di tik fɔdɔm na de i go ledɔm.

4 Di wan we de wach di briz nɔ go plant sid, ɛn di wan we de wach di klawd nɔ go avɛst.

5 Jɔs lɛk we yu nɔ no aw di spirit de wok insay pikin we de na in mama in bɛlɛ in bon dɛn,* na so yu nɔ no di wok we di tru Gɔd we de du ɔltin de du.

6 Plant yu sid na mɔnin ɛn nɔ mek yu an rɛst te ivintɛm, bikɔs yu nɔ no us wan go bɛtɛ, if na dis wan ɔ da ɔda wan, ɔ if dɛn ɔl tu go du wɛl.

7 Layt swit, ɛn i fayn fɔ mek di yay si di san. 8 If pɔsin fɔ liv lɔng, lɛ i ɛnjɔy dɛn ɔl. Bɔt i fɔ mɛmba se di dak de dɛn go bɔku; ɔl wetin gɛt fɔ kam na vaniti.

9 Yɔŋman, gladi we yu yɔŋ ɛn mek yu at gladi di tɛm we yu yɔŋ. Fala yu at ɛn go usay yu yay kɛr yu go, bɔt no se di tru Gɔd go jɔj* yu fɔ ɔl dɛn tin dɛn de. 10 So pul bad tin kɔmɔt na yu at, ɛn avɔyd ɛnitin we go du bad to yu bɔdi,* bikɔs di tɛm we pɔsin yɔŋ ɛn di trɛnk we i gɛt we i yɔŋ, na vaniti.