2 Kɔrintians

13 Na di tɔd tɛm dis we a de kam to una. “Usay tu ɔ tri witnɛs dɛn tɔk, ɔltin fɔ klia.” 2 Pan ɔl we a nɔ de wit una naw, i tan lɛk se a de wit una fɔ di sɛkɔn tɛm, ɛn a de gi wɔnin bifo tɛm to di wan dɛn we bin dɔn sin trade ɛn to ɔlman, fɔ se if a kam bak a nɔ go mek dɛn go fri wan, 3 bikɔs una want sɔntin we de sho se Krays de rili yuz mi fɔ tɔk. I nɔ wik to una, bɔt i de sho in pawa. 4 Fɔ tru, dɛn bin kil am pan tik bikɔs i bin wik, bɔt i de alayv bikɔs ɔf Gɔd in pawa. Na tru se wisɛf wik wit am, bɔt wi go liv wit am bikɔs ɔf Gɔd in pawa we de pan una.

5 Una go de chɛk unasɛf fɔ no if una de liv lɛk Kristian; una go de pruv to unasɛf uskayn pɔsin una bi. Ɔ una nɔ no se Jizɔs Krays gɛt wanwɔd wit una? Pas nɔmɔ i bi se Gɔd nɔ gladi wit una. 6 A rili op se una go no se Gɔd gladi wit wi.

7 Wi de pre to Gɔd mek una nɔ du ɛni bad tin, nɔto fɔ lɛ wi mek lɛk se pipul dɛn gladi fɔ wi, bɔt na fɔ mek una du wetin fayn, ilɛksɛf i tan lɛk se pipul dɛn nɔ gladi fɔ wi. 8 Wi nɔ go ebul fɔ du natin agens di trut, pas nɔmɔ fɔ sɔpɔt di trut. 9 Fɔ tru, wi kin gladi ɛnitɛm we wi wik bɔt una pawaful. Ɛn na dis wi kin pre fɔ, fɔ mek una ajɔst unasɛf. 10 Na dat mek a rayt dɛn tin ya we a nɔ de wit una, so dat we a de wit una, a nɔ go nid fɔ yuz di pawa we di Masta gi mi fɔ dil wit una tranga wan, bifo dat, a go yuz am fɔ ɛp una fɔ tinap tranga wan nɔto fɔ mek una at pwɛl.

11 Mi brɔda dɛn, di las tin we a gɛt fɔ se na fɔ lɛ una kɔntinyu fɔ gladi, fɔ de ajɔst unasɛf, fɔ gɛt kɔrej, fɔ tink di sem we, fɔ gɛt pis wit ɔda pipul dɛn; ɛn di Gɔd we gɛt lɔv ɛn pis go de wit una. 12 Una grit una kɔmpin dɛn wit oli kis. 13 Ɔl di oli wan dɛn de grit una.

14 Mek Masta Jizɔs Krays in spɛshal gudnɛs* ɛn Gɔd in lɔv ɛn di oli spirit we wi de bɛnifit frɔm togɛda de wit una ɔl.