Jɔn

8 12 Dɔn Jizɔs tɔk to dɛn bak se: “Mi na di layt fɔ di wɔl. Ɛnibɔdi we fala mi nɔ go waka insay daknɛs, bɔt i go gɛt di layt we de gi layf.” 13 So di Faresi dɛn tɛl am se: “Na yu de tɔk bɔt yusɛf, wetin yu de tɔk nɔto tru.” 14 Jizɔs tɛl dɛn se: “Ilɛksɛf a de tɔk bɔt misɛf, wetin a de tɔk na tru, bikɔs a no usay a kɔmɔt ɛn a no usay a de go. Bɔt una nɔ no usay a kɔmɔt ɛn usay a de go. 15 Una de jɔj di we aw mɔtalman de jɔj; a nɔ de jɔj ɛnibɔdi. 16 Ɛn ilɛksɛf a jɔj, na di rayt we a de jɔj, bikɔs nɔto mi wangren de du am, bɔt di Papa we sɛn mi de wit mi. 17 Apat frɔm dat, dɛn rayt na una Lɔ se: ‘Wetin tu witnɛs dɛn tɔk na tru.’ 18 A de tɔk bɔt misɛf, ɛn di Papa we sɛn mi de tɔk bɔt mi.” 19 Dɔn dɛn aks am se: “We yu Papa?” Jizɔs ansa dɛn se: “Una nɔ no mi ɛn una nɔ no mi Papa. If una no mi, una go no mi Papa bak.” 20 I tɔk dɛn wɔd ya we i de tich na di tɛmpul na di say we dɛn de kip di mɔni. Bɔt nɔbɔdi nɔ ol am, bikɔs in tɛm nɔ kam yet.

21 So i tɛl dɛn bak se: “A de go, ɛn una go luk fɔ mi, ɛn una go day wit una sin. Usay a de go, una nɔ go ebul fɔ kam de.” 22 Di Ju dɛn bigin fɔ tɔk se: “I nɔ go kil insɛf, nɔto so? Bikɔs i tɔk se, ‘Usay a de go, una nɔ go ebul fɔ kam de.’” 23 I kɔntinyu fɔ tɛl dɛn se: “Na dɔŋ ya una de; na ɔp mi kɔmɔt. Na dis wɔl una kɔmɔt; nɔto dis wɔl mi kɔmɔt. 24 Na dat mek a tɛl una se: Una go day wit una sin dɛn. If una nɔ biliv se mi na di wan we a tɛl una se a bi, una go day wit una sin dɛn.” 25 So dɛn aks am se: “Udat na yu?” Jizɔs tɛl dɛn se: “Wetin mek a de tɔk to unasɛf? 26 A gɛt bɔku tin dɛn fɔ tɔk bɔt una ɛn fɔ jɔj. Infakt, di Wan we sɛn mi de tɔk tru, ɛn di tin dɛn we a bin yɛri i de tɔk na dɛn tin dɛn de a de tɔk na di wɔl.” 27 Dɛn nɔ bin ɔndastand se i de tɔk to dɛn bɔt di Papa. 28 Dɔn Jizɔs tɛl dɛn se: “We una es mɔtalman Pikin ɔp, na da tɛm de una go no se mi na in ɛn a nɔ de du ɛnitin bay misɛf; bɔt jɔs lɛk aw di Papa tich mi na so a de tɔk. 29 Ɛn di Wan we sɛn mi de wit mi; i nɔ lɛf mi to misɛf, bikɔs a de du wetin i want ɔltɛm.” 30 As i de tɔk dɛn wɔd ya, bɔku pipul dɛn gɛt fet pan am.

31 Dɔn Jizɔs tɛl di Ju dɛn we dɔn biliv am se: “If una de du wetin a tɛl una fɔ du, una na mi tru tru disaypul dɛn, 32 ɛn una go no di trut, ɛn di trut go fri una.” 33 Dɛn tɛl am se: “Wi na Ebraam in gret gret granpikin dɛn, ɛn wi nɔ ɛva bi slev to ɛnibɔdi. So, wetin mek yu se, ‘Una go fri’?” 34 Jizɔs tɛl dɛn se: “Fɔ tru, a de tɛl una se ɛnibɔdi we de sin na sin in slev. 35 Pantap dat, slev nɔ de lɛf na di os sote go, bɔt di pikin de lɛf na di os sote go. 36 So if di pikin fri una, una dɔn fri fɔ tru. 37 A no se una na Ebraam in gret gret granpikin dɛn. Bɔt una de fɛn we fɔ kil mi, bikɔs una nɔ biliv wetin a de tɛl una. 38 A de tɔk di tin dɛn we a si we a bin de wit mi Papa, bɔt una de du di tin dɛn we una papa tɛl una.” 39 Dɛn tɛl am se: “Na Ebraam na wi papa.” Jizɔs tɛl dɛn se: “If una na Ebraam in pikin dɛn, una fɔ de du di tin dɛn we Ebraam bin de du. 40 Bɔt naw una de tray fɔ kil mi, mi we dɔn tɛl una di tru tin we Gɔd tɛl mi. Ebraam nɔ bin du dat. 41 Una de du di tin dɛn we una papa de du.” Dɛn tɛl am se: “Nɔto pan fri layf dɛn bɔn wi; na wangren Papa wi gɛt, dat na Gɔd.”

42 Jizɔs tɛl dɛn se: “If Gɔd na una Papa, una go lɛk mi, bikɔs a kɔmɔt to Gɔd ɛn a de ya. A nɔ kam bay misɛf, na Gɔd sɛn mi. 43 Wetin mek una nɔ de ɔndastand wetin a de tɔk? Na bikɔs una nɔ de lisin to wetin a de tɔk. 44 Na di Dɛbul na una papa, ɛn una want fɔ du di tin dɛn we una papa want. Frɔm di biginin, in na pɔsin we de kil, ɛn i nɔ kɔntinyu fɔ tinap tranga wan fɔ di trut, bikɔs trut nɔ de insay am. We i de lay, i de sho di kayn pɔsin we i bi, bikɔs in na layman ɛn na di papa pan lay. 45 Bɔt we mi de tɛl una di trut, una nɔ de biliv mi. 46 Udat pan una go pruv se a dɔn sin? If na tru a de tɔk, wetin mek una nɔ de biliv mi? 47 Di wan we de fɔ Gɔd de lisin to wetin Gɔd de se. Una nɔ de lisin, bikɔs una nɔ de fɔ Gɔd.”

48 Na de di Ju dɛn tɛl am se: “Nɔto dat mek wi se, ‘Yu na Samɛritan ɛn yu gɛt dimɔn’?” 49 Jizɔs ansa dɛn se: “A nɔ gɛt dimɔn; a de ɔnɔ mi Papa, bɔt una nɔ de ɔnɔ mi. 50 A nɔ de fɛn prez fɔ misɛf; Pɔsin de we de du dat ɛn na in de jɔj. 51 Fɔ tru, a de tɛl una se if ɛnibɔdi du wetin a de se, i nɔ go ɛva day.” 52 Di Ju dɛn tɛl am se: “Na naw wi no se yu gɛt dimɔn. Ebraam day, ɛn di prɔfɛt dɛn bak day, bɔt yu se, ‘If ɛnibɔdi du wetin a de se, i nɔ go ɛva day.’ 53 Yu nɔ bɛtɛ pas wi papa Ebraam we dɔn day, yu bɛtɛ pas am? Di prɔfɛt dɛn bak dɔn day. So udat yu se yu bi?” 54 Jizɔs ansa dɛn se: “If a de prez misɛf, di prez we a de prez misɛf na natin. Na mi Papa de prez mi, di wan we una de se na una Gɔd. 55 Bɔt una nɔ no am, mi no am. Ɛn if a se a nɔ no am, a go tan lɛk una we de lay. Bɔt a no am, ɛn a de du wetin i se. 56 Ebraam we na una papa bin de wet wit gladi-at fɔ si mi tɛm, ɛn i si am ɛn gladi.” 57 Dɔn di Ju dɛn tɛl am se: “Yu nɔ 50 ia yet, ɛn yu se yu dɔn si Ebraam?” 58 Jizɔs tɛl dɛn se: “Fɔ tru, a de tɛl una se a bin dɔn de bifo Ebraam bigin liv.” 59 So dɛn pik ston dɛn fɔ ston Jizɔs, bɔt i ayd ɛn kɔmɔt na di tɛmpul.