Matyu

21 We dɛn rich nia Jerusɛlɛm, dɛn stɔp na Bɛtfeji we de na Mawnt Ɔliv, dɔn Jizɔs tɛl tu pan in disaypul dɛn se: 2 “Una go na di vilej we de bifo una. As una go insay di vilej, una go si wan dɔnki we tay ɛn in pikin de wit am. Una lus dɛn ɛn briŋ dɛn kam to mi. 3 If sɔmbɔdi aks una ɛnitin, una tɛl am se, ‘Di Masta nid dɛn.’ Ɛn i go sɛn dɛn wantɛm wantɛm.”

4 Dis bin rili apin fɔ mek wetin Gɔd yuz di prɔfɛt fɔ tɔk kam tru, we i se: 5 “Tɛl Zayɔn in galpikin se: ‘Luk! Yu kiŋ de kam to yu, i ɔmbul ɛn i sidɔm pantap dɔnki, pantap dɔnki pikin, pantap dɔnki we de tot lod in pikin.’”

6 So di disaypul dɛn go du ɔl wetin Jizɔs tɛl dɛn. 7 Dɛn briŋ di dɔnki ɛn in pikin, ɛn dɛn prɛd dɛn klos* pan dɛn, ɛn i sidɔm pantap dɛn. 8 Bɔku pipul dɛn prɛd dɛn klos* na di rod, ɛn ɔda wan dɛn kɔt branch dɛn pan tik dɛn ɛn le dɛn na di rod. 9 Pantap dat, di pipul dɛn we de bifo am ɛn di wan dɛn we de fala am bin de ala se: “Gɔd, wi de pre mek yu sev Devid in Pikin! Blɛsin de pan di wan we de kam tinap fɔ Jiova* in nem! Wi de pre mek yu sev am, yu we de na ɛvin!”

10 We i rich na Jerusɛlɛm, di wan ol siti miksɔp. Pipul dɛn bin de aks se: “Udat dis?” 11 Di pipul dɛn na di krawd bin de se: “Dis na prɔfɛt Jizɔs, frɔm Nazarɛt we de na Galili!”

12 Jizɔs go insay di tɛmpul ɛn drɛb ɔl di wan dɛn we de sɛl ɛn bay na di tɛmpul, ɛn i tɔnoba di tebul dɛn we pipul dɛn de chenj mɔni pan ɛn di bɛnch dɛn we di wan dɛn we de sɛl dɔv de yuz. 13 Ɛn i tɛl dɛn se: “Dɛn bin rayt se, ‘Dɛn go kɔl mi os prea os,’ bɔt una dɔn tɔn am to ples we tifman dɛn de ayd.” 14 Dɔn pipul dɛn we blayn ɛn we nɔ ebul waka fayn kam mit am na di tɛmpul, ɛn i mɛn dɛn.

15 We di edman dɛn fɔ di prist dɛn ɛn di Lɔ ticha dɛn si di wɔndaful tin dɛn we i dɔn du, ɛn di bɔbɔ dɛn we bin de ala na di tɛmpul se, “Gɔd, wi de pre mek yu sev Devid in Pikin!” dɛn vɛks 16 ɛn tɛl am se: “Yu yɛri wetin dɛn de se?” Jizɔs tɛl dɛn se: “Yɛs. Una nɔ bin ɛva rid dis, ‘Yu dɔn mek pikin dɛn ɛn yɔŋbebi dɛn prez yu’?” 17 Ɛn i lɛf dɛn de ɛn kɔmɔt na di siti ɛn go slip na Bɛtani da nɛt de.

18 We i de tɔn bak na di siti ali mɔnin, i angri. 19 I si wan fig tik nia di rod ɛn go nia am, bɔt i nɔ si natin pan am pas lif dɛn nɔmɔ, so i tɛl di tik se: “Yu nɔ go ɛva bia frut igen.” Ɛn wantɛm wantɛm, di fig tik wida. 20 We di disaypul dɛn si dis, dɛn wɔnda ɛn se: “Wetin mek di fig tik wida wantɛm wantɛm?” 21 Jizɔs ansa dɛn se: “Fɔ tru, a de tɛl una se if una gɛt fet ɛn nɔ dawt, una nɔ go jɔs du wetin a du to di fig tik, bɔt ivin if una tɛl dis mawntin se, ‘Kɔmɔt na ya ɛn go fɔdɔm insay di si,’ i go apin. 22 Ɛn if una gɛt fet, una go gɛt ɔl wetin una de pre fɔ.”

23 We i go na di tɛmpul, di edman dɛn fɔ di prist dɛn ɛn di lida dɛn fɔ di pipul dɛn kam to am we i de tich ɛn aks am se: “Us rayt yu gɛt fɔ du dɛn tin ya? Udat gi yu di rayt fɔ du dɛn?” 24 Jizɔs ansa dɛn se: “Misɛf go aks una wan kwɛstyɔn. If una ansa mi, a go tɛl una wetin mek a gɛt rayt fɔ du dɛn tin ya: 25 Udat bin sɛn Jɔn fɔ baptayz pipul dɛn, na Gɔd we de na ɛvin ɔ na mɔtalman?” Bɔt dɛn bigin fɔ tɔk to dɛn kɔmpin dɛn se: “If wi se, ‘Na Gɔd we de na ɛvin sɛn am,’ i go tɛl wi se, ‘Wetin mek, naw, una nɔ bin biliv am?’ 26 Bɔt if wi se, ‘Na mɔtalman,’ wi de fred di pipul dɛn, bikɔs dɛn ɔl tek Jɔn as prɔfɛt.” 27 So dɛn tɛl Jizɔs se: “Wi nɔ no.” Nain insɛf tɛl dɛn se: “Misɛf nɔ go tɛl una wetin mek a gɛt rayt fɔ du dɛn tin ya.

28 “Wetin una tink? Wan man gɛt tu pikin dɛn. I go mit di fɔs wan ɛn tɛl am se, ‘Mi pikin, go wok na di vayn gadin tide.’ 29 Di fɔs pikin tɛl am se, ‘A nɔ go du am,’ bɔt afta sɔm tɛm, i rigrɛt ɛn go du am. 30 Di man go mit di sɛkɔn pikin ɛn tɛl am di sem tin. Di sɛkɔn pikin tɛl am se, ‘A go du am, Sa,’ bɔt i nɔ du am. 31 Pan dɛn tu pikin ya, uswan du wetin in papa want?” Dɛn se: “Na di fɔs wan.” Jizɔs tɛl dɛn se: “Fɔ tru, a de tɛl una se di pipul dɛn we de gɛda taks ɛn di raregal dɛn de go bifo una insay Gɔd in Kiŋdɔm. 32 Jɔn kam sho una wetin rayt, bɔt una nɔ biliv am. Bɔt di pipul dɛn we de gɛda taks ɛn di raregal dɛn biliv am, ɛn pan ɔl we una si dis, una nɔ rigrɛt leta ɛn biliv am.

33 “Una lisin to dis ɔda ɛgzampul: Wan man bin de we gɛt land. I plant vayn gadin, i mek fɛns rawnd am, i mek wan ples fɔ mas greps, ɛn i bil tawa.* Dɔn i lis am to fama dɛn, ɛn i travul go na ɔda kɔntri. 34 We di sizin kam we di frut kin rɛp, i sɛn in slev dɛn to di fama dɛn fɔ go tek in frut dɛn. 35 Bɔt di fama dɛn ol in slev dɛn; dɛn bit wan, dɛn kil wan, ɛn dɛn ston di ɔda wan. 36 I sɛn ɔda slev dɛn bak we bɔku pas di fɔs wan dɛn, bɔt dɛn du di sem tin to dɛn. 37 So i sɛn in bɔypikin to dɛn, ɛn tɔk se, ‘Dɛn go rɛspɛkt mi bɔypikin.’ 38 We di fama dɛn si di bɔypikin, dɛn tɔk to dɛnsɛf se, ‘Na dis gɛt fɔ gɛt di vayn gadin. Una kam, lɛ wi kil am ɛn tek in prɔpati!’ 39 So dɛn pul am na di vayn gadin ɛn kil am. 40 We di man we gɛt di vayn gadin kam, wetin i go du to dɛn fama dɛn de?” 41 Dɛn tɛl am se: “Bikɔs dɛn wikɛd, i go kil dɛn ɛn lis di vayn gadin to ɔda fama dɛn, we go gi am di frut dɛn we di sizin rich.”

42 Jizɔs tɛl dɛn se: “Una nɔ ɛva rid na di Skripchɔ dɛn se, ‘Di ston we di wan dɛn we de bil nɔ gri fɔ yuz, na in dɔn bi di men ston na di kɔna. Na Jiova* dɔn du dis, ɛn i wɔndaful na wi yay’? 43 Na dis mek a de tɛl una se Gɔd go tek in Kiŋdɔm na una an ɛn gi am to neshɔn we de du wetin i want. 44 Di pɔsin we fɔdɔm pan dis ston go damej bad bad wan. Ɛn ɛnibɔdi we dis ston fɔdɔm pan go nyamanyama.”

45 We di edman dɛn fɔ di prist dɛn ɛn di Faresi dɛn yɛri in ɛgzampul dɛn, dɛn no se na dɛn i bin de tɔk bɔt. 46 Dɛn bin want fɔ ol* am, bɔt dɛn bin de fred di pipul dɛn, bikɔs di pipul dɛn tek am as prɔfɛt.