LAMƐNTESHƆN
א [Alɛf]*
1 Luk di uman we in wangren sidɔm naw, di siti we bin ful-ɔp wit pipul dɛn!
I dɔn tan lɛk uman we in man dɔn day, in we bin gɛt bɔku bɔku pipul dɛn we yu kɔmpia am to ɔda neshɔn dɛn!
Dɛn dɔn fos in we na bin prinsɛs na di prɔvins dɛn fɔ wok tranga tranga wan!
ב [Bɛt]
2 I de kray bita bita wan ol nɛt, ɛn na soso kray wata de na in jɔ.
Nɔn pan di man dɛn we i lɛk nɔ de de fɔ kɔrej am.
Ɔl in kɔmpin dɛn dɔn kɔmɔt biɛn am, dɛn dɔn tɔn in ɛnimi dɛn.
ג [Gimɛl]
3 Juda dɔn kɔmɔt na in land ɛn go na say usay i de sɔfa ɛn wok tranga tranga wan as slev.
I fɔ de na di neshɔn dɛn; i nɔ gɛt no say fɔ rɛst.
Ɔl di wan dɛn we de mek i sɔfa kam mit am di tɛm we i gɛt prɔblɛm.
ד [Dalɛt]
4 Di rod dɛn fɔ go Zayɔn de kray, bikɔs nɔbɔdi nɔ de kam dɛn fɛstival.
Ɔl in get dɛn dɔn pwɛl pwɛl; in prist dɛn de pini.
In vajin* dɛn de kray, ɛn in at rili pwɛl.
ה [I]
5 Na in ɛnimi dɛn naw dɔn bi in masta;* in ɛnimi dɛn kiafri.
Jiova dɔn briŋ pwɛlat pan am bikɔs ɔf in bɔku bɔku sin dɛn.
In ɛnimi dɔn kapchɔ in pikin dɛn ɛn kɛr dɛn go.
ו [Wa]
6 Zayɔn in faynɛs ɔl dɔn lɔs.
In prins dɛn tan lɛk man dia dɛn we nɔ gɛt gras fɔ it,
Ɛn dɛn de waka taya taya wan bifo di wan we de rɔnafta dɛn.
ז [Zayin]
7 Di tɛm we Jerusɛlɛm bin de sɔfa, we i nɔ gɛt say fɔ de, i mɛmba
Ɔl di valyu tin dɛn we i bin gɛt trade trade.
We di ɛnimi dɛn kech in pipul dɛn, ɛn i nɔ gɛt pɔsin fɔ ɛp am,
Di ɛnimi dɛn si am ɛn laf bikɔs i dɔn fɔdɔm.
ח [Ɛt]
8 Jerusɛlɛm dɔn sin bad bad wan.
Na dat mek i dɔn tan lɛk sɔntin we ɔlman et.
Ɔl di wan dɛn we bin de ɔnɔ am trade nɔ gɛt rɛspɛkt fɔ am naw bikɔs dɛn dɔn si in nekɛdnɛs.
I de pini, ɛn i dɔn shem.
ט [Tɛt]
9 In dɔti layf de na in skat.
I nɔ tink bɔt in tumara bambay.
Pipul dɛn bin sɔprayz we i fɔdɔm; i nɔ gɛt nɔbɔdi fɔ kɔrej am.
E Jiova, luk di we aw a de sɔfa, di ɛnimi dɔn mek insɛf big.
י [Yɔd]
10 Di ɛnimi dɔn tek ɔl in jɛntri.
I dɔn si neshɔn dɛn dɔn ɛnta in tɛmpul,
Di wan dɛn we yu bin dɔn se nɔ fɔ go midul yu pipul dɛn.
כ [Kaf]
11 Ɔl in pipul dɛn de pini; dɛn de luk fɔ tin fɔ it.
Dɛn dɔn gi dɛn valyu tin dɛn so dat dɛn go gɛt sɔntin fɔ it, jɔs fɔ mek dɛn nɔ day.*
E Jiova, luk, ɛn si fɔ se a dɔn tan lɛk uman* we nɔ gɛt wan valyu.
ל [Lemɛd]
12 Fɔ se i nɔ min natin to una ɔl we de pas na di rod?
Una luk ɛn si!
Ɛni pen de we tan lɛk di pen we a dɔn gɛt,
We Jiova dɔn mek a fil di tɛm we in at wam?
מ [Mɛm]
13 I dɔn sɛn faya frɔm ɛvin fɔ bɔn di bon dɛn na mi bɔdi.
I dɔn prɛd nɛt fɔ mi fut, i dɔn fos mi fɔ tɔn bak.
I dɔn mek a dɔn tan lɛk uman we na in wangren de.
Ol de a sik.
נ [Nɔn]
14 I dɔn tay mi sin dɛn lɛk yok,* i yuz in an fɔ tay dɛn togɛda.
I dɔn put dɛn na mi nɛk, ɛn a nɔ gɛt trɛnk igen.
Jiova dɔn gi mi to pipul dɛn we a nɔ ebul fɔ chalenj.
ס [Samɛk]
15 Jiova dɔn push na kɔna ɔl di pawaful man dɛn we de wit mi.
I dɔn kɔl bɔku bɔku pipul dɛn fɔ nyamanyama mi yɔŋman dɛn.
Jiova dɔn mas mas Jerusɛlɛm na di say usay dɛn de mek wayn.
ע [Ayin]
16 A de kray bikɔs ɔf dɛn tin ya; mi yay ful-ɔp wit kray wata.
Bikɔs di wan we fɔ kɔrej mi ɔ mek a* fil fayn de fa frɔm mi.
Mi pikin dɛn nɔ gɛt wan op, bikɔs di ɛnimi dɔn win.
פ [Pe]
17 Zayɔn dɔn opin in an dɛn; i nɔ gɛt pɔsin fɔ kɔrej am.
Jiova dɔn kɔl ɔl Jekɔp in ɛnimi dɛn fɔ kam agens am.
Jerusɛlɛm dɔn tan to dɛn lɛk sɔntin we dɛn et.
צ [Sada]
18 Jiova de du wetin rayt, a dɔn tɔn mi bak agens in lɔ dɛn.*
Ɔl di pipul dɛn, una lisin, ɛn si mi pen.
Dɛn dɔn kapchɔ mi vajin* dɛn, ɛn mi yɔŋman dɛn.
ק [Kof]
19 A dɔn kɔl di man dɛn we a lɛk, bɔt dɛn dɔn kɔmɔt biɛn mi.
Mi prist dɛn ɛn mi bigman dɛn dɔn day na di siti,
We dɛn bin de fɛn tin fɔ it, so dat dɛn nɔ go day.*
ר [Resh]
20 E Jiova, a rili gɛt pwɛlat.
Mi gɔt dɛn de twis twis.
Mi at rili pwɛl, bikɔs a dɔn mek trangayes.
Sɔd de kil kil pipul dɛn na do, ɛn insay os tan lɛk day.
ש [Shin]
21 Pipul dɛn dɔn yɛri di pini we a de pini; bɔt pɔsin nɔ de fɔ kɔrej mi.
Ɔl mi ɛnimi dɛn dɔn yɛri bɔt mi prɔblɛm.
Dɛn gladi bikɔs na yu put am pan mi.
Bɔt yu go mek di de we yu bin dɔn tɔk bɔt kam, we dɛn go tan lɛk mi.
ת [Tɔ]
22 Duya, notis ɔl di bad tin dɛn we dɛn dɔn du ɛn trit dɛn bad,
Jɔs lɛk aw yu dɔn trit mi bad bikɔs ɔf ɔl mi sin dɛn.
Bikɔs a dɔn pini bɔku, ɛn mi at sik.
א [Alɛf]
2 Jiova in wamat dɔn kɔba Zayɔn lɛk klawd!
I dɔn pul Izrɛl in faynɛs kɔmɔt na ɛvin ɛn trowe am kam dɔŋ na di wɔl.
I nɔ mɛmba usay i de put in fut di tɛm we i vɛks.
ב [Bɛt]
2 Jiova dɔn swɛla di say dɛn we Jekɔp de lɛk se i nɔ gɛt sɔri-at.
Pan in wamat, i dɔn brok brok Juda in strɔng ples dɛn.
I dɔn briŋ di kiŋdɔm ɛn in prins dɛn dɔŋ ɛn disgres dɛn.
ג [Gimɛl]
3 Pan in wamat, i mek Izrɛl nɔ gɛt trɛnk* igen.
I nɔ ɛp wi we di ɛnimi kam,
Ɛn i kɔntinyu fɔ bɔn na Jekɔp lɛk faya we de bɔn ɛnitin we de arawnd am.
ד [Dalɛt]
4 I dɔn bɛn in bo lɛk ɛnimi; i dɔn rɛdi in raytan lɛk ɛnimi;
I kɔntinyu fɔ kil ɔl di wan dɛn we fayn fɔ luk.
I tɔn in wamat pan Zayɔn in tɛnt lɛk faya.
ה [I]
5 Jiova dɔn tan lɛk ɛnimi;
I dɔn swɛla Izrɛl.
I dɔn swɛla ɔl in tawa dɛn;
I dɔn dɔnawe wit ɔl in strɔng ples dɛn.
I dɔn mek Juda de munin ɛn kray ɔlsay.
ו [Wa]
6 I brok brok in bafa lɛk fam os.
I stɔp* in fɛstival.
Jiova dɔn mek dɛn dɔn fɔgɛt bɔt fɛstival ɛn sabat na Zayɔn,
Ɛn pan in wamat, i nɔ want fɔ no if pɔsin na kiŋ ɛn prist.
ז [Zayin]
7 Jiova nɔ lɛk in ɔlta igen;
I dɔn et in tɛmpul.
I dɔn sɔrɛnda di strɔng tawa dɛn wɔl dɛn to di ɛnimi.
Dɛn dɔn ala na Jiova in os, lɛk we dɛn gɛt fɛstival.
ח [Ɛt]
8 Jiova dɔn disayd fɔ dɔnawe wit Zayɔn in wɔl.
I dɔn strɛch di rop fɔ mɛzhɔ.
I nɔ stɔp insɛf nɔ fɔ dɔnawe wit dɛn.
I mek wɔl dɛn kray.
I dɔn mek dɛn wik.
ט [Tɛt]
9 Dɔti dɔn kɔba in get dɛn.
Gɔd dɔn brok brok di ba dɛn na in get ɛn dɔnawe wit dɛn.
In kiŋ ɛn in prins dɛn de na di neshɔn dɛn.
Lɔ nɔ de,* ivin in prɔfɛt dɛn nɔ de si vishɔn frɔm Jiova.
י [Yɔd]
10 Di bigman dɛn na Zayɔn sidɔm na grɔn kwayɛt wan.
Dɛn trowe dɔst na dɛn ed, ɛn dɛn wɛr klos we pipul dɛn kin wɛr we dɛn at pwɛl.
Di vajin dɛn na Jerusɛlɛm dɔn butu dɛn ed na grɔn.
כ [Kaf]
11 Mi yay dɔn taya fɔ kray.
Mi gɔt dɛn de twis twis.
Mi liva dɔn kɔmɔt fɔdɔm na grɔn bikɔs ɔf di bad bad tin dɛn we dɔn apin to mi galpikin,* mi pipul dɛn,
Bikɔs di pikin dɛn ɛn di yɔŋbebi dɛn de fent na di pɔblik ples* dɛn na di tɔŋ.
ל [Lemɛd]
12 Dɛn de aks dɛn mama dɛn se, “We di it ɛn di wayn?”
As dɛn de fent lɛk sɔmbɔdi we wund na di pɔblik ples* dɛn na di siti,
As dɛn layf de kɔmɔt pan dɛn na dɛn mama dɛn an.
מ [Mɛm]
13 E Jerusɛlɛm, wetin a go yuz as witnɛs?
Ɔ wetin a go se yu fiba lɛk?
E Zayɔn, to wetin a go kɔmpia yu fɔ kɔrej yu?
Bikɔs di trɔbul we dɔn mit yu big lɛk di si. Udat go mɛn yu?
נ [Nɔn]
14 Na lay lay vishɔn dɛn yu prɔfɛt dɛn bin si, ɛn dɛn nɔ min natin.
Dɛn nɔ tɛl yu bɔt di bad bad tin dɛn we yu du we fɔ dɔn mek dɛn nɔ kapchɔ yu,
Bɔt dɛn kɔntinyu fɔ si lay lay vishɔn dɛn ɛn tɛl yu tɔk dɛn we nɔto tru fɔ ful yu.
ס [Samɛk]
15 Ɔl di wan dɛn we de pas na di rod de klap pan yu.
Dɛn de wisul, dɛn sɔprayz, ɛn dɛn shek dɛn ed pan Jerusɛlɛm. Dɛn de tɔk se:
“Na di siti dis we dɛn se, ‘Fayn in kayn nɔ de, we de mek di wan ol wɔl gladi’?”
פ [Pe]
16 Ɔl yu ɛnimi dɛn dɔn opin dɛn mɔt pan yu.
Dɛn wisul ɛn gren dɛn tit ɛn se, “Wi dɔn swɛla am.
Dis na di de we wi bin de wet fɔ! I dɔn kam, ɛn wi dɔn si am!”
ע [Ayin]
17 Jiova dɔn du wetin i bin want; i dɔn du wetin i bin se,
Di tin we i bin tɔk trade trade.
I dɔn pwɛl ɛn nɔ sho sɔri-at.
I dɔn alaw di ɛnimi fɔ gladi fɔ di bad tin we apin to yu. I dɔn mek di wan we et yu gɛt mɔ trɛnk.
צ [Sada]
18 E Zayɔn in wɔl, di pipul dɛn de kray to Jiova frɔm dɛn at.
Lɛ kray wata rɔndɔŋ na dɛn yay ol de ɛn nɛt lɛk bɔku bɔku wata.
Nɔ gi yusɛf wan bloblo, nɔ alaw yu yay* fɔ rɛst.
ק [Kof]
19 Grap, kray ol nɛt.
Tɛl Jiova wetin de na yu at lɛk we dɛn de tɔn wata.
Es yu an ɛn pre to am fɔ yu pikin dɛn layf,
As dɛn de fent na di kɔna dɛn na ɔl di strit dɛn* bikɔs it nɔ de.
ר [Resh]
20 E Jiova, wach di wan we yu dɔn pɔnish bad bad wan.
Fɔ se uman dɛn go kɔntinyu fɔ it dɛn pikin dɛn, dɛn yon bɛlɛ-bɔn pikin dɛn?
Ɔ fɔ se pipul dɛn go kil prist ɛn prɔfɛt dɛn na yu, Jiova, yu tɛmpul?
ש [Shin]
21 Yɔŋbɔy ɛn olpa dɛn ledɔm na strit dɛn day wan.
Sɔd dɔn kil mi vajin* dɛn ɛn mi yɔŋman dɛn.
Yu dɔn kil pipul dɛn di tɛm we yu vɛks; yu dɔn kil ɛn nɔ sho sɔri-at.
ת [Tɔ]
22 Yu mek trɔbul kɔmɔt ɔlsay lɛk we dɛn de kɔl pipul dɛn fɔ fɛstival.
Di tɛm we Jiova vɛks, nɔbɔdi nɔ de ɛskep ɔ sɔvayv;
Mi ɛnimi dɔn dɔnawe wit di wan dɛn we a bɔn ɛn mɛn.
א [Alɛf]
3 Mi na man we dɔn si pipul dɛn sɔfa bikɔs Gɔd rili vɛks.
2 I dɔn drɛb mi, ɛn i nɔ mek a waka na layt; i mek a waka na daknɛs.
3 Fɔ tru, ɔltɛm i de agens mi.
ב [Bɛt]
4 I dɔn mek mi flɛsh, ɛn mi skin ol;
I dɔn brok brok mi bon dɛn.
5 I dɔn sɔrawnd mi. I dɔn put bita pɔyzin ɛn tranganɛs rayt rawnd mi.
6 I dɔn fos mi fɔ sidɔm na dak ples dɛn, lɛk pipul dɛn we bin dɔn day trade trade.
ג [Gimɛl]
7 I dɔn bil fɛns rawnd mi, so dat a nɔ go ɛskep.
I dɔn tay mi wit ɛvi kɔpa chen dɛn.
8 We a de kray bita bita wan to am fɔ ɛp, i nɔ de lisin* mi prea.
9 I dɔn blɔk mi rod wit big big ston dɛn;
I dɔn mek mi rod rɔf.
ד [Dalɛt]
10 I le ambush fɔ mi lɛk bia, lɛk layɔn we ayd.
11 I dɔn push mi kɔmɔt na rod, ɛn i dɔn chɛr chɛr mi;*
I dɔn mek na mi wangren de.
12 I dɔn bɛn* in bo, ɛn i dɔn mek mi tagɛt fɔ di aro.
ה [I]
13 I dɔn chuk mi kidni dɛn wit di aro* dɛn na in aro bag.
14 A dɔn bi di tin we de mek pipul dɛn de laf, ɛn di tin we dɛn de siŋ bɔt ɔltɛm.
15 I dɔn mek a bɛlful wit bita tin dɛn, ɛn i dɔn mek a de drink bita plant.
ו [Wa]
16 I brok mi tit wit gravul;
I mek a butu insay ashis.
17 Yu mek a nɔ gɛt pis; a dɔn fɔgɛt wetin gud.
18 So a tɔk se: “Mi faynɛs ɛn wetin a de ɛkspɛkt frɔm Jiova dɔn dɔn.”
ז [Zayin]
19 Mɛmba di sɔfa we a dɔn sɔfa ɛn we a nɔ gɛt say fɔ de, Di bita plant ɛn di bita pɔyzin.
20 Yu* go mɔs mɛmba mi ɛn kam to mi ɛn ɛp mi.
21 Dip insay mi at a mɛmba dis, na dat mek a go peshɛnt wet.
ח [Ɛt]
22 Na bikɔs Jiova gɛt lɔv we nɔ de chenj, na dat mek wi nɔ day yet,
Bikɔs in sɔri-at nɔ de ɛva dɔn.
23 Dɛn de nyu ɛni mɔnin; yu fetful pasmak.
24 A dɔn tɔk se,* “Jiova na mi pɔshɔn, na dat mek a go wet fɔ am.”
ט [Tɛt]
25 Jiova gud to di wan we de abop pan am, To di pɔsin* we de kɔntinyu fɔ luk fɔ am.
26 I gud fɔ wet kwayɛt wan* fɔ di tɛm we Jiova go sev in pipul dɛn.
27 I gud fɔ mek man tot yok* di tɛm we i yɔŋ.
י [Yɔd]
28 Lɛ i sidɔm in wan ɛn sɛt mɔt we Gɔd de put am pan am.
29 Lɛ i put in mɔt insay dɔst; sɔntɛm op stil de.
30 Lɛ i gi in jɔ to di wan we de slap am; lɛ i bɛlful wit disgres.
כ [Kaf]
31 Jiova nɔ go pul an pan wi sote go.
32 Pan ɔl we i dɔn mek wi gɛt pwɛlat, i go sho wi bak sɔri-at bikɔs ɔf in pasmak lɔv we nɔ de chenj.
33 I nɔ de na in at fɔ lɛ mɔtalman sɔfa ɔ gɛt pwɛlat.
ל [Lemɛd]
34 We pɔsin de mas mas ɔl di prizina dɛn na di wɔl ɔnda in fut,
35 We pɔsin de mek in kɔmpin nɔ gɛt jɔstis bifo di Wan We De Pantap Ɔlman,
36 We pɔsin de kruk in kɔmpin pan kes;
Jiova nɔ de ɛnkɔrej dɛn kayn tin dɛn de.
מ [Mɛm]
37 So udat go tɔk ɛn mek wetin i tɔk bi, if nɔto Jiova tɔk am?
38 Bad tin ɛn gud tin nɔ de kɔmɔt togɛda Na di Wan We De Pantap Ɔlman in mɔt.
39 So wetin mek pɔsin we de alayv fɔ grɔmbul fɔ di bad tin dɛn we de mit am bikɔs ɔf in sin dɛn?
נ [Nɔn]
40 Lɛ wi tink ɛn chɛk gud gud wan di tin dɛn we wi de du, ɛn lɛ wi tɔn bak to Jiova.
41 Lɛ wi beg Gɔd we de na ɛvin wit ɔl wi at ɛn es wi an dɛn to am ɛn se:
42 “Wi dɔn sin ɛn tɔn wi bak pan yu, ɛn yu nɔ fɔgiv wi yet.
ס [Samɛk]
43 Yu dɔn blɔk wi wit wamat fɔ mek wi nɔ kam to yu;
Yu dɔn rɔnafta wi ɛn kil wi, ɛn nɔ sho sɔri-at.
44 Yu dɔn blɔk wi wit klawd, so dat wi prea dɛn nɔ go rich to yu.
45 Yu dɔn mek wi dɔn tan lɛk dɔti to pipul dɛn.”
פ [Pe]
46 Ɔl wi ɛnimi dɛn dɔn opin dɛn mɔt pan wi.
47 Wi de fred ɔltɛm ɛn na soso trɔbul de mit wi. Na wi nɔmɔ de ɛn ɔlsay pwɛl pwɛl.
48 Bɔku bɔku kray wata de kɔmɔt na mi yay bikɔs ɔf di bad tin we dɔn apin to mi pipul dɛn.*
ע [Ayin]
49 Kray wata jɔs de kɔmɔt na mi yay, i nɔ de stɔp,
50 Pas te Jiova luk dɔŋ frɔm ɛvin ɛn si.
51 Mi yay dɔn briŋ kam pwɛlat pan mi* bikɔs ɔf ɔl di uman dɛn na mi siti.
צ [Sada]
52 Mi ɛnimi dɛn de ɔnt mi lɛk bɔd fɔ no rizin.
53 Dɛn dɔn kil mi, dɛn de sɛn ston dɛn pan mi.
54 Wata dɔn kɔba mi, ɛn a tɔk se: “Mi yon dɔn dɔn!”
ק [Kof]
55 E Jiova, we a de rayt dɔŋ di ol, a kɔl yu nem.
56 Yɛri mi vɔys, nɔ blɔk yu yes we a de kray to yu fɔ ɛp.
57 Yu kam nia mi di de we a kɔl yu. Yu tɛl mi se: “Nɔ fred.”
ר [Resh]
58 Yu dɔn tek mi kes, E Jiova, yu dɔn sev mi layf.
59 E Jiova, yu dɔn si di bad tin dɛn we dɛn dɔn du to mi; duya mek lɛ a gɛt jɔstis.
60 Yu dɔn si ɔl di we dɛn aw dɛn de tɔn-am-gi ɛn ɔl dɛn bad plan fɔ mi.
ש [Sin] or [Shin]
61 E Jiova, yu dɔn yɛri we dɛn de provok mi ɛn ɔl dɛn bad plan fɔ mi,
62 Di tin dɛn we di wan dɛn we de agens mi de tɔk, ɛn dɛn sumu sumu tɔk we dɛn de tɔk bɔt mi ol de.
63 Luk dɛn; ilɛk dɛn sidɔm ɔ dɛn tinap, dɛn de provok mi insay dɛn siŋ dɛn!
ת [Tɔ]
64 E Jiova, yu go pe dɛn akɔdin to wetin dɛn du.
65 Yu go swɛ dɛn, fɔ mek dɛn gɛt strɔngat.
66 Jiova, yu go rɔnafta dɛn wit wamat ɛn dɔnawe wit dɛn na di wɔl.
א [Alɛf]
4 Luk we di fayn gold we bin de shayn trade nɔ de shayn bɛtɛ igen!
Luk we di oli ston dɛn skata skata na ɔl di kɔna dɛn na di strit dɛn!*
ב [Bɛt]
2 As fɔ di pipul dɛn na Zayɔn we bin valyu lɛk piɔ gold,
Naw dɛn tan lɛk jɔg dɛn we dɛn mek wit kle;
Tin we pɔsin we de wok wit kle mek!
ג [Gimɛl]
3 Ivin jakal* dɛn de gi bɔbi to dɛn pikin dɛn,
Bɔt mi galpikin, we na mi pipul dɛn, dɔn wikɛd lɛk ɔstrich dɛn na di wildanɛs.*
ד [Dalɛt]
4 Yɔŋbebi in tɔŋ de fasin na in mɔt bikɔs i tɔsti.
Pikin dɛn de beg fɔ tin fɔ it, bɔt nɔbɔdi nɔ gi dɛn ɛnitin.
ה [I]
5 Di wan dɛn we bin de it dɛn spɛshal it dɛn ledɔm na strit angri angri wan.
Di wan dɛn we gro ɔp de wɛr dia dia* klos dɛn dɔn ledɔm insay ashis.
ו [Wa]
6 Di pɔnishmɛnt* fɔ mi galpikin, we na mi pipul dɛn, bɔku pas di pɔnishmɛnt fɔ Sɔdɔm in sin,
We dɛn bin dɔnawe wit kwik kwik wan, ɛn nɔbɔdi nɔ bin de fɔ ɛp am.
ז [Zayin]
7 In Nazarayt dɛn bin klin pas sno ɛn wayt pas milk.
Dɛn bin rɛd pas koral* dɛn; dɛn bin de shayn lɛk safaya ston dɛn.
ח [Ɛt]
8 Dɛn dɔn blak pas chakol;
Yu nɔ go sabi dɛn we yu si dɛn na strit.
Dɛn bɔdi ɔl dɔn dɔn, na soso bon bon lɛf; dɛn skin dɔn tan lɛk dray wud.
ט [Tɛt]
9 Di wan dɛn we dɛn kil wit sɔd bɛtɛ pas di wan dɛn we angri kil,
We wik bikɔs it nɔ de, dɛn tan lɛk udat dɛn chuk wit sɔd.
י [Yɔd]
10 Uman dɛn we gɛt sɔri-at dɔn bwɛl dɛn yon pikin dɛn.
Na dɛn dɔn bi dɛn fud we dɛn at pwɛl di tɛm we bad tin de apin to mi galpikin, we na mi pipul dɛn.
כ [Kaf]
11 Jiova dɔn sho se i vɛks;
I dɔn pul in wamat.
I dɔn stat faya na Zayɔn we de bɔn ɔl in fawndeshɔn dɛn.
ל [Lemɛd]
12 Di kiŋ dɛn na di wɔl ɛn ɔl di pipul dɛn we de de nɔ bin biliv
Fɔ se di ɛnimi go pas na di get ɛn ɛnta Jerusɛlɛm.
מ [Mɛm]
13 Na bikɔs ɔf in prɔfɛt dɛn sin dɛn ɛn di sin dɛn we in prist dɛn kɔmit,
We bin de kil di pipul dɛn we bin de du wetin rayt insay de.
נ [Nɔn]
14 Dɛn de waka ɔp ɛn dɔŋ di strit dɛn lɛk blaynman we nɔ no usay i de go.
Dɛn dɔn dɔti dɛnsɛf wit blɔd,
So dat nɔbɔdi nɔ go ebul fɔ tɔch dɛn klos dɛn.
ס [Samek]
15 Pipul dɛn de ala pan dɛn se: “Una kɔmɔt na ya! Una nɔ klin! Una kɔmɔt na ya! Una kɔmɔt na ya! Una nɔ tɔch wi!”
Dɛn nɔ gɛt ples fɔ de, ɛn dɛn jɔs de go ɔp ɛn dɔŋ.
Pipul dɛn we de na di neshɔn dɛn se: “Dɛn nɔ go ebul fɔ de na ya wit wi.*
פ [Pe]
16 Na Jiova in sɛf sɛf go skata dɛn;
I nɔ go gladi fɔ dɛn igen.
Pipul dɛn nɔ go sho rɛspɛkt fɔ di prist dɛn, ɛn dɛn nɔ go sɔri fɔ di bigman dɛn.”
ע [Ayin]
17 Ivin naw, wi yay dɛn dɔn taya fɔ luk fɔ pɔsin we go ɛp wi, bɔt na fɔ natin.
Wi dɔn luk ɔp to wan neshɔn we nɔ go ebul fɔ sev wi.
צ [Sada]
18 Dɛn de ɔnt wi ɔlsay so dat wi nɔ go ebul fɔ waka na wi pɔblik ples* dɛn.
I nɔ de fa fɔ lɛ dɛn dɔnawe wit wi; wi tɛm dɔn dɔn. Di tɛm fɔ lɛ dɛn dɔnawe wit wi dɔn kam.
ק [Kof]
19 Di wan dɛn we bin de rɔnafta wi, fast pas di igul dɛn na di skay.
Dɛn de rɔnafta wi na di mawntin dɛn; dɛn de le ambush fɔ wi na di wildanɛs.*
ר [Resh]
20 Di wan we Jiova anɔynt, we tan lɛk di briz we wi de blo, dɛn dɔn kapchɔ am na dɛn big ol,
Di wan we wi bin dɔn tɔk bɔt se: “I go protɛkt wi we wi de wit di neshɔn dɛn.”
ש [Sin]
21 E di pipul dɛn na Idɔm, una we de na di land na Ɔz, una gladi pasmak.
Bɔt dɛn go pas di kɔp to unasɛf, ɛn una go drɔnk ɛn sho una nekɛdnɛs.
ת [Tɔ]
22 E Zayɔn, di pɔnishmɛnt fɔ yu sin dɔn dɔn.
I nɔ go mek dɛn kɛr una go na ɔda land igen.
Bɔt as fɔ una di pipul dɛn na Idɔm, Gɔd go tɔn in atɛnshɔn to una fɔ una sin dɛn.
I go pul una sin dɛn na do.
5 E Jiova, mɛmba wetin dɔn apin to wi.
Luk ɛn si wi disgres.
2 Strenja dɛn dɔn tek wi prɔpati dɛn we wi fambul dɛn lɛf gi wi, ɛn fɔrina dɛn dɔn tek wi os dɛn.
3 Wi dɔn tan lɛk pikin dɛn we nɔ gɛt papa; wi mama dɛn dɔn tan lɛk uman we in man dɔn day.
4 Wi fɔ pe fɔ drink wi yon wata ɛn gi sɔntin fɔ wi yon wud.
5 Di wan dɛn we de rɔnafta wi dɔn rich nia wi;
Wi dɔn taya, bɔt dɛn nɔ de mek wi rɛst.
6 Wi de beg Ijipt ɛn Asiria fɔ lɛ wi gɛt sɔntin fɔ it.
7 Wi gret gret granpa dɛn we sin nɔ de igen, bɔt na wi de sɔfa fɔ dɛn sin dɛn.
8 Na savant dɛn naw de rul wi; nɔbɔdi nɔ de fɔ pul wi kɔmɔt na dɛn an.
9 Wi de risk wi layf* fɔ gɛt tin fɔ it, bikɔs sɔd de na di wildanɛs.*
10 Wi skin dɔn wam lɛk ovin, bikɔs ɔf di pen we angri put pan wi.
11 Dɛn dɔn disgres* di mareduman dɛn na Zayɔn, di vajin dɛn na di siti dɛn na Juda.
12 Dɛn ɛng prins dɛn wit dɛn an, ɛn dɛn nɔ sho wan rɛspɛkt fɔ di bigman dɛn.
13 Yɔŋman dɛn tot grenin ston, ɛn bɔbɔ dɛn fɔdɔm wit wud dɛn we dɛn tot.
14 Di bigman dɛn dɔn kɔmɔt na di siti get, di yɔŋman dɛn nɔ de ple dɛn myuzik igen.
15 Gladi gladi nɔ de na wi at igen; di dans we wi de dans dɔn tɔn munin.
16 Di krawn dɔn kɔmɔt na wi ed ɛn fɔdɔm. Bad tin go apin to wi bikɔs wi dɔn sin.
17 Na dis dɔn mek wi at dɔn sik,
Ɛn na dɛn tin dɛn ya dɔn mek wi yay dɛn dɔn dɔl.
18 Fɔks dɛn de waka waka naw na Mawnt Zayɔn bikɔs nɔbɔdi nɔ de de.
19 E Jiova, yu de rul sote go.
Yu tron na frɔm jɛnɛreshɔn afta jɛnɛreshɔn.
20 Wetin mek yu fɔgɛt wi ɛn pul an pan wi biznɛs fɔ lɔng tɛm?
21 E Jiova, briŋ wi bak to yu, ɛn wi go rɛdi fɔ kam bak to yu.
Mek lɛ tin fayn bak fɔ wi lɛk aw i bin de trade.
22 Bɔt yu dɔn rili lɛf wi.
Yu dɔn kɔntinyu fɔ vɛks pan wi bad bad wan.
Chapta 1-4 na sɔri siŋ dɛn we dɛn arenj akɔdin to aw dɛn de rayt di Ibru alfabɛt.
Ɔ “yɔŋuman.”
Insay Ibru, “edman.”
Ɔ “mek dɛn layf kam bak.”
Dis na wan we we dɛn kin yuz fɔ tɔk bɔt Jerusɛlɛm.
Rid Baybul Wɔd dɛn Minin.
Ɔ “mi sol.”
Insay Ibru, “mɔt.”
Ɔ “yɔŋuman.”
Ɔ “dɛn layf go kam bak.”
Insay Ibru, “ɔn.”
Ɔ “dɔnawe wit.”
Ɔ “Nɔbɔdi nɔ de fɔ tɛl dɛn wetin fɔ du.”
Dis na wan we we dɛn bin de rayt pɔym, sɔntɛm fɔ sho we sɔntin sɔriful.
Rid Baybul Wɔd dɛn Minin.
Rid Baybul Wɔd dɛn Minin.
Insay Ibru, “yu yay in galpikin.”
Insay Ibru, “na di say usay di strit dɛn stat.”
Ɔ “yɔŋuman.”
Ɔ “i de blɔk.”
Ɔ i kin bi, “mek a nɔ ebul du natin.”
Insay Ibru, “mas.”
Insay Ibru, “pikin.”
Ɔ “Yu sol.”
Ɔ “Mi sol se.”
Ɔ “sol.”
Ɔ “wet peshɛnt wan.”
Rid Baybul Wɔd dɛn Minin.
Insay Ibru, “mi pipul dɛn galpikin.”
Ɔ “mi sol.”
Insay Ibru, “na di say usay di strit dɛn stat.”
Na animal we tan lɛk dɔg.
I kin min ples we wanwan pipul dɛn ɔ plant de. Rid Baybul Wɔd dɛn Minin.
Insay Ibru, “brayt rɛd; dat na dia dia brayt rɛd klos.”
Insay Ibru, “mistek.”
Rid Baybul Wɔd dɛn Minin.
Ɔ “de ya wit wi as fɔrina dɛn.”
Rid Baybul Wɔd dɛn Minin.
Rid Baybul Wɔd dɛn Minin.
Ɔ “sol.”
Rid Baybul Wɔd dɛn Minin.
Ɔ “rep.”