Jizɔs Ebul Mek Bad Tin Nɔ Apin To Wi

DI TƐM we Jizɔs big ɛn lan bɔt aw Jiova nɔ mek bad tin apin to am, yu tink se i pre to Jiova fɔ tɛl am tɛnki?— Wetin yu tink se Jizɔs go dɔn tɛl Meri ɛn Josɛf we i kam fɔ no se dɛn kɛr am go na Ijipt so dat dɛn go sev in layf?—

Tide, Jizɔs nɔto yɔŋ bebi igen. I nɔ ivin de na dis wɔl igen. Bɔt yu go dɔn notis se tide sɔm pipul dɛn stil de tink se Jizɔs na yɔŋ bebi we de na di say usay dɛn kin put it fɔ animal dɛn, nɔto so?— Dis na tru bikɔs na bɔku ples dɛn we Krismas tɛm kin rich, dɛn kin put pikchɔ we de sho Jizɔs as bebi.

Pan ɔl we Jizɔs nɔ de na dis wɔl igen, yu biliv se i stil de alayv?— Yɛs, na tru se i bin dɔn gɛt layf bak, ɛn naw na pawaful Kiŋ na ɛvin. Wetin yu tink se i go du fɔ mek bad tin nɔ apin to di wan dɛn we de wɔship am?— Wɛl, we Jizɔs bin de na dis wɔl, i sho aw i ebul mek bad tin nɔ apin to di wan dɛn we lɛk am. Lɛ wi si aw i bin du dis di tɛm we in ɛn in disaypul dɛn bin de na wan bot.

Wan aftanun, Jizɔs bin de tich bay di Si we de na Galili, we lɔng lɛk 13 mayl ɛn wayd lɛk 7 ɛn af mayl so. I bin tɛl in disaypul dɛn se: “Mek dɛn krɔs di wata go oba say.” So dɛn go na di bot ɛn dɛn bigin fɔ krɔs di wata. Jizɔs bin taya, so i go biɛn di bot ɛn ledɔm. I nɔ tu te i slip.

Bikɔs di disaypul dɛn bin de wach di bot fɔ lɛ i go usay dɛn want, dɛn nɔ bin slip. Fɔ sɔm tɛm, ɔltin bin fayn, bɔt i nɔ tu te, wan big briz bigin fɔ blo. I kɔntinyu fɔ blo ɛn di si bigin rɔf. Bikɔs di si bin rɔf, wata bigin fɔ go insay di bot.

Di disaypul dɛn bin de fred se dɛn go sink. Bɔt Jizɔs nɔ bin de fred. I bin stil de slip biɛn di bot. Di disaypul dɛn bin wek am ɛn tɛl am se: ‘Masta, Masta, sev wi, na day wi de day so.’ Wantɛm wantɛm, Jizɔs grap ɛn tɛl di ‘briz fɔ stɔp fɔ blo ɛn di wata fɔ stɛdi.’

As i tɔk dat so, di briz stɔp fɔ blo ɛn di wata stɛdi. Di disaypul dɛn bin sɔprayz. Dɛn nɔ wande si dɛn kayn tin ya. Dɛn bigin fɔ tɔk to dɛnsɛf se: ‘Uskayn man dis? I de tɛl di briz ɛn wata wetin dɛn fɔ du ɛn dɛn de du am!’—Lyuk 8:​22-25; Mak 4:​35-41.

Yu no udat na Jizɔs?— Yu sabi udat gi Jizɔs pawa?— Di disaypul dɛn nɔ bin nid fɔ fred we Jizɔs bin de wit dɛn, bikɔs Jizɔs nɔto bin ɔdinari mɔtalman. I ebul du wetin nɔbɔdi nɔ ebul du. Mek a tɛl yu bɔt wan ɔda tin we i du we wata bin rɔf wan ɔda tɛm.

Ivintɛm dɔn rich, ɛn Jizɔs tɛl in disaypul dɛn fɔ tek bot ɛn go na di ɔda say na di si. Dɔn Jizɔs in wan go ɔp wan mawnten. I bin go de fɔ pre to in Papa, Jiova Gɔd, bikɔs na ples we kwayɛt.

Di disaypul dɛn go insay di bot ɛn dɛn bigin fɔ krɔs di si. I nɔ tu te, big big briz bigin fɔ blo. Nɛt bin dɔn kam. Di man dɛn pul di klos dɛn we bin de kɔntrol di bot ɛn bigin fɔ padul. Bɔt dɛn nɔ bin ebul fɔ go fa, bikɔs di briz bin rili de blo. Di bot bin de go ɔp ɛn dɔŋ ɛn wata bin de go insay. Di man dɛn bin de wok tranga wan so dat dɛn go rich na dray land, bɔt dɛn nɔ bin ebul.

Jizɔs bin stil de ɔp di mawnten in wangren. I dɔn te we i de de. Bɔt naw i si se in disaypul dɛn layf bin de pan denja na di si we bin dɔn rɔf. So i kam dɔŋ frɔm di mawnten ɛn go nia di si. Jizɔs bin want fɔ ɛp in disaypul dɛn, so i bigin fɔ waka pantap di wata we bin dɔn rɔf!

Wetin go apin if yu tray fɔ waka pantap wata?— Yu go sink ɛn sɔntɛm yu go day. Bɔt Jizɔs bin difrɛn. I bin gɛt spɛshal pawa. Jizɔs bin gɛt fɔ waka fɔ lɔng tɛm fɔ go mit dɛn na di bot. So do bin dɔn de klin we di disaypul dɛn si Jizɔs de waka pantap di wata de kam to dɛn. Bɔt dɛn nɔ biliv wetin dɛn si. Dɛn bin rili de fred ɛn dɛn bigin fɔ kray. Dɔn Jizɔs tɛl dɛn se: “Una nɔ fred, una nɔ wɔri, na mi dis!”

As Jizɔs go insay di bot, di briz stɔp fɔ blo. Di disaypul dɛn bin sɔprayz bak. Dɛn nil dɔŋ bifo Jizɔs ɛn se: “Fɔ tru, yu na Gɔd in Pikin!”—Matyu 14:​22-33; Jɔn 6:​16-21.

Yu nɔ tink se i bin fɔ fayn if yu bin de insay Jizɔs in tɛm fɔ si we i bin de du dɛn kayn tin dɛn ya?— Yu sabi wetin mek Jizɔs du dɛn kayn mirekul dɛn ya?— I du am bikɔs i lɛk in disaypul dɛn, ɛn i want fɔ ɛp dɛn. Bɔt i du am bak fɔ sho di kayn pawa we i gɛt, ɛn wetin i go du tumara bambay we i go bi Kiŋ na Gɔd in Kiŋdɔm.

Tide sɛf Jizɔs de yuz in pawa fɔ mek Setan nɔ stɔp in pipul dɛn fɔ prich bɔt Gɔd in Kiŋdɔm. Bɔt Jizɔs nɔ bin yuz in pawa fɔ mek in disaypul dɛn nɔ sik ɔ fɔ mɛn dɛn we dɛn sik. Ivin Jizɔs in apɔsul dɛn ɔl bin day. Na kil dɛn bin kil Jɔn in brɔda we nem Jems, ɛn dɛn bin put Jɔn sɛf na jel.—Di Apɔsul Dɛn Wok [Akt] 12:​2; Rɛvɛleshɔn 1:​9.

Na di sem tin kin apin tide. Ɔlman de sik ɛn day, ilɛksɛf dɛn de wɔship Jiova ɔ dɛn nɔ de wɔship am. Bɔt i nɔ go te igen, we Jizɔs bi Kiŋ na Gɔd in gɔvmɛnt ɔltin go chenj. Nɔbɔdi nɔ go nid fɔ fred igen, bikɔs Jizɔs go yuz in pawa fɔ ɛp ɔl di wan dɛn we de obe am. —Ayzaya 9:​6, 7.