DI TƆPIK NA DI FRƆNT PEJ | ƐNI BƐNIFIT DE WE PƆSIN DE PRE?
Ɛnibɔdi De Lisin?
Sɔm pipul dɛn fil se we pɔsin de pre i jɔs de west in tɛm, bikɔs nɔbɔdi nɔ de lisin. Ɔda pipul dɛn dɔn tray fɔ pre bɔt dɛn fil se dɛn nɔ gɛt ɛni ansa. Wan man we nɔ biliv Gɔd tɔk aw i tink se Gɔd bi ɛn i pre se: “Jɔs dɔl yu vɔys we yu de tɔk to mi.” Bɔt i tɔk se, Gɔd “nɔ de tɔk.”
Bɔt di Baybul tɛl wi se Gɔd de ɛn i de yɛri wi prea dɛn. Trade trade, di Baybul bin dɔn tɛl sɔm pipul dɛn se: “I [Gɔd] go mɔs sɔri fɔ una we una de kray fɔ ɛp; as i yɛri we una de kray so, i go ansa una.” (Ayzaya 30:19) Wan ɔda vas na di Baybul tɔk se: “I [Gɔd] kin gladi fɔ yɛri di prea we di wan dɛn we de waka tret kin mek.”—Prɔvabs 15:8.
Jizɔs pre to in Papa, “ɛn Gɔd bin yɛri in prea.”—Di Ibru Pipul Dɛn 5:7
Di Baybul tɔk bak bɔt sɔm pipul dɛn we bin pre to Gɔd, ɛn Gɔd bin yɛri dɛn prea. Wan vas na di Baybul tɔk se Jizɔs bin “aks di Wan we ebul fɔ sev am frɔm day, ɛn Gɔd bin yɛri in prea.” (Di Ibru Pipul Dɛn 5:7) Ɔda ɛgzampul de na Daniɛl 9:21 ɛn Sɛkɛn Krɔnikul 7:1.
Wetin mek sɔm pipul dɛn kin fil se Gɔd nɔ de ansa dɛn prea? Fɔ lɛ Gɔd go ansa wi prea, na to am nɔmɔ wi fɔ pre. Na in na di Gɔd we di Baybul tɔk bɔt, ɛn in nem na Jiova.a Wi nɔ fɔ pre to ɛni ɔda gɔd ɔ to wi granpa dɛn we dɔn day. Gɔd want lɛ wi pre bak fɔ sɔntin we “i want,” dis min se wi fɔ pre to Gɔd fɔ tin dɛn we i gri wit. Gɔd prɔmis wi se if wi pre dis kayn we, “i go yɛri wi.” (Jɔn In Fɔs Lɛta 5:14) So, fɔ lɛ wi go gɛt ansa to wi prea, wi nid fɔ no di Gɔd we de na di Baybul ɛn lan bɔt wetin i want.
Bɔku pipul dɛn biliv se prea nɔto fɔ natin, dɛn biliv se Gɔd de lisin to prea dɛn ɛn i de ansa we pɔsin pre to am. Wan man na Kenya, we nem Ayzak tɔk se: “A bin pre to Gɔd fɔ lɛ i ɛp mi fɔ ɔndastand di Baybul. I nɔ tu te, sɔmbɔdi kam mit mi ɛn ɛp mi.” Wan uman na di Filipins we nem Ilda, bin want fɔ lɛf fɔ smok. Afta i dɔn tray te i nɔ ebul, in man tɛl am se, “Wetin mek yu nɔ go pre to Gɔd fɔ lɛ i ɛp yu?” Ilda fala in man in advays ɛn i tɔk se: “Di we aw Gɔd ɛp mi bin mek a sɔprayz. Tɛm kam we a nɔ bin de fil fɔ smok. A bin ebul fɔ lɛf fɔ smok.”
Yu tink se Gɔd want fɔ ɛp yu wit yu prɔblɛm we yu pre to am di we aw i want?
a Di Baybul sho se Gɔd in nem na Jiova.