Wan Gud we Wan Kristian Bin Du
INSAY wan smɔl tɔŋ na Gujurat, insay India, Jɔn in papa bin baptayz ɛn bi wan pan Jiova Witnɛs dɛn bitwin di ia 1958 to 1960. Bɔt Jɔn, in fayv brɔda ɛn sista dɛn, ɛn dɛn mama na Katolik dɛn ɛn dɛn bin rili lɛk dɛn rilijɔn. So dat mek dɛn nɔ bin lɛk wetin dɛn papa biliv.
Wan de, Jɔn in papa bin sɛn am fɔ go lɛf wan ɛnvilɔp to wan brɔda we dɛn ɔl de na di sem kɔngrigeshɔn. Bɔt da mɔnin tɛm de, Jɔn bin wund in finga bad bad wan we i de opin wan big kɔp. Bɔt stil, i bin want fɔ obe in papa, so i tay pisis pan in finga ɛn go lɛf di ɛnvilɔp.
We Jɔn rich na di say we in papa sɛn am, i gi di ɛnvilɔp to di brɔda in wɛf. In bak na Jiova Witnɛs. Di brɔda in wɛf bin notis Jɔn in finga we wund ɛn i tɛl am se i want fɔ ɛp am. I pul in fɛst-ed bɔks, klin di wund, ɛn put plasta pan di finga. Afta dat, i mek wan kɔp ti fɔ Jɔn. We di uman bin de du ɔl dis, i bin de tɔk fayn to Jɔn bɔt di Baybul.
Bikɔs dis uman bin du gud to Jɔn, dat bin mek di we aw Jɔn bin de tink bɔt Jiova Witnɛs dɛn bin chenj. So Jɔn aks di uman tu kwɛstyɔn dɛn bɔt di tin dɛn we Jiova Witnɛs dɛn biliv we difrɛn frɔm wetin Katolik pipul dɛn biliv. Jɔn aks if Jizɔs na Gɔd ɛn if Kristian dɛn fɔ pre to Meri. Di sista bin dɔn lan fɔ tɔk Gujurati so i bin ebul fɔ ansa Jɔn in kwɛstyɔn dɛn insay in yon langwej. Di sista sho am di ansa dɛn frɔm di Baybul ɛn i gi am wan smɔl buk we nem “This Good News of the Kingdom.”
Leta, we Jɔn rid di buk, i bin no se wetin i de rid na tru. I go to in prist ɛn aks am di sem tu kwɛstyɔn dɛn. Di prist bin vɛks bad bad wan ɛn i trowe wan Baybul pan am, de ala se: “Yu dɔn tɔn Setan! Sho mi usay di Baybul se Jizɔs nɔto Gɔd. Sho mi usay i se yu nɔ fɔ wɔship Meri. Sho mi!” Jɔn bin sɔprayz fɔ si di prist de biev dis kayn we. I bin tɛl di prist se i nɔ go ɛva go na Katolik chɔch igen. Ɛn i nɔ bin ɛva go de!
Jɔn bin stat fɔ stɔdi di Baybul wit di Witnɛs dɛn, i tek di trut, ɛn i bigin fɔ sav Jiova. As tɛm de go, bɔku ɔda pipul dɛn na in famili bin tek di trut. Afta lɛk 60 ia so, di mak na Jɔn in finga de stil mɛmba am bɔt wan gud tin we wan Kristian du fɔ am we mek i yuz in layf fɔ sav Jiova.—Sɛkɛn Lɛta Fɔ Kɔrint 6:4, 6.