Yu Go Ebul fɔ Lɛf fɔ Tink bɔt Bad Tin Dɛn

AW YU kin fil we yu gɛt disapɔyntmɛnt? Bɔku masta sabi bukman dɛn biliv se di ansa to da kwɛstyɔn de, de sho if yu na pɔsin we de tink bɔt gud tin ɔ ɔltɛm yu de tink se na bad go apin. Wi ɔl de sɔfa bikɔs ɔf difrɛn prɔblɛm dɛn na wi layf, bɔt sɔm de sɔfa mɔ pas ɔda pipul dɛn. Bɔt wetin mek sɔm pipul dɛn ebul fɔ bia we prɔblɛm mit dɛn ɛn rɛdi fɔ tray bak, bɔt ɔda pipul dɛn nɔ ebul fɔ bia pan ɔl we di prɔblɛm we mit dɛn nɔ rili siriɔs?

Fɔ ɛgzampul, imajin se yu de luk fɔ wok. Yu go fɔ wan intavyu bɔt yu nɔ gɛt di wok. Aw yu go fil bɔt dat? Sɔntɛm yu go tink se na yu dɛn nɔ lɛk ɛn yu go si am as big prɔblɛm ɛn tɛl yusɛf se: ‘Nɔbɔdi nɔ go ɛva gi pɔsin lɛk mi wok. A nɔ go ɛva gɛt wok.’ Ɔ di tin we bad na dat yu go mek dis wan prɔblɛm chenj di we aw yu de tink bɔt yu wan ol layf. Yu go ivin bigin tink se: ‘A nɔ ebul fɔ du bɛtɛ tin. A nɔ gɛt wan valyu.’ If pɔsin de tink dɛn we dɛn ya, i de sho klia wan se i nɔ de tink bɔt gud tin.

Wetin Go Ɛp Yu fɔ Lɛf fɔ Tink bɔt Bad Tin?

Wetin go ɛp yu fɔ lɛf fɔ tink bɔt bad tin? Fɔs, na fɔ gri se yu kin tink da bad we de. Sɛkɔn, tray fɔ fɛt fɔ lɛf fɔ tink da we de. Nɔ jɔs tink bɔt bad rizin dɛn we mek sɔntin nɔ apin. Fɔ ɛgzampul, na tru se dɛn nɔ gi yu di wok bikɔs nɔbɔdi nɔ lɛk yu biznɛs? Ɔ na bikɔs di bɔsman de luk fɔ pɔsin we gɛt ɔda kwalifikeshɔn?

If yu tink di kɔrɛkt we dat go ɛp yu fɔ lɛf fɔ tink bɔt bad tin dɛn. Yu tink se jɔs bikɔs yu nɔ gɛt wan tin dat min se yu nɔ gud pan ɔltin na yu layf? Ɔ yu nɔ tink se i go fayn fɔ mek yu tink bɔt ɔda say dɛn we yu de du wɛl lɛk we i kam pan yu padi biznɛs wit Gɔd, yu famili, ɔ wit yu ɔda padi dɛn? Lan fɔ tink bɔt gud tin dɛn ɛn nɔ de tink ɔltɛm se na bad nɔmɔ go apin to yu. Yu go rili ebul fɔ no if yu nɔ go ɛva ebul fɔ gɛt wok? Bɔku tin dɛn de we yu go ebul fɔ du fɔ mek yu lɛf fɔ tink bɔt bad tin dɛn.

Go De Tink se Gud Tin Go Apin we Yu Sɛt Gol

Dis biɛn tɛm, di wan dɛn we de du risach dɔn tɔk smɔl bɔt wetin na op. Dɛn se op na we pɔsin biliv se i go ebul fɔ rich in gol dɛn. Insay di nɛks atikul, wi go lan se nɔto dat nɔmɔ na op. Bɔt fɔ naw, dis tin we dɛn dɔn tɔk bɔt op go rili ɛp pan ɔda tin dɛn. We wi de tink bɔt op dis kayn we, i go ɛp wi fɔ tink bɔt gud tin dɛn we wi sɛt gol dɛn.

Fɔ mek wi biliv se wi go ebul fɔ rich di gol dɛn we wi dɔn sɛt, wi nid fɔ mek am wi abit naw fɔ de sɛt gol dɛn ɛn du wetin wi dɔn plan. If yu tink se yu nɔ de du dat, i go fayn fɔ mek yu tink gud wan bɔt di kayn gol dɛn we de sɛt fɔ yusɛf. Fɔs, yu gɛt ɛni gol? I kin izi fɔ mek wi jɔs de du ɛnitin we wi want fɔ du ɛvride, bɔt i go fayn fɔ lɛ wi stɔp sɔntɛnde ɛn tink bɔt wetin wi rili want na layf, wetin rili impɔtant to wi. Trade trade, di Baybul bin dɔn tɔk bɔt dis patikyula advays. I se: “Una mek shɔ ɔf di tin dɛn we rili impɔtant.”​—Filipians 1:​10.

We wi tink bɔt tin dɛn we rili impɔtant, i go izi fɔ lɛ wi no us gol dɛn fɔ sɛt we i kam pan wi padi biznɛs wit Gɔd, wi famili, ɔ we i kam pan wok biznɛs. I impɔtant bak fɔ lɛ wi nɔ sɛt bɔku gol dɛn wantɛm wantɛm. I go fayn fɔ lɛ wi sɛt wan gol ɛn tray fɔ rich am. If i at fɔ mek wi rich wan patikyula gol, wi go fil bad ɛn wi go giv-ɔp. So if i go te bifo wi rich wan patikyula gol, i go fayn fɔ mek wi sheb am to shɔt shɔt gol dɛn we wi go ebul fɔ rich.

Bɔku tɛm pipul dɛn kin tɔk se “If yu mekɔp yu maynd fɔ du sɔntin, yu go ebul fɔ du am.” So we wi sɛt gol dɛn, wi nid fɔ mekɔp wi maynd fɔ rich dɛn gol dɛn de. Wi go ebul fɔ mekɔp wi maynd fɔ rich dɛn gol dɛn de bay we wi de tink bɔt wetin mek dɛn gol dɛn de impɔtant ɛn di bɛnifit dɛn we wi go gɛt we wi rich dɛn. Na tru se nɔto ɔltɛm tin go go fayn fɔ wi, bɔt wi want fɔ si dat as smɔl prɔblɛm ɛn nɔ tink se ɔltin dɔn dɔn fɔ wi.

Bɔt wi go nid fɔ tink bak bɔt ɔda tin dɛn we wi go nid fɔ du fɔ rich wi gol dɛn. Wan man we nem C. R Snyder, we dɔn lan bɔku bɔt wetin mek op impɔtant bin tɔk se, i go fayn fɔ mek wi tink bɔt difrɛn difrɛn tin dɛn we wi go du fɔ rich wi gol. So if wan tin nɔ kɔmɔt fayn wi go tray di sɛkɔn wan, ɔ di tɔd wan, ɔ tray ɛni ɔda wan.

C. R Snyder, bin tɔk bak se i go fayn fɔ mek wi no ustɛm fɔ chenj wan gol fɔ ɔda wan. If wi rili nɔ ebul fɔ rich wan patikyula gol, we wi de wɔri bɔt am, dat go jɔs mek wi at pwɛl. If wi chenj di gol we wi nɔ ebul fɔ rich to ɔda gol we wi go ebul fɔ rich, dat go mek wi gɛt op.

Di Baybul gɛt wan fayn ɛgzampul bɔt dis. Kiŋ Devid bin rili want fɔ bil tɛmpul fɔ in Gɔd, Jiova. Bɔt Gɔd bin tɛl Devid se na in pikin Sɔlɔmɔn go du da wok de nɔto in. Bɔt Devid nɔ bin fil bad ɔ tink se paopa i fɔ du da wok de bifo dat, i bin chenj in gol dɛn. I disayd fɔ gɛda di mɔni ɛn matirial dɛn we in pikin go nid fɔ mek i go ebul fɔ dɔn di wok.​—Fɔs Kiŋ 8:​17-​19; Fɔs Kronikul 29:​3-7.

Pan ɔl we wi go tray tranga wan fɔ lɛf fɔ tink bɔt bad tin dɛn ɛn tink bɔt gud tin dɛn we wi sɛt gol, wi go stil nid fɔ du mɔ tin dɛn fɔ gɛt op. Wetin mek wi se so? Na bikɔs bɔku pan di tin dɛn we de apin na di wɔl we mek wi nɔ gɛt op de apin bikɔs ɔf tin dɛn we wi nɔ ebul kɔntrol. Wetin go ɛp wi fɔ kɔntinyu fɔ gɛt op pan ɔl we bɔku prɔblɛm dɛn de mit mɔtalman na di wɔl lɛk po, wɔ, we dɛn nɔ de trit pipul dɛn fia wan, ɛn we sik ɛn day de ɔlsay?

[Pikchɔ na pej 7]

If dɛn nɔ gi yu wan patikyula wok we yu want yu go tink se yu nɔ go ɛva gɛt wok?

[Pikchɔ na pej 8]

Kiŋ Devid bin ajɔst in gol dɛn