Di Pipul dɛn we Bin De Bil Wan Ay Ay Os

AFTA sɔm tɛm, Noa in pikin dɛn bɔn bɔku pikin dɛn. Dɛn pikin ya dɛnsɛf big, ɛn bɔn bɔku pikin dɛn. Ɛn na so pipul dɛn bigin plɛnti na di wɔl.

Wan pan dɛn pipul ya na Noa in gret granpikin we nem Nimrɔd. In na bad man. Na ɔntinman we bin de kil animal ɛn mɔtalman. Nimrɔd bin want rul pipul dɛn, so i mek insɛf kiŋ. Gɔd nɔ bin lɛk Nimrɔd.

Da tɛm de, ɔl di pipul dɛn bin de tɔk di sem langwej. Nimrɔd bin want mek ɔl di pipul dɛn we i de rul, de wanples. So yu no wetin i du? I tɛl di pipul dɛn fɔ mek wan tɔŋ ɛn bil wan ay ay os insay de. Luk na di pikchɔ, yu de si we dɛn de mek di blɔk dɛn?

Jiova Gɔd nɔ bin gladi fɔ wetin dɛn bin de du. Gɔd bin want mek pipul dɛn de ɔlsay na di wɔl. Bɔt di pipul dɛn bin de tɛl dɛn kɔmpin dɛn se: ‘Una kam lɛ wi mek wan tɔŋ ɛn bil wan ay ay os we go di klawd! We wi du dis, ɔlman go no bɔt wi.’ Di rɛspɛkt we Gɔd fɔ gɛt na in dɛn pipul ya want fɔ dɛnsɛf.

So Gɔd mek di pipul dɛn lɛf fɔ bil di ay ay os we dɛn bin de bil. Yu no aw Gɔd bin du dis? Ɛnti di pipul dɛn bin de tɔk di sem langwej, Gɔd mek dɛn bigin tɔk difrɛn difrɛn langwej dɛn. Di wan dɛn we bin de bil di os nɔ bin de ɔndastand wetin dɛn kɔmpin dɛn bin de tɔk to dɛn. So na dat mek dɛn kɔl di tɔŋ Babɛl ɔ Babilɔn, we min “Kɔnfyushɔn.”

Di pipul dɛn bigin kɔmɔt na Babɛl. Ɔl di wan dɛn we de tɔk di sem langwej, go de togɛda na difrɛn pat dɛn na di wɔl.